Bible in duytsche (Delftse bijbel 1477)

§ Capittel xlij

1

ENde alle die princen vanden vechters ende iohannan caree sone ende iezonias osie sone ende dat ander volc vanden cleynen totten groten: quamen tot iheremiam den prophete

2

ende seiden. Onse bedinge valle in dinen aenscouwen ende bidde ouer ons totten here onsen god ouer alle dese ouerbliue: want wi sijn luttel gelaten van velen also ons dijn oghen aensien:

3

ende den here dijn god boetscappe ons den wech daer wi doer trecken sullen: ende dat woert dat wi doen sullen.

4

Ende iheremias die propheet seide tot hem. Ic hebt gehoert. Siet ic bidde aen den here uwen god na uwen woerden: alle dat woert dat hi mi antwoerden sal dat sal ic v seggen ende ic en sal v niet helen.

5

Ende si seiden tot iheremiam. Die here moet tusschen ons sijn oerconde der waerheit ende der trouwen: ist dat wi niet na elc woert daer in di die here onse god te ons senden sal alsoe doen sullen.

6

weder dattet guet ofte quaet is. Wij sullen ghehoersaem sijn der stemmen ons heren ons gods te dien dat wij di senden: dat ons wel sijn moet als wij horen des heren ons gods stemme.

7

Ende doe thien dagen voldaen waren: so wort des heren woert tot iheremiam ghedaen.

8

Ende hi rrep iohannam caree sone ende alle die prin-

[p. *476]

cen vanden vechters die mit hem waren. ende alle dat volc vanden minsten tot den meesten:

9

ende hi seide tot hem. Dit seit die here god van israhel tot dien dat ghi mi sendet: dat ic uwe bedinghe soude doen in sijnen aenscouwen

10

Ist dat ghi rustende blijft in dit lant: so sal ic v stichten ende niet destrueren: ic sal v planten ende niet wtroden. Want ic bin nv ghepaeyt op dat quaet dat ic v gghedaen hebbe.

11

Ende wilt v niet ontsien van des conincs aensichte van babilonien: dien ghi bloede lude ontsiet. En wilt hem niet ontsien seit die here: want ic bin mit v dat ic v behouden maken sal. ende ic sal v beschermen van sijnre hant:

12

ende ic sal v ontfermicheit gheuen ende uwes ontfermen: ende ic sal v doen wonen in uwen lande.

13

Mer ist dat ghi segt wi en sullen niet wonen in desen lande. noch wi en sullen niet horen die stemme onses gods

14

ende segdi neen niet: mer wi sullen trecken ten lande waert van egipten daer en sullen wij gheen strijt sien. ende wij en sullen niet horen dat gheruchte vanden trompetten: ende wi en sullen ne gheen hongher ghedoghen: ende wi sullen daer wonen:

15

om dat ghi ouerbliue van iuda hoert nv des heren woert. Dit seit die here vanden scaren. god van israhel. Ist dat ghi v aensicht set om in egipten te gaen ende gadi daer in om daer te wonen:

16

dat zwaert dat gi ontsiet. sal v daer begripen int tlant van egipten: ende die hongher daer ghi om besorcht sijt sal aen v hanghen in egipten ende ghi sult daer alle steruen.

17

Ende alle die mannen die haer aensicht gheset hebben om in egipten te gaen om daer te wonen: sij sullen steruen inden zwaerde ende inden honger ende in sterften. Niemant van hem luden en sal blijuen: noch ontvlien vanden aensichte des quaets dat ic op hem bringhen sal.

18

want dit seit die here vanden scaren. god van israhel. Alsoe mijn toren ende mijn onwaertscap barnende was op die ghene die in iherusalem wonen: alsoe sal mijne onwaertscap ontsteken worden op v als ghi in egipten ghegaen sijt: ende ghi sult wesen in een zweren ende in een verwonderen ende in een vloeke ende in een lachtere ende ghi en sult nemmermeer dese stat sien.

19

Want des heren woert is op v ghi ouerblijue van iuda. En wilt in egipten niet gaen. Wetende suldi weten dat ic v huden gheoercondet hebbe:

20

want ghi uwe zielen bedroghen hebt. Want ghi sende mi totten here onsen god ende seidet. Bidde ouer ons toten here onsen god: ende na al dat dij segghen sal die here onse god also boetscapt ons ende wi sullent doen.

21

Ende ic heb v huden gheboetstapt ende ghi en hebt niet ghehoert des heren uwes gods stemme van allen dien dat hi mi tot v gesent heeft.

22

Nu hier om suldi wetende weten: dat ghi steruen sult inden zwaerde ende in hongher ende in sterften in die stat daer ghi in gaen woudt dat ghi daer in wonen soudt.