Bible in duytsche (Delftse bijbel 1477)

§ Capittel .xxx.

1

DIt woert wort vanden here ghedaen tot iheremiam den prophete ende hi seide.

2

Dit seit die here god van israhel segghende. Scrijf di alle die woerde die ic tot die ghesprken hebbe in enen boec.

3

Want siet die daghen comen seit die here: ende ic sal bekeren mijn volc van israhel ende van iuda bekeringhe seit die here: ende ic salse bekeren ten lande waert dat ic haren vaderen gaf ende si

[p. *456]

sullent besitten.

4

Ende dit sijn die woerden die die here gesproken heeft te israhel ende te iuda:

5

want dit seit die here. Wi hebben ghehoert dat gheluyt van anxte. ende vrese: ende en is ne gheen paeys.

6

Vraghet ende siet ofte een man kinderen baert. Waer om heb ic dan gesien elcs mans hant op sijnen lendene als eens wijfs die in aerbeide leit? Ende dat alle die aensichten verkeert sijn in bleecheit.

7

Wee want die dach is groet ende gheen dach en is dien ghelijct: ende het is die tijt van iacobs vernoey: ende hi sal van hem behouden werden.

8

Ende het sal sijn: in dien daghe seit die here vanden scaren so sal ic sijn ioc breken van dijnen halse: ende ic sal sijn bande ontwee breken Ende voertmeer en sullen die vreemde ne ghene heerscappie bouen hem hebben.

9

mer si sullen dienen den here hare god: ende dauid haren coninc dien ic hem verwecken sal.

10

Hier om du en ontsich di niet iacob mijn knecht seit die here: noch en vrese die niet israhel. Want sich ic sal di behouden van verren lande ende dijn saet vanden lande haerre vanghenissen. Ende iacob sal wederkeren ende rusten: ende oueruloeyen van allen gueden Ende nyemant en sal sijn dien hi ontsien sal:

11

want ic bin mit di dat ic di behouden sal seit die here. Want ic sal een eynde maken in alle den heydenen daer ic di in ghestroeyt hebbe: mer dij en sal ic niet maken in eynden: mer ic sal di castien ende vonnissen om dat di niet duncken en sal dattu sonder misdaet sijtste:

12

want dit seit die here dijn broke en machmen niet genesen: dine wonde is alte quaet.

13

Niemant en is die vonnissen mach dijne vonnisse: om dine quetsure toe te bindene di en is negene oerbaerlijcheit van ghenesinghen.

14

Alle dijne minnaren hebben dijns vergheten: si en sullen di niet sueken. Want ic heb di gheslaghen mit dijns viants wonde: mit fellen castiene. Om die menichte sijnre quaetheit soe sijn dijn sonden hert geworden.

15

Wat beroepstu om dijne droefheit? Dine droefheit is ongeneselijc. Om die menichte dijnre quaetheit ende dijne herde sonden soe heb ic di dese dinghen ghedaen.

16

Hier om alle die gene die di eten. sullen verslint worden: ende alle dijne vianden sullen in gheuanghenisse gheleit worden. Ende alle die dij woesten sullen ghewoest worden. Ende ic sal alle dine rouers gheuen in roue.

17

Want ic sal di dijn litteiken ouerdecke: ende ic sal dij ghenesen van dijnen wonden seit die here. Want si hieten di verworpen syon: dit is si die nyemant en hadde diese wedersochte

18

Dit seit die here Siet ic sal bekeren die bekeringen van iacobs woninghen: ende ic sal ontfermen sijnen daken. Ende die stat sal ghesticht worden in haer hoecheit: ende die tempel sal worden ghefondeert na sijne ordinancie.

19

Ende lof sal wt hem beiden comen ende der gheenre stemme die speelen sullen: ende ic salse menichfoudighen. ende si en sullen niet ghemindert werden: ende ic salse verblijden ende si en sullen niet vermaghert worden:

20

si sullen sijne kinder wesen also si vanden beghinne waren: ende haer scare sal voer mi ge-

[p. *457]

duren. Ende ic sal visiteren ieghen alle die ghene die hem quellen: ende sijne beledere sal wt hem wesen:

21

ende sine prince sal voert comen van midden hem. Ende sal hem toebrenghen: ende hi sal te mi comen. Want wie is dese die sijn herte toe brenghen sal: dat hi mij naken sal seit die here?

22

Ende ghi sult mij sijn in volc ende ic sal v wesen in god.

23

Siet des heren bedrusche is gramscap wtcomende: een vallende vlage si sal rusten op der quader menschen hoeft

24

Die here en sal niet afkeren die gramscap der onwaerdicheit: voer dat hij doen sal ende voldoen dat gepens sijnre herten. Inden achtersten vanden daghen suldi die dinghen verstaen.