Bible in duytsche (Delftse bijbel 1477)

§ Capit .xliiij.

1

DIt woert was ghedaen tot iheremiam ende tot alle den ioden die woenden int lant van egipten. die woenden in magdalo ende in tafnis ende in memphis ende in dat lant phatures ende hij seide.

2

Dit seit die here vanden scaren god van israhel. Ghi hebt ghesien alle dit quaet dat ic op iherusalem ghebracht hebbe ende op alle die poerten van iuda: ende siet si sijn huden woest ende nyemant en is die daer in woent

3

om die qnaetheit die si ghedaen hebben dat si mi ter gramscappen verporren: ende dat sij gaen souden ende offeren ende oeffenen vreemde goden die si niet en wisten beide si ende ghi ende uwe vaders

4

Ende ic hebbe tot v ghesent alle mijne knechten ende die propheten opstaende bi nachte. ende di sendende ende segghende. En wilt niet doen dat woert

[p. *478]

van dustanigher onwaerdicheit

5

Ende si en hoerdens niet: noch en hielden haer oer niet nederwaert dat si bekeren souden van haren quaden weghen ende dat si vreemde goden niet offeren en souden.

6

Ende mijne onwaertscap wort ontsteken ende mijne toerne: ende sij is ontsteken inden steden van iuda. ende inden straten van iherusalem: ende si sijn verkeert in wildernissen ende in woestheit alsoet in desen daghe schijnt.

7

Ende nv seit dit die here vanden scaren god van israhel. Waer om doedi groet quaet ieghen uwe zielen. om dat van v lude verderuen sal manne ende wijue dat cleine kint ende dat noch sughet: vander middewaert van iuda ende datmen v niet ouerblijuens laten en sal:

8

om dat ghi mij verporret inden wercken van uwen handen offerende den afgoden in dat lant van egipten. daer ghi in comen sijt om daer te wonen. ende dat ghi verderuen sult ende dat ghij sijn sult in volcke. ende in lachtere allen den luden der werelt?

9

Hebdi vergheten uwe vadere quade wercken. ende der coninghen van iuda quade wercken. ende sijnre wijuen quade. ende uwe quade ende uwer wijuen quade wercken die si deden in dat lant van iuda ende inden lantscap van iherusalem?

10

Si en sijn niet ghesuuert tot desen dage: ende si en ontsaghen niet noch en hebben gewandelt in des heren wet ende in mijne geboden: die ic voer v gaf ende voer uwen vaders.

11

Hier om seit die here vanden scaren. god van israhel. Siet ic sal mine aensicht setten in v in quade: ende ic sal al iuda verderuen.

12

Ende ic sal aennemen die ouerblijuen van iuda die haer aensichten setteden dat si in egipten gaen souden ende daer wonen: ende si sullen alle verteert worden inden lande van egipten: ende si sullen vallen inden zwaerde ende in honger ende worden verteert in hongher vanden minsten tot den meesten sullen si alle inden zwaerde steruen: ende si sullen sijn in enen eedt ende in een verwonderen ende in een vloke ende in een lachtere.

13

Ende ic sal visiteren die ghene die in egipten wonen also ic gevisiteert hebbe op iherusalem inden zwaerdr ende inden honger ende in sterften:

14

ende nyemant en sal wesen die ontvlien sal. ende die ouerblijuen sal van der ioden ouerblijuen die gaen om vreemde te wonen in dat lant van egipten ende die wederkeren sal int lant van iuda: daer si tot haerre zielen op heffen dat si daer wederkeren sullen ende daer wonen. Si en sullen niet wederkeren sonder die ghene die vlien sullen.

15

Ende alle die mannen antwoerden iheremias die wisten dat hare wijuen offerden vreemde goden. ende alle die wijuen van den welcken daer ene grote menichte stont: ende alle dat volc van dien dat int lant van egipten woenden in phatures ende si seiden.

16

Die redene die du tot ons ghesproken heues in des heren name en sullen wi van di niet horen:

17

mer doende sullen wij doen elc woert dat wt onsen monde comen sal: dat wi sacrificie doen sullen der coninginne des hemels. ende wi sullen haer offeren versche offerhande: also wi daden ende on-

[p. *479]

se vaders onse coningen ende onse princen inden poerten van iuda ende inden straten van iherusalem: ende wi sijn versadet van broden. ende ons was wel. ende wi en saghen gheen quaet.

18

Ende van dier tijt dat wi op hielden sacrificie te doen die conincginne ende te offeren versche offerande so ghebrac ons van alle: ende mitten zwaerde ende hongher sijn wi verteert.

19

Ende ist dat wi die coninginne des hemels gheen sacrificie en doen ende offeren haer versche offerande: en hebben wi niet sonder onse mannen haer ghemaect coken om haer te oeffenen. ende coken om teghebruken?

20

Ende iheremias seide tot alle den volc teghen mannen ende vrouwen ende teghen alle die gemeente die hem antwoerden een woert seggende.

21

En ist niet die sacrificie die ghi gheoffert hebt inden steden van iuda ende inden steden van iherusalem? Ghij ende uwe vaders uwe conincghen ende v princen ende dat volc vanden lande: ende en sijn dese dinghen niet in des heren gedencken ende op gecomen in sijn herte?

22

Ende die here en mocht niet langher ghedragen. om die quaetheit van uwen aernsticheden ende om die onwaerdicheden die ghi dedet: ende v lant is werden in bedroeftheden ende in verwonderen ende in vloec: om datter nyemant in en woent: also dese dach is.

23

Om dat ghi den afgoden offert ende den here sondighet: ende om dat ghi des heren stemme niet en hoert. ende om dat ghi in sijn wet ende in sijnen gheboden ende in sijnen oercondtscap niet en wandelt. Hier om sijn dese quade dinghen op v ghecomen also dese dach is.

24

Ende iheremias seide tot alle den volke: ende tot alle den wiuen Al iuda die int lant van egipten sijt hoert des heren woert.

25

Dit seit die here van den scaren. god van israhel. Ghi ende uwe wijuen hebt ghesproken mit uwen monde: ende ghi hebbet mit uwen handen voldaen ende geseit. Doen wi onse beloften die wi gheloeft hebben. dat wi sacrificeren die conincginnen des hemels. ende offeren wi haer versche offerande. Gi hebt uwe beloften voldaen ende hebtse voldaen mitten wercken.

26

Hier om hoert des heren woert al iuda die in dat lant van egipten woent. Siet ic hebbe ghesworen in mijnen groten name seit die here. want voertmeer en sal mijnen name niet geheten worden wt elcs mans monde die iode is die seggen sal: leeft die here god. in al dat lant van egipten.

27

Siet ic sal op hem waken in quade ende niet in guede: ende alle die mannen van iuda die sijn in dat lant van egipten sullen werden verteert in den zwaerde ende in hongher tot dat sij al te male verteert zullen sijn.

28

Ende die dat zwaert sullen ontvlien si sullen weder keren in dat lant van iuda ende luttel mannen: ende alle die ouerbliue van iuda die in egipten gaen om daer te wonen sullen weten wies redenen veruolt werden sal. die mine. of die hare.

29

Ende dit sal een teyken sijn seit die here dat ic v visiteren sal op v in die stat: dat ghi weten sult want waerlijc mijn reden veruolt sal worden ieghen v in quade.

30

Dit seit die here. Siet ic sal leueren pharaone efree den coninc van egipten in sijnre

[p. *480]

vianden hant ende inder gheenre hant die zijne ziele soken: also ic sedechiam den coninc van iuda hebbe gheleuert in nabugodonosors des conincs van babilonien hant sijns viants ende die sijne ziele zoect