Bible in duytsche (Delftse bijbel 1477)

§ Capitte .xlvi.

1

DIt is des heren woert dat tot iheremiam den propheet ghedaen was ieghen die heyden

2

tot egipten waert. ieghens pharaons nechao des conincs egipten heer: dat neuen die riuiere eufratim was in charchamis dat die coninc van babilonien versloech in ioachims iosias sone des conincs van iuda vierden iaer.

3

Bereit den bokelaer ende den schilt: ende gaet voert ten stride.

4

Voeghet die paerde ende ghi ridders sitter op. staet in helmen ende bruneert die glauien: cleet v mit panseren.

5

Wat ist aldus? Ic sachse versaghet ende haren rugghe kerende: haer starcke gheslagen Ende si vloghen haestelijc: ende si en saghen niet. Anxt van allen ziden seit die here.

6

Die snelle en vlie niet: ende die starcke en wane niet dat hi behouden blijuen sal. Ten noerden neuen die riuieren van eufraten worden si verwonnen: ende vielen daer.

7

Wie is dese die als ene riuiere op coemt: ende dies baren heffen op als vluet?

8

Egipten sal op coemen als een riuiere: ende als riuieren sullen haer vlueden beruert worden: ende si sullen seggen. Op wassende sal ic dat lant ouerdecken: ende ic sal die stede verliesen ende die ghene die daer in wonen

9

Sitte op paerden ende verblijde in waghenen: ende die starcke comen voert. Ethiophien ende libien houdende den schilt: ende die van libien begripende ende scietende die gescutten.

10

Want die dach is des heren gods vanden scaren. die dach der wraken. dat hi wrake nemen sal van sijnen vianden. Dat zwaert sal verslinden ende werden ghesaedt: ende het sal droncken worden van haren bluede. Want des heren vanden scaren victime is in dat lant van noerden: neuen die riuiere van eufraten.

11

Ganc op in galaad: ende brenghe resine maget dochter van egipten. Te vergheues sultstu di die medecine vermenichfoudigen: di en sal ne gene gesontheit wesen

12

Die heiden hebben dijn scande gehoert ende dijn huylen heeft dat lant veruolt

[p. *481]

Want die starcke heeft hem gehoert ieghen den sarcken: ende si vielen beide te gader.

13

Een woert dat die here sprac tot iheromiam den prophete. van die dat comen soude nabugodonosor die coninc van babilonien: ende verslaen dat lant van egipten.

14

Bootscapt egipten. ende doet horen in magdalo ende dat ghelude in memphis: ende segghet in tafnis. Stant op ende bereide di: want dat zwaert sal verslinden al dat omtrent di is.

15

Waer om is dijn starcke verrot? Hi en stont niet: want die here warpen omme.

16

Hi menichfoudichde die ghene die vielen: ende die man viel te sinen naesten waert. Ende sy sullen seggen. Staet op: ende keren wi weder tot onsen volke ende ten lande van onser geboerten vanden aensicht des zwaerts der duuen.

17

Roept pharaons des conincs van egipten name: die tijt heeft gheruchte toe bracht.

18

Leue ic seit die coninck. here vanden scaren is sijnen name. want hi sal comen als thabor in den berghen ende als carmelus in die zee

19

Woennarsse dochter van egipten make di vaten om ouer te varen: want memphis sal in wildernisse wesen: ende het sal ghelaten worden ende wesen datmenre niet in en sal moghen wonen.

20

Egipten is ene vrome ende schone calfkijn die voertstoker sel haer comen van noerden.

21

Haer huerknapen oec die wandelen in midden haer als vette calueren. keerden hem ende vloghen te gader. ende sij en mochten niet staen: want die dach haerre dootslacht sal op hem comen: die tijt haerre visiteringhen

22

Sijn stemme sal luden als dat geluyt van coper. want si sullen tiden mit eenre scaren: ende si sullen hem comen mit bilen. Als of si hout houden souden

23

so hiewen si sijn bussche seit die here: dien men niet gheprisen en mach. Si sijn ghemenichfeudicht bouen die spelthanen: ende in hem is gheen ghetal.

24

Die dochter van egipten is bescaemt ende gheleuert in des volcs van noerden hant.

25

Die here vanden scaren god van isrhel seide. Siet ic sal visiteren op dat gheruchte van alexandrien. ende op pharaon ende op egipten ende op hare goden ende op haer coninghen ende op pharaon. ende op alle die gene die in hem betrouwen

26

ende ic salse gheuen inder gheenre hant die haer zielen zoecken: ende in nabugodonosor des conincs van babilonien hant ende in sijnre knechten hant. Ende hier na salmenre in wonen alsoet inden eersten daghen dede seit die here.

27

Ende du mijn knecht iacob en ontsie di niet ende israhel en verslae di niet. Want sich ic sal di behouden maken van verren: ende dijn saet vanden lande sijnre geuanghenisse. Ende iacob sal wederkeren ende rusten ende voerspoedich sijn. ende nyemant en sal wesen dien veruaren sal

28

Ende du iacob mijn knecht en wil niet ontsien seit die here. want ic bin mit di: want ic sal alle heydenen te nyete maken te dien dat ic di verdreuen heb Mer di en sal ic niet te nyete maken: mer ic sal di castyen in vonnisse: ende ic en sal di niet sparen als enen ontsculdighen.