Bible in duytsche (Delftse bijbel 1477)

§ Ca .xxv.

1

DAt woert dat tot iheremiam gedaen was van alden volke van iuda inden vierden iaer ioachim iosias sone des conincs van iuda: na dat iechonias ouer gheuoert was in babilonien: dat is dat eerste iaer nabugodonosors des conincs van babilonien.

2

Ende iheremias sprac tot alle den volc van iuda. ende tot alden ghenen die woenden in iherusalem segghende.

3

Vanden derthiensten iaer iosias ammons soen des coniucs van iuda tot desen dage dat is dat drie ende

[p. *448]

twintichste iaer. soe is des heren woert tot mi ghedaen: ende ic heb tot v gesproken des nachts opstaende ende sprekende ende ghi en hebt des niet gehoert.

4

Ende die here heeft tot v ghesendet alle sijne knechten. die propheten in die dagheraet opstaende ende sendende ende gi en hebt des niet gehoert: noch en hebt v oren neder ghehelt om te horen

5

als hi seide. Elc kere weder van sijnen quaden weghe. ende van uwen alte quaden ghepensen: ende ghi sult wonen in dat lant dat die here v gaf ende uwen vaders vanden beginne tot den eynde

6

Ende en wilt niet gaen na vreemde goden dat ghi hem dienen sult ende die aenbeden: noch en verporren mi niet tot gramscap inden wercken van uwen handen ende ic en sal v niet quellen.

7

Ende gi en hebt mij niet ghehoert seit die here: om dat ghi mi te gramscepen verporren soudt in werken van uwen handen in uwen quade.

8

Hier om so seit die here vanden scaren. Om dat ghi mijn woerden niet en hoert:

9

siet so sal ic senden ende nemen te mi alle die gheslachten van noerden seit die here. Ende nabugodonosor die coninc van babilonien mijnen knecht: ende ic salse brenghen op dit lant: ende op die ghene die daer in wonen ende op alle die nacien die daer al omme ende omme sijn: ende ic salse dootslaen ende ic sal dit lant legghen in verwonderen ende in wispelen ende in eweliken verwoestheden.

10

Ende ic sal van hem verliesen die stemme der blijscap ende die stemme der vrouden: des brudegoms stemme ende der bruuts stemme: ende dat ghijluyt der molen ende dat licht der kaerssen.

11

Ende al haer lant sal wesen in wildernisse ende in verwonderen: ende alle dese lude sullen dienen den coninc van babilonien tseuentich iaer.

12

Ende als die tseuentich iaren veruolt sullen wesen. so sal ic visiteren op den coninc van babilonien ende op die luden seit die here haer quaetheit: ende opter caldeeuscher lant: ende ic salse legghen in eweliker wildernissen:

13

Ende ic sal alle mijne woerden brenghen op dat lant die ic teghen dat lant ghesproken hebbe: al dat ghescreuen is in desen boke. als dat iheremyas gheprofeteert heuet ieghen alle heydenen:

14

want si dienden hem alst vele luden waren ende grote coninghen Ende ic sal hem ghelden na haer werken: ende na die daet van haren handen

15

Want aldus seit die here van den scaren god van israhel tot mij. Neem den nap wijns van deser gramscap van mijnen hant: ende du sultste daer of schencken allen heydenen daer ic dij toe senden sal

16

ende si sullen drincken: ende sullen verstoert ende verwoet worden van dat aensicht des zwaerts dat ic onder hem senden sal.

17

Ende ic ontfinc den nap van des heren hant. ende ic schencte allen luden daer mi die her toe sende:

18

iherusalem ende den steden van iuda ende haren coninghen ende haren princen. dat icse gheuen soude in wildernissen ende in verwonderen ende in wispelen ende in maledictien alsoe dese dach is:

19

ende pharaone den coninc van egipten ende sijnen knapen ende sijnen princen ende al sijnen volke:

20

ende ghemeenlijc alden

[p. *449]

coninghen des lants van ausitiden. ende alden coningen van philistijm ende van ascolon ende van gaze ende van accoron ende den ouerbleuen van asothen:

21

van ydumea ende van moab ende van ammons kinderen

22

ende van alden coningen van tyrus ende van alle den coninghen van sydonen ende den coninghen des lants vanden eylanden die ouer die zee sijn

23

ende dedan ende theman ende bus ende hem allen die haer haer ront ommegeschoren hebben.

24

ende allen den coninghen van arabien ende alle den coninghen van westen: die inden wildernissen wonen:

25

ende alle den coninghen van zambri ende alle die coninghen van elaz ende alle den coninghen van meden.

26

ende allen den coninghen van noerden van bi ende van verren: elken ieghen sijnen brueder: ende allen den riken der werelt die op haer aensichte sijn. Ende die coninc sesach sullen na hem drincken.

27

Ende du sultste tot hem segghen. Dit seit die here van den scaren god van israhel. Drinct ende wort droncken: ende wtspuwet ende valt: noch en staet niet op vanden aensicht des zwaerts dat ic onder v senden sal

28

Ende als si den nap niet en willen ontfaen van dijnre hant om te drincken: soe sultstu segghen tot hem. Dit seit die here van den scaren. Drinckende suldine drincken.

29

Want siet ic beghin te quellene die stat daer minen naem in aengheropen is: ende suldi als onnosel lude ommegheringhet bliuen? Ghi en sult ongheringhet niet blijuen. Want ic roep dat zwaert op alle die int lant wonen: seit die here vanden scaren.

30

Ende du sultste tot hem propheteren alle dese woerden ende du sultste tot hem seggen: Die here sal vanden hoghen gheruchte maken: ende hi sal van sijnre heyligher woninghe sine stemme gheuen. Briesschende sal hi briesschen op sine schoenheit Men sal gheroep ropen als die ghene doen die die wijndruue treden in die wijn persse ieghen alle die gene die int lant wonen.

31

Dat gheluyt is comen totten eynden vander werelt. want die here sal wesen vonnissen mitten luden. Ende hi wort geuonnist mit sijnen vleysche Die onghenadighen heb ic den zwaerde gheleuert seit die here.

32

Dit seit die here vanden scaren. Siet quellinghe sal wtcomen vanden enen volke in die ander: ende groet gherucht sal wtcomen vanden eynden der werelt:

33

ende die doot gheslaghene des heren sullen wesen van den enen eynde der werelt tot haren anderen eynde. Men salse niet bewenen: ende men salse niet opgaderen noch begrauen in vuylen stancke sullen si legghen op dat aensicht der aerden.

34

Ghi herden weent ende roept. ende die voerbarighe vanden cudden bestroeyt v mit asschen want uwe daghe sijn veruolt ende uwe scheidinghen dat ghi versaghen worden sult. ende ghi sult vallen als preciose vaten.

35

Ende die vluchte sal te niet blijuen vanden herderen: ende dat behouden vanden voerbarighen vanden cudden

36

Dat gheluyt vander herden gheroep ende dat ghehuyl der voerbarigher vanden cudden is gehoert: want die here heeft haer weyden ghewoest:

37

ende die weyden des paeys zwegen vanden aen-

[p. *450]

sichte der gramscap van ons heren toerne

38

Hi heeft ghelaten als een liebaert sijn woninghe. haer lant is geworden in bedroeftheden vanden aensichte der gramscap vander duuen: ende vanden aensichte der gramscap van ons heren toerne