Bible in duytsche (Delftse bijbel 1477)

§ Capittel .xxxv.

1

DAt woert dat vanden here gedaen was tot iheremiam in ioachims iosias soens daghen des conincs van iuda segghende.

2

Ganc totter rechabiten huys ende spreec hem: ende du sultstese leden in sheren huys in een vanden tresoer cameren: ende du sultste hem gheuen drincken wijn.

3

Ende ic nam mit mij iechoniam iheremias sone die absamas sone was. ende alle sijn bruederen ende sijn sonen ende alle dat huys vanden rechabiten:

4

ende ic hebse ingeleet in thuys des heren te annans kinderen tresoer cameren die iezedelie gods mans sone was. die neuen der princen tresoer was bouen maasias sellums soens tresoer: die die huedere was van dier cameren.

5

Ende ic settede voer die kinder huys vanden rechabiten. nappen ende scalen al vol wijns: ende ic seide tot hem. Drinct wijn.

6

Si antwoerden. Wi en sullen ne ghenen wijn drincken: want ionadab rechabs soen onse vader heeft ons beuolen segghende. Ghi en sult ghenen wijn drincken ghi noch v kinderen nemmermeer.

7

Ende gi en sult geen huys stichten. ende ghi en sult gheen saet saeyen ende gi en sult ghenen wijngaert planten noch hebben: mer alle uwe daghen suldi wonen in tabernaculen: dat ghi leuen moghet vele dagen op dat aensichte vanden lande daer ghi pelgrimagie in duet

8

Hier om hebben wi onderhorich geweest ionadab rechabs soens ons vaders stemmen in allen dien dat hi ons beual: alsoe dat wi ghenen wijn en droncken in allen onsen daghen wij ende onse wiuen ende

[p. *466]

onse dochteren.

9

ende wi en hebben ne ghene huse ghemaect in te wonen: ende wijngaert ende acker ende saet en hebben wi niet ghehadt:

10

mer wi hebben ghewoent in tabernaculen: ende wi hebben ghehoersaem gheweest na alle dat ionadab onse vader beuolen heeft.

11

Ende doe nabugodonosor die coninc van babilonien opgecomen was te onsen lande soe seiden wi. Coemt ende gae wij in iherusalem vanden aensichte des heers. vanden caldeeuschen ende vanden aensichte des heers van syrien: ende wi sijn ghebleuen in iherusalem.

12

Ende des heren woert wort tot iheremiam gedaen segghende.

13

Dit seit die here vanden scaren god van iseahel. Ganc ende seg den mannen van iuda ende den ghenen die in iherusalem wonen. En suldi niet discipline ontfaen: dat gi minen woerden ghehoersaem sijt seit die here?

14

Ionadabs rechabs soens woerden sijn te bouen gebleuen die hi sinen kinderen beual dat si ne genen wijn drincken en souden ende si en hebben tot desen daghe ne ghenen wijn ghedroncken: want sij hebben ghehoersaem gheweest haers vaders gheboden. Ende ic heb v toe ghesproken van des morghens opstaende ende sprekende: ende gi en hebt mi niet gehoersaem gheweest

15

Ende ic hebbe tot v ghesent alle mine knechten die propheten in die dagheraet opstaende: ende sendende ende seggende Elc worde bekeert van sinen alten quaden weghe ende make uwe arensticheden guet: ende en wilt niet volghen vreemde goden ende en oeffentse niet: ende ghi sult wonen in dat lant dat ic v ghegeuen hebbe ende uwen vaders. Ende ghij en hebt v oer niet nederwaert geneicht: noch en hoerde mi niet.

16

Ionadabs kinder die rechabs sone was maecten dus vast haers vaders ghebot dat hij hem beuolen hadde: mer dit volc en heeft mi niet ghehoersaem geweest.

17

Hier om seit dit die here vanden scaren god van israhel. Siet ic sal brenghen op iudam ende op alle die ghene die in iherusalem wonen alle die quellinghe die ic ghesproken heb ieghen hem: om dat ic teghens hem ghesproken heb ende si en hoerdens niet: ic riep ende si en antwoerden mij niet.

18

Ende iheremias seide totten huys vanden rechabiten. Dit seit die here vanden scaren god van israhel. Om dat gi gehoersaem sijt gheweest ionadabs uwes vaders ghebot. ende om dat ghi alle sine gheboden ghehuet ende hebt gedaen al dat hij v beual:

19

hier om seit dit die here vanden scaren god van israhel Die man van ionadabs rechabs soens sade en sal niet ghebreken die tot allen daghen staen sal in minen aenscouwen.