Bible in duytsche (Delftse bijbel 1477)

§ Ca .xxiiij

1

DIe here toghede mij: ende sich twee corue vol vighen waren geset voer des heren tempel: na dien dat nabugodonosor die coninc van babilonien ouer gheuoert had iechoniam ioachims sone den coninc van iuda ende sijne princen. ende den smit ende den beslutere der precioser stene van iherusalem: ende hadse gebracht in babilonien

2

Ende die ene corf hadde seer guede vighen: also die vighen vanden eersten tiden plaghen te sijn. Ende die ander corf hadde seer quade vighen: diemen niet en mochte eten om dat si quaet waren.

3

Ende die here seide tot mij. Iheremias wat sietstu? Ende ic seide. Guede vighen. vighen harde guet: ende quade. harde quaet: diemen niet eten en mach om dat sij quaet sijn.

4

Ende des heren woert wort tot mij ghedaen seggende.

5

Dit seit die here god van israhel. Also dese guede vighen sijn. alsoe sal ic bekennen die oueruaringhe van iuda dien ic wtghesendet hebbe van deser stat inder caldeeuscher in goede:

6

ende ic sal mijn oghen op hem slaen om te ghepaeysen. Ende ic salse wederbrenghen in desen lande: ende ic salse stichten ende niet destrueren: ende ic salse planten ende niet wtroden:

7

ende ic sal hem gheuen een herte dat sij mij weten sullen dat ic die here bin. Ende si sullen mij wesen in volc: ende ic sal hem wesen in god: want si sullen te mij wederkeren in al haer herte.

8

Ende also die quaetste vighen sijn diemen niet eten en mach om dat si quaet sijn: so seit dit die here. alsoe sal ic sedechiam den coninc van iuda gheuen ende sijn princen ende dat ander volt van iherusalem die in dese stat bleuen sijn: ende die wonden in dat lant van egipten.

9

Ende ic salse gheuen in quellen ende in vernoey allen den riken vander werelt: in lachtere ende in bispele ende in spot ende in maledictien in allen steden daer icse in verdreuen hebbe:

10

ende ic sal in hem senden dat zwaert ende den honger ende sterfte. tot dat si verderft sijn sullen vanden lande dat ic hem gaf ende haren vaders