Bible in duytsche (Delftse bijbel 1477)

§ Ca .xxvi.

1

INden beghinne van ioachims rike iosias sone des conincs van iuda soe wort vanden here dit woert ghedaen tot iheremiam segghende.

2

Dit seit die here Stant op in dat vrijthof van ons heren huys: ende du sultste spreken tot alle den steden van iuda daer wt dat si comen om te aenbeden in des heren huys alle die woerden: die ic di beuolen hebbe dattuse tot hem spreken sultste. En wilts een woert niet achterlaten:

3

of sijt machschien horen moghen ende worden bekeert elc van sijnen quaden weghe. ende dat mij berouwe des quaets dat ic hem pense te doen om die quaetheit van horen aernsticheden.

4

Ende dus sultstu tot hem segghen Dit seit die here. Ist dat ghij niet en hoert so dat ghi wandelt in mine wet die ic v ghegeuen hebbe

5

so dat ghi hoert die woerde mijnre knechten der propheten die ic tot v gesent hebbe des nachts opstaende ende die sendende ende ghi en hebt des niet ghehoert:

6

so sal ic dit huys gheuen gheliken sylo. ende ic sal dese stat geuen in maledictien allen luden der werelt.

7

Ende die propheten ende die priesteren ende alle dat volc hoerden dat iheremias dese woerden sprac in ons heren huys

8

Ende als iheremias voldaen hadde sprekende al dat hem die here beuolen hadde dat hijt spreken soude tot alle den volke: so begrepen die priesteren ende die propheten ende alle dat volc ende seiden. Hi moet die doot steruen.

9

Waer om heeft hi in des heren name ghepropheteert ende heeft geseit: dit huys sal wesen als sylo is. ende dese stat sal woest worden om datter nyemant in wonen en sal? Ende al dat volc vergaderde iegen iheremiam in des heren huys.

10

Ende die princen van iuda hoerden dese woerden: ende si quamen op wt des conincs huys in des heren huys: ende si saten neder in den inganc van des heren nyewe poorten.

11

Ende die priesteren ende die propheten spraken totten princen ende tot alle den volke ende seiden. Dese man is dat oerdel des doots: want hi heeft gepropheteert ieghen dese stat also ghi ghehoert hebt mit uwen oren.

12

Ende iheremias seide tot alle den princen ende tot alle den volke ende seide. Die here heuet mi ghesent dat ic tot desen huyse waert propheteren soude ende te deser stat alle die woerden die ghi ghehoert hebt

13

Nu hier om maect guet alle uwe weghen ende aernsticheden: ende hoert des heren uwes gods stemme: ende den here sal berouwen vanden quade dat hi ieghen v ghesproken heeft.

14

Ende siet ic bin in uwen handen: doet mij dat guet ende gherechtich is in uwen ogen.

15

Mer nochtan suldi weten. ende bekent. Ist dat ghi mi doot. so suldi ounosel bluet leueren ieghen v seluen: ende ieghen dese stat ende iegen die ghene die daer in wonen. Want inder waerheit heuet mij die here tot v ghesent: dat ic

[p. *451]

alle dese woerden spreken soude in uwen oren.

16

Ende die princen ende alle dat volc seide totten priesteren ende den propheten. Dese man en is ne ghene oerdel der doot: want hi heeft tot ons ghesproken in des heren ons gods name

17

Hier om stonden op mannen vanden ouders vanden lande: ende seiden tot alder vergaderinghe vanden volke sprekende.

18

Micheas van morasthin was in ezechias des conincs van iuda daghen een prophete: ende hi seide tot alle den volke van iuda zegghende. Dit seit die here vanden scaren. Men sal syon ackeren als enen acker: ende iherusalem sal wesen in een hoep van stenen: ende die berch van des heren huys in hoecheden van busschen.

19

Verdoemten hier om ter doot ezechias die coninc van iudea ende al iuda? En ontsaghen si den here niet ende baden sijnen aensichte: ende en wert den here niet leet dat quaet dat hi ieghen hem ghesproken hadde? Ende hier omme laet ons niet groot quaet doen ieghen onsen zielen.

20

Het was oec een man die propheteerde in des heren name vryas semei soen van cariathiarim ende hi propheteerde ieghen dese stede. ende ieghen dit lant na alle iheremias woerden.

21

Ende die coninc ioachim hoerde ende alle die machtige van sijnen princen alle dese woerden: ende die coninc sochten om doot te slaen Ende vrias hoerdet ende sorchde. Ende hi vloech ende quam in egipten.

22

Ende die coninc ioachim sende mannen in egipten helnathan achobors sone ende mannen mit hem.

23

Ende si brochten vriam wt egipten: ende sij brochten hem tot den coninc ioachim ende hi versloechen mitten zwaerde: ende hi warp sijnen lichaem wt inden grauen vanden onedelen volke.

24

Dus was aychans saphans sone hant met iheremias datmen hem niet leueren en soude in des volcs hande dat sijne dootslaen souden