Bible in duytsche (Delftse bijbel 1477)

§ Capittel .xxxvij.

1

ENde die coninc sedechias iosias soen regneerde ouer iechonias ioachims sone dien nabugodnosor dien coninc van babilonien coninc setrede in dat lant van iuda:

2

ende hi ende sijn knapen ende dat volc vanden lande en waren niet ghehoarsaem des heren woerden die hi sprac in iheremias des propheten hant.

3

Ende die coninc sedechias sen-

[p. *469]

de iuthal selemias sone ende sophoniam maasias sone den priestere tot iheremiam den prophete ende seide. Bidde ouer ons den here onsen god.

4

Ende iheremias wanderde vrijlic in midden dat volc. Want si en hadden hem niet geleit in hueden vander kerker. Pharaons heere quam aldus wt egipten: ende doe die caldeeusche die iherusalem omleit hadden dese boodscap hoerden. soe toghen si wech van iherusalem

5

Ende des heren woert wort gedaen tot iheremiam den prophete ende hi seide.

6

Dit seit die here god van israhel Dus suldi seggen den coninc van iuda die v gesent heeft te mi om te vraghen. Siet pharaons heer dat wt ghecomen is v te helpen. sal wederkeren in sijn lant in egipten:

7

ende die caldeeusche sullen weder comen ende striden iegen dese stat: ende winnense ende onstekense mitten vyere

8

Dit seit die here. En wilt uwe zielen niet bedriegen segghende. gaende sullen si wech trecken die caldeeusche ende van ons wech gaen: want si en sullen niet wech gaen.

9

Mer ende al waert dat gij versloecht alder caldeuscher heer die ieghen v striden. ende worden enighe van hem luden ghewont gelaten: elke sullen opstaen wt hare tenten: ende onsteken dese stat mitten vyer.

10

Doe aldus der caldeeuscher heer wech ghetoghen was van iherusalem om pharaons heer wille.

11

so ginc iheremias wt iherusalem dat hi gaen soude in benyamins lant: ende dat hij daer delen soude sine possessie voer des poorters aensichte

12

Ende doe hi ghecomen was te benyamins poorte so was die wachter der poorten bij behoerten die hete iherias selemias sone die ananias sone was: hi venc iheremiam den propheet ende seide. Du vliegheste totten caldeeuschen.

13

Ende iheremias antwoerde. Dat is valsch: ic en vlieghe ten caldeeuschen niet. Ende hij en hoerde hem niet: mer iherias venc iheremiam: ende leuerden totten princen.

14

Om dese dinghen worden die prncen gram ieghen iheremiam: ende sloghen ende senden inden kerker die was in ionathas des scriben huys Want hi was gheordineert bouen den kerker.

15

Ende aldus ginc iheremias in thuys der nauwer diepheit ende inden kerker: ende iheremias sat daer veel daghen

16

Ende die coninc sedechias sende daer om. ende haelden wt: ende hi vragede hem al heymelike in sijn huys: ende seide. Waenstu yet of enich woert is vanden here? Ende iheremias seide. Iaet. Ende hi seide Du sultste gheleuert worden in des conincs hant van babilonien.

17

Ende iheremias seide totten coninc sedechiam Wat heb ic di misdaen ende dinen knapen ende dinen volke: dat gi mi ghesent hebt in thuys vanden kerkere?

18

Waer sijn nv uwe propheten die v propheteerden ende seiden? Die coninc van babilonien die en sal op v niet comen ende op dit lant?

19

Nu hier om bidde ic di mijn here coninc hore. Mijn bede vermoge in dinen aenscouwen: ende en sende mi niet weder in ionathas des scriben huys dat ic daer niet en sterue.

20

Hier om beual die coninc sedechias datmen iheremiam leueren soude in dat voer-

[p. *470]

huys vanden kerker: ende datmen hem alle daghe een broet gaue sonder dat pot eten datmen hem daer toe gheuen soude: tot dat alle die broede vander stat verteert sijn souden. Ende iheremias bleef in dat voerhuys vanden kerker