Bible in duytsche (Delftse bijbel 1477)

§ C .xxxij

1

DAt woert dat iheremias ghedaen was vanden here in sedechias des conincs van iuda thiende iaer: dat is dat achthienste iaer nabugodonors.

2

Des conincs van babilonien heere hadde doe iherusalem beleit: ende iheremias die prophete was besloten in dat voerhuys vanden kerker die was in des conincs van iuda huys.

3

Want sedechias die coninc van iuda hadden daer besloten ende seide. Waer omme propheteerstu segghende dit seit die here. siet ic sal dese stat gheuen in des conincs van babilonien hant ende hi salse verwinnen:

4

ende sedechias die coninc van iuda en sal niet ontvlien wt der caldeeuscher hant mer hi sal geleuert worden in des conincs van babilonien hant: ende sijn mont sal spreken mit des conincs monde. ende sijne ogen sullen des conincs ogen sien

5

ende hi sal sedechiam voeren in babilonien. ende hi sal daer sijn tot dat ic babilonien visenteren sal seit die here: want ist dat gi stridet ieghen die cal-

[p. *460]

deusche. ghi en sult gheen voorspoet hebben?

6

Ende iheremias seide. Des heren woert is te mij ghedaen segghende

7

Sich ananehel sellum dijns oems sone sal tot di comen ende segghen. Coep di mijnen acker die is in anathot. Want di behoert toe dien te copene van naer heden.

8

Ende ananehel mijns oems sone quam te mi na des heren woert ten voerhuse vanden kerker: ende hi seide tot mij. Coept mijnen acker die in anathot is in benyamins lant: want di behoert die erueachticheit toe ende du biste die naeste dattuse besitten ende copen moetste. Ende ic verstont dattet des heren woert was.

9

Ende ic cochte den acker van ananehel mijns oems sone die in anathot is. Ende ic woech hem dat siluer seuen stateren. ende thien silueren penninghen.

10

ende ic screef in enen boec ende ic beteikendet: ende ic nammer oerconde ouer. Ende woech hem dat siluer in ene waghescale:

11

ende ic ontfinc enen bezegelden boec vander possessien ende dat ouergheuen mitten halme ende die vastheden ende die teykenen van buyten.

12

Ende ic gaf den boec ofte den brief vander possessien baruch nerie soen die maasias sone was voer ananehels mijns oems soens oghen. ende voer der oerconden oghen die inden brief vanden cope ghescreuen waren: ende voer alder ioden oghen die in dat voerhuys vanden kerker saten.

13

ende ic beual baruch voer hem allen: ende seide.

14

Dit seit die here vanden scaren god van israhel. Neem dese brieuen desen gheteykenden brief vanden coep ende desen brief die open is: ende legtse in enen aerdenen pot dat sij vele daghen duren mogen.

15

Want dit seit die here van den scaren god van israhel. Noch salmen besitten in desen lande huse ende ackers ende wijngaert.

16

Ende ic bidde ten here na dien dat ic gheleuert hadde baruch nerie soen den brief vander possessien ende ic seide.

17

Ach. ach. ach here god Sich du makedste hemel ende aerde in dine grote starcheit: ende in dijnen wtghestekenen arme. Di en sal niet pijnlijc wesen elc woert

18

die ontfermherticheit doet in dusentighen: ende die gelste der vadere quetheden in hare kindere scoot na hem alre starcste groot ende machtich. here vanden scaren is dijn name.

19

du biste groet in rade onbeuanghelijc inden ghepense: wies oghen ontdaen sijn op alle die weghen van adams kinderen. so dattu gheldes elken na sinen wegen. ende na die vrucht sijnre visieringhen:

20

die deetste teykenen ende wonder int lant van egipten tot in desen daghe ende in israhel ende inden menschen: ende du hebtste di ghemaect enen name aso dese dach is.

21

Ende du leedeste dijn volc van israhel wt den lande van egipten in teykenen ende in wonderen ende in vromer hant ende in wtghestekenen arme ende in groten anxte:

22

ende du gaefste hem dit lant dattu ghesworen hadste haren vaders. datuut hem geuen soudes dat lant vloeyende van honich ende van melc:

23

ende si quamenre in ende besatent Ende si en waren niet ghehoersaem dijnre stemmen. ende si en wandelden in dijne wet niet: al dattu hem beuaelste te doen en deden si niet: ende alle dese

[p. *461]

quade dinghen sijn op hem ghecomen.

24

Sich wijch husen sijn ghemaect ieghen dese stat datmense winnen sal: ende die poerte is ghegheuen inder caldeeuscher hant dier ieghen striden vanden aenschijn des zwaerts ende des hongers ende der sterften: ende alle dattu gesproken hebste dat is geschiet altstu seitste.

25

Ende du seides mij here god. coep den acker mit siluere ende nemmer oerconde ouer: als die poert ghegheuen is inder caldeeuscher hant?

26

Ende des heren woert wort tot iheremiam ghedaen seggende.

27

Sich ic bin die here god van allen vleysche. Sal mi alle woert pijnlijc wesen te doen?

28

Hier om seit dit die here. Siet ic sal dese stat leueren inder caldeeuscher hant ende in des conincs hant van babilonien ende hi salse winnen:

29

ende die caldeeusche die striden ieghen dese poerte sullen coemen. ende sullense ontsteken mitten vyer ende verbarnense: ende die huyse in welke wtlaten sij sacrificeerden baal. ende offerden den vreemden goden verssche offerhande om mi te veronwaerden ende te gramscapen te verporren.

30

Want die kinder van isiahel ende die kinder van iuda waren eenpaerlijc quaet doende in mijnen oghen van haerre ioncheit. die kinder van israhel die mi tot nv verenwaerden inden wercken van haren handen seit die here:

31

want dese stat is mi geworden in gramscappen ende in mine onwaerdicheit van dien daghe dat sijse stichten tot desen dage dat si wech ghedaen sal werden van mijnen aensiene.

32

om die quaetheit der kinder van israhel ende der kinder van iuda die si daden mi te gramscappen te wecken: sij ende haer coninghen hare princen ende priesteren ende propheten die mannen van iuda ende die in iherusalem woenden.

33

Ende si keerden te mij waert hare rugghen ende mit haer aensichten: als icse vroech leerde ende instrueerde: ende sijs niet horen en wilden dat sij discipline ontfaen souden.

34

Ende si setteden haer afgoden int huys daer mijn name in aengheropen is om dat sijt besmetten souden:

35

ende stichten baals hoecheden die sijn in ennons soens valeye. dat si haer sonen ende haer dochteren offeren souden moloch dat ic hem niet en beual noch en quam niet op in mijn herte dat sij dese ouwaerdicheit doen souden ende datse iudam in sonden leden sonden

36

Ende nv om dese dinghen seit die here van den scaren te deser stat: daer gi of segt dat si geleuert worden sal in des conincs hant van babilonien inden zwaerde in den hongher ende in sterften.

37

Siet ic salse vergaderen van allen landen daer icse toe verdreef in mijne gramscap ende in mijnen toren ende in mine grote onwaerdicheit: ende ic salse weder brenghen te deser stat ende ic salse betrouwelijc doen wonen:

38

ende ic sal hem in god wesen ende si sullen mij in volc wesen.

39

Ende ic sal hem geuen een hert. ende enen wech dat si mij ontsien sullen alle die daghen: ende dat hem wel si ende haren kinderen na hem

40

Ende ic sal hem setten ewelike beloften ende ic en sal niet laten hem wel te doen: ende ic sal mijne vrese gheuen in haer herten dat si van mi niet wech

[p. *462]

gaen en sullen:

41

ende ic sal op hem verblijden als ic hem sal welghedaen hebben Ende ic salse in desen lande planten in waerheden in al mijn herte ende in al mijn ziele.

42

want dit seit die here. Also ic op dit volc gebracht hebbe al dit grote quaet: also sal ic op hem brenghen al dat guet dat ic tot hem spreke.

43

Ende men sal die ackers besitten in desen lande daer ghi of segt dattet gelaten ende woest is om datter ne gheen mensche noch beest ghebleuen en is: ende dattet ghegeuen is inder caldeeuscher hant.

44

Men sal ackers mit ghelde copen ende men salse scriuen inden brief. ende men salre enen zeghel aen doen ende men salre daer oerconde ouer nemen in benyamins lant ende al om ende om iherusalem in die steden van iuda ende inden steden vanden montanen ende inden steden vanden slechten lande ende inden steden die ten suden waert sijn: want ic sal haer geuanghenisse keren seit die here