Bible in duytsche (Delftse bijbel 1477)

§ Ca .xli.

1

ENde het gheuiel in die seuende maent dat ysmahel nathanyas soen quam die elisama sone was vanden conincliken sade. ende des conincs edele luden ende thien mannen mit hem in masphat tot godolyam aychams sone: ende si aten te gader mit hem in masphat brode.

2

Ende ysmahel nathanias sone stont op ende die thien mannen die mit hem waren. ende sij verslogen mitten zwaerde godolyam aychams sone die saphans sone was: ende sloghen doot dien die coninc van babilonien bouen dat lant gheset hadden.

3

Ende ysmahel versloech oec alle die ioden die mit godolyam waren in masphat: ende die caldeeusche die hi daer vant ende alle die mannen die vechters.

4

Ende des anderen dages na dien det hi godolyam doot gheslegen hadde eert noch yemant wist

5

soe quamen mannen van sichem ende van sylo ende van samarien tachtich mannen die den baert ghescoren hadden ende haer cleder ghescoert ende die quellende of lelijc waren: ende si hadden ghiften ende wieroec in die hant: dat sijt offeren souden in des heren huus.

6

Ende ysmahel nathanias sone ghinc wt van masphat in hare ghemoet: ende hi ghinc al wenende ende al screyende. Ende doe hi hem te gemoet ghecomen was: soe seide hi tot hem. Coemt tot godolyam aychams sone..

7

Ende doe sij gecomen waren totter middewaert vander poert: soe sloechse doet ysmahel nathanias sone omtrent die middewart vanden putte hi ende die mannen die mit hem waren.

8

Ende onder hem waren thien mannen gheuonden die tot ysmahel seyden. En wil ons niet dootslaen: want wij hebben in enen acker ene tresoer van tarwen ende van gersten ende van olyen ende van honige Ende hi hielt op: ende en sloechse niet doot mit sijnen brueders.

9

Ende die putte daer ysmahel in gheworpen hadde alle die croengien vanden mannen dien hi versloech om godolias wille: hi is dat dien die coninc asa maecte om baasa des conincs van israhels wille. Ende ysmahel nathanias sone volde dien putte mitten verslagenen mannen.

10

Ende ysmahel leide gheuaen alle die ouerblijue vanden voclke die in masphat waren

[p. *475]

des conincs dochteren. Ende alle dat volc die bleuen in masphat: die nabuserdan den maerscalc vanden ridderen beuolen hadde godolias aychans sone Ende ysmahel nathanias sone vincse: ende hi ghinc wech dat hi ouer trecken soude tot ammons kinderen.

11

Ende iohannan caree soen hoerde ende alle die princen vanden vechters die mit hem waren alle dat quaet dat ysmahel nathanias sone gedaen hadde.

12

ende si namen mit hem alle die mannen ende si tiden wech om dat si vechten souden ieghen ysmahel nathanias sone: ende si vonden hem te vele wateren die in gabaon sijn

13

Ende als alle dat volc dat mit ysmahel was gesien hadde iohannan caree soen ende alle die princen vanden vechters die mit hem waren: so worden si verblijt

14

Ende alle die ghene die ysmahel gheuaen hadden in masphat keerden weder ende ghinghen wech tot iohannan caree sone.

15

Ende ysmahel nathanias sone vloech mit achte mannen van iohannan aensichte: ende ghinc wech ten kinderen van ammon.

16

Dus nam iohannan caree sone ende alle die princen vanden vechters die mit hem waren alle die overbliue vanden volke die si weder gebracht hadden van ysmahel nathanias sone van masphat: na dien dat si godoliam aychans sone verslaghen hadden die starcke mannen te stride ende die wiuen ende kinder ende die ghelubde camerlinghen dien hi weder gebracht hadde van gabaon:

17

ende si ghingen wech ende saten in vreemtheden in chanaan dat neuen bethleem is: om dat si wech tiden souden ende gaen in egipten vander caldeeuscher aensichte.

18

Want si ontsaghense: om dat ysmahel nathanias sone verslaghen hadde godoliam aychans sone. dien die coninc van babilonien bouen dat lant van iuda gheset hadde