Bible in duytsche (Delftse bijbel 1477)

§ Capit .xxxviij

1

SAphacias madians sone ende ihedelias phassurs sone ende iuchal selemias sone ende phassur melchias sone hoerden die reden die iheremias sprac tot allen den volke ende seide.

2

Dit seit die here. Soe wie bliuet in dese stat hi sal steruen in den zwaerde ende inden hongher ende mit sterften. mer die oueruliet ten caldeeuschen hi sal leuen: ende sijne ziele sal ghesont wesen ende leuende.

3

Dit seit die here. Leuerende sal dese stat gheleuert worden in des conincs van babilonien heers hant: ende hi salse vanghen.

4

Ende die princen seiden den coninc. Wi bidden datmen desen man dootslae. Van aernsticheden ontbint hi der mannen der vechters hande die gebleuen sijn in dese stat. ende al des volcs handen. om dat hy alle dustainge woerde tot hem spreect Want dese man en soect niet den paeys van desen volc: mer haer quaet.

5

Ende die coninck sedechias seide Siet hij is in uwen handen. Want ten is niet behoerlijc dat die coninc v yet ontseggen soude.

6

Hier om namen si iheremiam ende worpen in elchias amelechs soens putte die in dat voerhuys vanden kerker was. Ende si lieten iheremiam neder mit zelen inden putte: daer gheen water in en was mer slijck. Ende aldus ghinc iheremias neder inden slijcke.

7

Ende abdemelech die moer van ethiophia een ghelubbet camerlinc een man die van des conincs huys was hoerde: dat si iheremiam inden putte gedaen hadden Ende die coninc sat in benyamins poerte.

8

Ende abdemelech ginc wt des conincs huys: ende hi sprac tot den coninc ende seide.

9

Mijn here coninc dese mannen hebben qualijc ghedaen al dat si gecregen hebben ieghen iheremiam den prophete: dat si hem doen souden inden putte dat hi daer steruen sal van honger. Want in die stat en sijn niet meer broden.

10

Ende die coninc beual aldus abdemelech den moer ende seide. Neem van hier dertich mannen mit di: ende trecke iheremiam wt den putte eer hi sterue.

11

Hier om nam abdemelech die mannen mit hem ende ghinc in des conincs huys dat onder den kerker was: ende hi nam van daer oude lakenen ende oude cleder die verrot waren: ende hi lietse mit zelen neder tot iheremiam in den putte.

12

Ende abdemelech seide tot iheremiam den prophete. Legt die oude lakenen ende dese vuyle ghescoerde cleder onder den ellenboghe van dijnen handen: ende op die zelen. Ende iheremias dede also.

13

Ende si toghen iheremias wt mit zelen. ende leeden wt den putte. Ende iheremias bleef int voerhuys des kerkers.

14

Ende die coninc sedechias sende. ende dede iheremiam den prophete tot hem comen ende ter derder doren die in des heren huys was: ende die coninc seide tot iheremiam. Ic vraghe di ene reden: en verberch niet van mij

15

Ende iheremias seide tot sedechiam

[p. *471]

Of ict di boetscap: en sultstu mi niet doden? Ende gheue ic di raet: du en sultste mi niet horen.

16

Ende sedechias swoer al heymelijc iheremiam ende seide. Leeft die here die ons dese ziele gemaect heeft of ic di doen sal: ende of ic di leueren sal in deser mannen hande die dijne ziele zoecken.

17

Ende iheremias seide tot sedechiam. Dit seit die here van den scaren god van israhel. Ist dattu wech tijtste ende wt gaetste ten princen des conincs van babilonien so sal dine ziele leuen: ende dese stat en sal niet verbrant worden mitten vyere: ende du sultste behouden wesen du ende dijn huys

18

Mer ist dattu niet wt en gaetste ten princen des conincs van babilonien. soe sal dese stat gheleuert worden inder caldeeuscher hant ende si sullense verbernen mitten vyere: ende du en sultste niet ontvlien van haren handen.

19

Ende sedechias seide tot iheremiam. Ic bin besorcht om die ioden die ouer gheulogen sijn ten caldeeuschen: dat ic machschien in haren handen geleuert worden mochte ende dat sij mij bespotten souden.

20

Ende iheremias antwoerde hem. Si en sullen di niet leueren. Ic bidde di hoer des heren stemme die ic tot di spreke: ende di sal wel wesen ende dijne ziele sal leuen

21

Ende en wiltstu niet wtgaen: soe is dit die redene die mij die here vertoecht heeft.

22

Sich alle die wijuen die ghebleuen sijn in des conincs huys van iuda sullen wt gheleit worden ten princen des conincs van babilonien: ende sij sullen segghen. Dijne paeyselike mannen hebben di verleit ende sijn te bouen comen teghen di: si hebben dijne voeten ghesteken in den slijcke ende in die glatheit: ende sijn van di wech ghegaen.

23

Ende alle dijne wijuen ende dijn kinder sullen gheleet werden ten caldeeuschen ende du en sultste niet ontvlien haren handen: mer du sultste gheuanghen worden in des conincs van babilonien hant: ende hij sal dese stat verbernen mit den vyer.

24

Ende hier om seide sedechias tot iheremias. Niemant en weet dese woerden: ende du en sultste niet steruen.

25

Ende ist dat die princen horen dat ic mit di ghesproken hebbe. ende comense te di ende segghen di: segt ons wattu mitten coninc ghesproken hebste en heels ons niet. ende wij en sullen di niet doden: ende wat die coninc mit di gesproken heeft:

26

so sultstu tot hem seggen. Ic dede ter aerden mijne bedinghe voer den coninc: dat hi niet ghebieden en soude mij weder te leyden in ionathas huys ende ic daer steruen soude.

27

Hier om quamen alle die princen te iheremiam ende si vrageden hem Ende hi sprac hem na alle die woerden die hem die coninc beuolen hadde. Ende si ghinghen wech van hem. Want niet en was daer ghehoert.

28

Ende iheremias bleef in dat voerhuys vanden kerker: tot den daghe dat iherusalem ghewonnen was: ende het gheuiel datmen iherusalem winnen soude