Bible in duytsche (Delftse bijbel 1477)

§ Capittel .xxxiiij.

1

EEn woert dat vanden here ghedaen was tot iheremiam: doe nabugodonsor die coninc van babilonien ende alle sijn heer ende alle die riken vander werelt die onder sijne macht waren. ende alle volc streden ieghen iherusalem ende ieghen haer poerte ende hi seide.

2

Dit seit die here god van

[p. *464]

israhel. Ganc ende spreec tot sedechiam den coninc van iuda: ende du sultste tot hem segghen. Dit seit die here Sich ic sal dese stat leueren in des conincs hant van babilonien: ende hi salse ontsteken mitten vyer.

3

Ende du en sulste niet ontvlien wt sijnre hant. mer mit begripenen sultstu gheuaen worden ende du sultste in sijn hant gheleuert worden: ende dijne oghen sullen des conincs van babilonien oghen sien. ende sijn mont sal mit dijnen mont spreken: ende du sultste in babilonien gaen.

4

Mer nochtan sedechia coninc van iuda hore des heren woert. Dit seit die here tot di. Du en sultste niet steruen inden zwaerde:

5

mer du sultste in paeyse steruen: ende nader verberninghe dijnre vaderen der eerster coninghen die voer di gheweest hebben alsoe sullen sij di verbernen. ende sij sullen di bewenen wee here: want dit woert heb ic gesproken seit die here.

6

Ende iheremias die propheet sprac alle dese woerden in iherusalem tot sedechiam den coninc van iuda.

7

ende des conincs heer van babilonien street teghens iherusalem: ende ieghen allen die steden van iuda die ouerbleuen waren ieghen lachis ende ieghen azecha. Want dese twe gemuerde steden waren gebleuen van den steden van iuda.

8

Een woert dat van den here ghedaen was tot iheremiam na dien dat die coninc sedechias belofte ghesleghen hadde mit alden volke in iherusalem ropende

9

dat elc man laten soude sijnen dienstknecht ende dienst ioncwijue die hebreeusche waren te vrijheden: ende dat si en gheen heerscappie bouen hem hebben en souden dats te verstaen inden iode ende sijnen brueder

10

Dus hoerden alle die princen ende alle dat volc die dese beloften aenghegaen hadden. dat elc man laten soude sinen dienstknecht ende elc man sijn dienst ioncwijf vri: ende dat si voertmeer bouen hem neghene heerscappie hebben en souden. Dus hoerden sijt: ende sij lietense gaen

11

Ende daer na keerden sij hem ende togen weder aen hem haer dienstknechten ende haer dienst ioncwijuen die si ter vriheit ghelaten hadden: ende dadense hem onder in knechten ende in ioncwijuen.

12

Ende des heren woert wort van den here tot iheremiam ghedaen ende hi seide.

13

Dit seit die here god van israhel. Ic sloech belofte mit uwen vaderen: in dien daghe dat icse wt den lande van egipten leide wt den huyse des dienstes ende seide.

14

Als seuen iaer veruolt sullen wesen. so sal elc laten gaen sijnen brueder die hebreeusche die hem vercocht is: ende hi sal di ses iaren dienen: ende du sultsten laten gaen vri van di. Ende uwe vaderen en hoerden mi niet: noch en hielden hare ore nederwaert.

15

Ende ghi sijt huden bekeert ende hebt gedaen dat recht is in mijnen oghen. dat ghy gheropen hebt die vriheit elc te sijnen vrient waert: ende ghi hebt belofte aen gegaen in mijnen aenscouwen int huys daer mijnen name in aen gheropen is

16

Ende ghi sijt weder bekeert ende hebt mijnen name besmet: ende elc heeft weder ghehaelt sijnen dienstknecht ende elc sijn ioncwijf die ghij ghelaten had dat sij vri wesen souden ende haer macht

[p. *465]

ende ghi hebtse tonder ghedaen dat si sullen sijn dienstknecht ende ioncwiue.

17

Hier om seit die here. Ghi en hebt mij niet ghehoert: dat ghi die vriheit ghebieden soudt elc sijnen brueder ende elc sijnen vrient. Siet soe gebiede ic seit die here die vryheit ten zwaerde ende ter sterften ende ten honger ende ic sal v gheuen in een berueringhe allen riken der werelt

18

Ende ic sal gheuen die mannen die mijne belofte breken. ende die niet ghehouden en hebben die woerde der beloeften daer si consent toe gheuen in mijnen aenscouwen: dat calf dat si sloghen in tween delen ende leden ouer tusschen die tween delen.

19

die princen van iuda ende die princen van iherusalem. die ghelubde camerlingen die priesteren ende alle dat volc vanden lande die ouerleden tusschen die delinghen vanden calue:

20

ende ic salse gheuen in haerre vianden hant ende inder gheenre hant die haer ziele zueken: ende haer croendie sal wesen spise der voghelen des hemels ende den beesten der aerden

21

Ende sedechiam den coninc van iuda ende sijne princen sal ic gheuen in die hant haerre vianden. ende in die hant die haer zielen sueken: ende in die hant des heers des conincs van babilonien die van v wech ghegaen sijn.

22

Sich ic beueelt seit die here: ende ic salse weder bringhen in dese stat ende si sullenre ieghen striden: ende si sullense winnen ende ontstekense mitten vyer. Ende dese steden van iuda sal ic gheuen in wildernissen om datter nyemant in wonen en sal.