Bible in duytsche (Delftse bijbel 1477)

§ Ca .xxxiij

1

ENde des heren woert wort anderwerf gedaen tot iheremiam: doe hi noch besloten was in dat voerhuys vanden kerker ende hi seide.

2

Dit seit die here die dat doen sal ende formeren sal ende bereden: die here is sijn name.

3

Roept aen mij ende ic sal di ghehoren. ende ic sal di grote dinghen boetscappen ende vaste die du niet en weetste

4

Want dit seit die here god van israhel tot den huyse van deser poerte ende tot des conincs van iuda huysen die ghedestrueert sijn. ende ten bolwercke ende ten zwaerde

5

der gheenre die comen om te stridene mitten caldeeuschen ende dat sijse veruollen sullen mit croendien van menschen dien ic gheslaghen hebbe in mijnen toren ende in mijnre onwaerdicheit: mijn aensichte verberghende van deser stat om al haer quaetheit.

6

Siet ic sal hem ouer trecken dat litteyken ende die ghesontheit. ende ic salse genesen: ende ic sal hem openbaren bedinge des paeys ende der waerheit.

7

Ende ic sal bekeren die bekeringe van iuda ende die bekeringhe van iherusalem. Ende ic salse stichten als vanden beghinne:

8

ende ic salse suueren van alre quaetheit daer si mij in ghesondicht hebben. Ende ic sal guedertieren wesen alle hare quaetheden daer si mi in misdaen hebben ende veronwaert.

9

Ende si sullen mi wesen in enen name ende in blijscappen ende in loue ende in vrouden allen den heydenen der werelt die horen sullen alle dat guet dat ic hem doen sal: ende sij sullen hem veruaren ende verstoert worden in alden gueden ende in alden paeyse die ic hem geuen sal.

10

Dit seit die here. Noch sal men horen in dese stat die ghi segt datse woest is om datter ne gheen mensche noch vye en is inden steden van iuda ende inden doeren van iherusalem die verderft sijn sonder mensche ende sonder yemant die daer in woent ende sonder vye.

11

die stemme van blijscappen ende die stemme van vrouden des brudegoms stemme ende der bruuts stemme der gheenre stemme die segghen sullen beliet ende loeft den here vanden scaren want die here is guet. want inden eweliken is sijne ontfermherticheit: ende die hare beloften bringen sullen in des

[p. *463]

heren huys. Want ic sal weder bringen die bekeringhe vanden lande als van den beginne seitdie here.

12

Dit seit die here vanden scaren. Noch sal wesen in dese woeste stat sonder menschen ende sonder vye. ende in al horen steden woninghen van herden ende van legghenden cudden

13

inden steden vanden montaenge ende inden steden vanden slechten lande: ende inden steden die ten suden waert sijn ende in benyamins lant ende al omme ende om iherusalem ende inden steden van iuda: noch sullen doer liden die cudden tot des gheens hant diese tellen sullen seit die here.

14

Siet die daghen sullen comen seit die here: ende ic sal verwecken een guet woert dat ic ghesproken heb ten huyse van israhel ende ten huyse van iuda.

15

In dien daghen ende in dien tiden sal ic dauid doen groeyen een saet der gherechticheit: ende hi sal doen vonnisse ende gherechticheit inden lande.

16

In dien daghe sal iuda behouden worden: ende iherusalem sal betrouweluc wonen. Ende dit is die name dat si hem heten sullen: onse gherechtich here.

17

Want dit seit die here Van dauid en sal die man niet te nyete gaen die sitten sal opten troen des huys van israhel:

18

ende vanden priesteren ende vanden leuiten en sal geen man te nyete gaen van mijnen aensichte die offeren sal holocauste. ende die sacrificie verbranden sal ende offerhande houden in allen daghen.

19

Ende des heren woert wort tot iheremiam ghedaen segghende.

20

Dit seit die here. Ist dat mijne belofte mitten daghe mach te nyete werden. ende mijne belofte mitter nacht so dattet niet en si dach ende nacht in sijnen tide:

21

so sal oec mijne belofte te niet moghen wesen mit dauid mijnen knecht dat van hem niet en si een sone die regneren sal in sijnen troen: ende die leuiten ende die priesteren mijne ministeren.

22

Alsomen niet ghetellen en mach die sterren des hemels ende ghemeten dat sant vander zee: alsoe sal ic dauids mijns knechtes saet menihfoudighen: ende die leuiten mijn dienres.

23

Ende des heren woert wort ghedaen tot iheremiam ende hi seide.

24

En hebstu niet ghesien dat dit volc ghesproken heeft ende gheseit. die twee maechscappen dien die here vercoren hadde sijn of geworpen? Ende si hebben mijn volc veronwaert. om dattet voertmeer voer hem geen volc en si.

25

Dit seit die here. Ist dat ic mijne beloften tusschen den dach ende den nacht ende ic den hemel ende der aerden ne gheen wet gheset en hebbe.

26

so sal ic oec also iacobs saet ende dauids mijns knechts verwerpen: dat ic niet aen nemen en sal van sijnen sade die princen van abrahams ende ysaacs ende iacobs sade. Want ic sal bekeringhe weder bringhen ende hems ontfermen