Bible in duytsche (Delftse bijbel 1477)

§ Capittel .xxvij.

1

INden beghinne van ioachims rike iosias sone des conincs van iuda so wort vanden here dit woert ghedaen tot iheremiam ende seide.

2

Dit seit die here tot mij. Maec di banden ende kethenen ende du sultstese legghen op dijnen hals:

3

ende du sultstese senden tot den coninc van edom ende tot den coninc van moab ende tot den coninc van ammons kinderen ende tot den coninc van tyrus ende tot den coninc van sidonen inder boden hant die comen sijn in iherusalem tot sedechiam den coninc van iuda:

4

ende du sultste hem beuelen dat sij dit tot haren heren spreken. Dit seit die here vanden scaren god van israhel. Dit suldi segghen tot uwen heren.

5

Ic maecte die aerde ende den mensche ende die beesten die sijn op dat aensicht der aerden in mijne grote starcheit. ende mijnen wtghesteken arme: ende ic hebse ghegheuen dien. die ghenoechde in minen oghen.

6

Ende nv hier om heb ic alle dese landen ghegheuen in nabugodonosors des conincs van babilonien mijns knechtes hant: hier en bouen heb ic hem oec ghegheuen die beesten vanden velden dat sij hem dienen sullen:

7

ende alle luden sullen hem dienen ende sinen sone ende sijns soens sonen tot dat die tijt van

[p. *452]

sijnen lande comen sal. Ende hem sullen dienen vele luden ende grote coninghen

8

ende dat volc ende dat rike dat niet dienen en sal nabugodonosor den coninc van babilonien. ende soe wie sijnen hals niet neder en cromt onder des conincs van babilonien iock: ic sal visiteren op dat volc inden zwaerde ende den honger ende in sterften seit die here tot dat icse verdriuen sal in sine hant

9

Hier om en wilt ghi niet horen uwe propheten ende die waersaghers vander voghele sanghe ende die toueraers die v seggen ghi en sult niet dienen den coninc van babilonien:

10

want die propheteerden v loghene om dat sij v varre doen sullen van uwen lande: ende dat si v sullen verdriuen ende dat ghi verderft wort.

11

Mer dat volc dat sijnen hals onder dat ioc doet des conincs van babilonien ende hem dienen sal die sal ic laten in haer lant seit die here. ende sij sullent wennen ende wonenre in.

12

Ende ic sprac tot sedechiam den coninc van iuda na alle dese woerden ende seide. Doet v halse onder des conincs van babilonien ioc: ende dient hem ende sijnen volc: ende ghi sult leuen.

13

Waer om sultstu steruen du ende sijn volc inden zwaerde ende inden hongher ende inden sterften also die here ghesproken heeft tot den volc dat den coninc van babilonien niet dienen en wil?

14

En wilt der propheten woerden niet horen die v segghen ghi en sult den coninc van babilonien niet dienen: want si spreke v loghene

15

Want ic en hebse v niet ghesent seit die here: ende si propheteren loghenachtelijc in mijnen name: om dat sij v verdriuen sullen ende dat ghi verderuen sult beide ghi ende die propheten die v propheteren.

16

Ende ic sprac totten priesteren ende tot desen volke ende seide. Dit seit die here. En wilt niet horen uwer propheten woerde die v propheteren ende segghen: siet des heren vaten sullen weder keren van babilonien nv haestelijc. Want si propheteren v loghene.

17

Hier om en wilter niet horen: mer dient den coninc van babilonien dat ghi leuen moghet Waer om wort dese stat ghegheuen in wildernissen?

18

Ende of si propheten sijn. ende is des heren woert in hem. sij gaen den here vanden scaren ieghen: ende die vaten die ghelaten waren in des heren huys ende in des conincs huys van iuda ende in iherusalem en comen niet in babilonien.

19

Want dit seit die here vanden scaren totten colummen ende totter metaelenre zee ende tot den stapels ende tot den anderen vaten die ghebleuen sijn in dese stat:

20

die nabugodonosor die coninc van babilonien niet wech en voerde doe hi oueruoerde iechoniam ioachims sone den coninc van iuda wt iherusalem in babilonien ende alle die voerbarighe lude van iuda ende van iherusalem.

21

Want dit seit die here vanden scaren god van israhel ten vaten die ghelaten sijn in des heren huys ende in des conincs huys van iuda ende in iherusalem.

22

Si sullen werden ouergheuoert in babilonien: ende sij sullen daer wesen totten daghe haerre visiteringe seit die here. Ende ic salse doen

[p. *453]

weder bringhen: ende weder setten in dese stat.