Bible in duytsche (Delftse bijbel 1477)

§ Capittel .xxviij.

1

ENde het gheuiel in dien iare in dat beghinsel van sedechias des conincs van iuda rike inden vierden iaer in die vijfste maent: ende ananias azur sone een propheet van gabaon seide tot mi in des heren huys voer den priesteren ende voer alle dat volc segghende.

2

Dit seit die here vanden scaren god van israhel. Ic heb ghebroken des conincs van babilonien ioc.

3

Noch ouer twee iaren van daghen: ende ic sal weder doen brengen te deser stat alle des heren vaten die nabugodonosor die coninc van babilonien wech gheuoert heeft van deser stat: ende die hi ouer geuoert heeft in babilonien.

4

ende iechoniam ioachims sone den coninc van iuda. ende alle die oueruoeringe van iuda die in babilonien ghecomen sijn die sal ic bekeren te deser stat seit die here Want ic sal breken des conincs van babilonien iock.

5

Ende iheremias die propheet seide tot ananiam die propheet inder priester ogen ende in alle des volcs oghen dat in des heren huys stont:

6

ende iheremias die propheet seide. Amen. Die here die moet alsoe doen. Die here moet verwecken die woerden die di gepropheteert hebste: dat die vaten weder gebracht worden in des heren huys: ende alle die oueruoeringe van babilonien te deser stat.

7

Mer nochtan hoer dit woert dat ic in dijnen oren spreke: ende in al des volcs oren.

8

Die propheten die voer di ende voer mij gheweest hebben vanden beginne.ende die propheteerden op vele landen ende op vele riken van stride ende van vernoey ende van hongher:

9

die prophete die ghepropheteert heeft den paeys als sijn woert coemt: so salmen weten dat hi een propheet is dien die here ghesendet heeft in der waerheit.

10

Ende ananias die propheet nam die kethene van iheremias des propheten halse: ende hi bracse ontween.

11

Ende ananias die propheet seide in al des volcs aensiene ende sprac. Dit seit die here. Aldus sal ic ontween breken nabugodonosors des conincs van babilonien ioc om alre lude halse na twee iaer van daghen.

12

Ende iheremias die propheet ginc henen in sijnen wech Ende des heren woert wort gedaen tot iheremiam den prophete na dien dat ananias den prophete ghebroken hadde die kethenen van iheremias des propheten halse segghende.

13

Ganc: ende du sultste tot ananiam segghen. Dit seit die here. Du hebtste die houten kethene te broken ende du sultste daer ouer maken yseren kethenen:

14

want dit seit die here vanden scaren god van israhel Ic heb een yseren ioc gheleit op den hals van alle desen luden dat si dienen sullen nabugodonosor den coninc van babilonien: ende si sullen hem dienen: ende hier en bouen heb ic hem ghegheuen die beesten vanden lande.

15

Ende iheremias die propheet seide tot ananyam den propheet. Hoer ananya. Die here en heuet di niet ghesent: ende du hebtste dit volc doen betrouwen in loghenen

16

Hier om seit dit die here. Sich ic sal di wech senden van den aensichte des lants. Binnen desen iaer sultstu ster-

[p. *454]

uen. Want du hebtste ieghen den here ghesproken.

17

Ende ananias die propheet starf binnen dien iare in die seuende maent.