Bible in duytsche (Delftse bijbel 1477)

§ Capittel .xlv

1

EEn woert dat iheremias sprac die propheet tot baruch nerie sone. doe hi dese woerden ghescreuen hadde in enen boec wt iheremias monde: in ioachims iosias sone des conincs van iuda vierde iaer ende hi seide..

2

Dit seit die here god van israhel tot di baruch

3

Du hebtste gheseit. Wee mij catijf: want die here heeft te mijnen rouwe noch rouwe toe ghedaen. Ic hebbe gearbeit in minen versuchten: ende ic en hebbe ne ghene rust gheuonden.

4

Du sultste dit tot hem segghen aldus seit die here. Sich die ic ghesticht hebbe die destrueer ic: ende die ic gheplant hebbe die rode ic wt: ende al dit lant.

5

Ende du soecste te dijnre behoef grote dingen? En wiltse niet soeken: want sich ic sal bringhen quaet op alle vleysch seit die here: ende ic sal dijne ziele gheuen in salicheit in allen steden daer du toe tiden sultste