Bible in duytsche (Delftse bijbel 1477)

§ Ca .xxxi

1

IN dien tiden seit die here. so sal ic allen den maechscappen van israhel god wesen: ende sij sullen mi wesen in volke.

2

Dit seit die here. Dat volc dat ghebleuen was in der wildernissen vanden zwaerde. vant gracie: Israhel gae verre te sijnre rusten.

3

Die here openbaerde mij. Ende in eweliker minnen minnede ic di. hier om heb ic ontfermende di aen mij ghetoghen.

4

Ende ic sal di weder stichten ende du sultste werden ghesticht maghet van israhel. Noch sultstu verciert worden mit dijnen tamburen: ende du sultste wtgaen inden dans der gheenre die spelen sullen.

5

Noch sultstu wijngaert planten inden berghen van samarien. Si sullen plantinghe planten: ende si en sullen die wijnbesien niet lesen voer dat die tijt comen sal:

6

want een dach sal wesen daer die wachters in ropen sullen inden berghen van samarien ende in effrayms berch. Staet op ende gae wi op in syon ten here onsen god:

7

want dit seit die here. Verblijt in iacobs blijscap: ende nyest iegen dat hoeft vanden heydenen: roept singhet ende segt. Here behoude dijn volc dat ouerblijue van israhel.

8

Siet ic salse brenghen vanden lande van noerden: ende ic salse vergaderen vanden eynden der werelt: onder die welke wesen sullen die blinde ende die cropel ende vrouwen die kinder draghen ende ghebaren te gadere een grote scare die harwaert weder keren sullen.

9

In gheween sullen si comen: ende ic salse in ontfermherticheden beleiden Ende ic salse brengen doer doerschietende riuieren van wateren in enen rechten wech ende sij en sullen hem daer in niet stoten: want ic bin israhel gheworden een vader: ende effraym is mijn eerst geboren soen.

10

Ghi heydene hoert des heren woert. ende boetscapt inden eylanden die verre sijn. ende segt. Die israhel ghestoert heeft die salse vergaderen: ende hi salse hueden also een herde sijn cudde huedet.

11

Want die here heeft iacob verlost: ende hi heeften verlost van des gheens hant die machtigher was.

12

Ende si sullen comen ende sullen lof gheuen inden berch van syon ende sij sullen vergaderen tot des heren guede guede vruchten. op die tarwe ende wine ende olye. ende ter dracht vanden scapen ende vanden beesten ende vanden vye: ende haer ziele sal wesen als een veruersschende coelhof: ende hem en sal voertmeer niet hongheren.

13

Dan sal

[p. *458]

die maghet verbliden inden dans: die ionghelingen ende die oude lude te gadere. Ende ic sal haer gheween verkeren in blijscap: ende ic salse vertroesten: ende verblijden van haren rouwe.

14

Ende ic sal der priesteren zielen veruollen mit vetheden: ende mijn volc sal veruolt worden van mijnen gueden dinghen seit die here.

15

Dit seit die here. Die stemme is ghehoert inden hoghen dat gheween ende dat ghescrey vanden geween rachel die haer kinder beweent. ende die op hem niet vertroest werden en wilt: want sij en sijn niet.

16

Dit seit die here Dijn stemme rust haer van gheween ende dijn oghen van tranen: want tis loen van dijn werc seit die here. Ende si sullen wederkeren van haers viants lande.

17

ende dinen achtersten is hoep seit die here: ende dijn kinderen sullen wederkeren te haren terminen.

18

Horende heb ic ghehoert effraym oueruarende Du hebste mij ghecastijt here: ende ic bin gheleert als een onghetemt volen Bekere mij ende ic sal wederkeren: want du biste die here mijn god.

19

Want na dien dattu mij bekeres soe heb ic penitencie gedaen: ende na dien dattu mij toghes soe heb ic mijne dye gheslegen Ic bin confuus geworden ende scaemde mij: want ic heb ghedoecht den lachtere mijnre ioncheit.

20

Is effraym mi een eerlijc sone: is hi een teder kint: want van dier tijt dat ic van hem ghesproken hebbe soe sal ic noch sijns gedencken. Hier om sijn mijne inaderen om hem verstoert: ontfermende sal ic sijns ontfermen seit die here.

21

Rechte di een hoge stat om te wachtene: sette di bitterheden. Beleede dijn herte inden rechten wech: daer du in wandels Maghet van israhel kere weder keer weder te desen dijnen steden

22

vlochtighe dochter hoe langhe sultstu verleidet worden van weeldicheden? Want die here heuet een nyewe dinc gescepen op dat lant een wijf sal enen man omwinden.

23

Dit seit die here vanden scaren israhels god. Noch sullen sij dit woert segghen in dat lant van iuda ende in sijnen poerten: als ic hare gheuangenisse bekeren sal. Die here moet di gebenedien schoenheit der gherechticheit heylich berch.

24

Ende in dien berghen sullen wonen iudas ende alle sijne steden te gadere die lant wennen: ende die cudden driuen sullen:

25

want ic heb veruolt dijne moede ziele: ende alle zielen die hongher hadden heb ic ghesaet.

26

Hier om ben ic ghewect als van enen slape ende ic sach: ende mijn slaep was mij suete.

27

Siet die daghen sullen comen seit die here: ende ic sal saeyen dat huys van iuda mit menschen sade ende mit beesten sade

28

Ende also ic op hem waecte dat icse verdriuen ende verderuen ende sceiden ende stroeyen soude ende quellen: also sal ic op hem waken dat icse stichten ende planten sal seit die here.

29

In dien dage en sullen si nemmermeer segghen.Die vaders aten die suere druuen ende der kinder tanden worden sleeuwe:

30

mer elc sal sijnre quaetheit steruen. Elc mensche die eten sal suete druuen: sijn tanden sullen versleeuwen.

31

Siet die daghen comen seit die here. ende ic sal

[p. *459]

setten den huse van israhel ende den huyse van iuda ene niewe belofte.

32

Niet na die belofte dien ic mit haren vaders settede in dien daghe dat ic hare hant begreep dat icse wt den lande van egipten leiden soude: die belofte die sij te nyete gemaect hebben ende doe ic heerscappie bouen hem hadde seit die here

33

mer dit sal die belofte sijn dien ic setten sal mit den huyse van israhel. Na dien daghe seit die here sal ic mijne wet geuen in haren binnensten inaderen: ende in haer herte sal icse scriuen: ende ic sal hem wesen in god: ende sij sullen mi wesen in volke

34

Ende si en sullen voertmeer niet leren. een man sijnen naesten. ende een man sijnen brueder segghende: bekenne den here. Want si sullen mi alle kennen vanden meesten tot den minsten seit die here: want ic sal guedertieren worden op hare quaetheden. ende hare sonden en sal ic nemmermeer ghedencken

35

Dit seit die here die gheuet die sonne inden licht vanden dage. ende die ordinancie vander manen ende vanden sterren inden licht vander nacht. die dee zee stormt ende haer vlueden luden. here vanden scaren is sijnen name.

36

Ist dat dese wetten ghebreken voer mi seit die here: dan sal oeck ghebreken dat saet van israhel dat si niet volck voer mij en sijn tot allen daghen.

37

Dit seit die here. Ist datmen sal moghen ghemeten die hemel bouen. ende ondersoeken die fundamenten der aerden beneden: so sal ic oec van mi steken al dat saet van israhel om al dat si gedaen hebben seit die here.

38

Siet die daghen comen seit die here: ende men sal den here die stat stichten van ananehels toerne totter poerten vanden hoecken.

39

Ende si sal wtgaen ouer die regule der maten in sijnen aenscouwen opten berch gareb: ende si ommegaen goatha

40

ende alle die valeye vanden croengien ende die asschen ende alle dat lantscap der doet. totter riuieren cedron ende totten hoecke der oest poerten vanden paerden. Des heren heylich poert en sal niet wtuerdreuen worden: noch voert nemmermeer ghedestrueert worden