Bible in duytsche (Delftse bijbel 1477)

§ Ca .xxxix

1

IN sedechias des conincs van iuda neghende iare in die tyende maent quam nabugodonosor die coninc van babilonien ende al sijn heer te iherusalem: ende si beleident.

2

Ende in sede-

[p. *472]

chias elfste iaer in die vierde maent inden vijfsten daghe vander maent. wort die stat op gedaen.

3

ende daer quamen in alle des conincs princen van babilonien: ende si saten in die middel poerte nereghel sereser semegar nabusarsathim rabsates neregel sereser rebmag: ende alle die ander princen des conincs van babilonien.

4

Ende doe sedechias die coninc van iuda sach ende alle die mannen die vechters so vloghen si: ende ghinghen des nachts vter stat alle den wech van des conincs coelhoue. ende doer die poerte die tusschen die twee muren was:: ende si toghen wt ten wege waert vander wildernissen.

5

Ende dat heer vanden caldeeuschen volgheden hem nae. ende si vinghen sedechiam int velt der wildernissen van iherico:: ende sij brochten gheuaen tot nabugodonosor den coninc van babilonien in reblatha dat int lant van emath is:: ende hij sprac tot hem vonnisse

6

Ende die coninc van babilonien dode in reblata sedechias sonen voer sijn oghen: ende alle die edele lude van iuda dode die coninc van babiaonien.

7

Ende hi stac sedechias ogen wt: ende hi spanneden in boeyen datmen in babilonien voren soude.

8

Ende des conincs huys ende des volcs huise ontstaken die caldeeusche mitten vyer: ende worpen die muren van iherusalem auerecht.

9

Ende die ouerbliue vanden volke die in die stat bleuen ende die vluchtighe die ouer geuloghen waren tot hem. ende die ouertallighe vanden ghemenen volc die bleuen waren die voerde nabusardan die prince vanden ridderen ouer in babilonien:

10

ende vanden armen luden die niet bedallen en hadden liet nabusardan die prince vanden ridderen in dat lant van iuda: ende hi gaf hem in dien daghe die wijngaerde ende die cysternen.

11

Ende nabugodonosor die coninc van babilonien hadde beuolen nabusardan den meester vanden ridderscap van iheremiam ende gheseit

12

Neem dien. ende slach dijn oghen op hem ende en doch hem niet quaets: mer du sultste hem doen alsoe hi willen sal.

13

Hier om sende nabusardan die price vanden ridderscap ende nabu ende sesban ende rabsares ende neregel ende sereser ende rebmag. ende alle des conincs van babilonien princen

14

sonden ende daden iheremias wt den voerhuyse vanden kerker: ende si leuerden godolias aychams sone die saphans sone was: dat hi int huys comen soude ende wonen int volc.

15

Ende doe iheremias ghesloten was int voerhuys vanden kerker so was tot hem ghedaen des heren woert seggende.

16

Ganc ende segghe abdemelech den moor van ethiophien. Dit seit die here vanden scaren. god van israhel Sich ic sal mijne woerden in brenghen op dese stat int quade ende niet int guede: ende in dien daghe sullen sij in dijnen aenscouwen wesen:

17

ende ic sal di verlossen in dien daghe seit die here Ende du en sultste niet geleuert werden in dijnre mannen hande die du ontsietste:

18

mer beschermende sel ic di verlossen ende du en sultste inden zwaerde niet vallen: mer di sal dine ziele wesen in salicheit: want du hebtste in mi betrouwen gehadt seit die here