Bible in duytsche (Delftse bijbel 1477)

§ Ca .xxiij

1

WEe den herden: die scoren dat cudde mijnre weyden seit die here

2

Hier

[p. *445]

om seit die here god van israhel totten herden die mijn volc voeden. Ghi hebt mijne cudden gestroeyt ghi hebtse wt uerdreuen: ende en hebtse niet gheuisiteert. Siet ic sal op v visiteren die quaetheit van uwen aernsticheden seit die here.

3

Ende ic sal vergaderen die ouerbliue van mijnen cudde wt allen landen daer icse toe darwaert verdreuen hebbe: ende ic salse keren te haren lande ende si sullen wassen ende worden ghemenichfoudicht:

4

ende ic sal op hem verwecken herden ende die sullense voeden. Si en sullen haer voertmeer niet ontsien noch hem vresen: ende men sal nyemant soken vten ghetale seit die here

5

Siet die dage comen seit die here: ende ic sal dauid verwecken een gerechtich saet: ende het sal comen regneren ende wijs wesen: ende doen vonnisse ende gherechticheit int lant.

6

In dien daghe sal iuda behouden worden: ende israhel sal betrouwelijc wonen. Ende dit is die name dat si hem heten sullen: onse gherechtich here.

7

Hier om siet so comen die daghe seit die here: ende si en sullen niet meer segghen leeft die here die de kinder van israhel wt den lande van egipten leide.

8

Mer leeft die here die dat saet van israhel wt egipten geleit heeft ende hier gheleit heeft wt den lande van noerden. ende wt allen landen te dien dat icse verdreuen hadde derwaert: ende si sullen woenen in haren landen.

9

Tot den propheten. Mijn herte is bedroeft in midden mi: alle mijn beenre verbeueden mij. Ic bin geworden als een droncken man: als een man die verversschet is van wine van des heren aensichte ende vanden aensichte sijnre heyligher woerde.

10

want dat lant is veruolt van ouerspeelres: want vanden aensichte des vlokens so weende dat lant: ende die weiden der wildernissen sijn uerdrocht Ende hare lopen is quaet gheworden: ende haer starcheit ongelike.

11

Want die propheet ende die priester sijn besmet: ende in minen huse vant ic haer quaet seit die here.

12

Hier om sal haer wech wesen als slibberachtich in donckerheden: want sij sullen daer in gedreuen worden ende vallen daer in. Want ic sal quade dinghen op hem brenghen: dat iaer hare visiteringhen seit die here.

13

Ende inden propheten van samarien heb ic sotheit ghesien: ende si propheteerden in baal ende bedroghen mijn volc van israhel

14

Ende inden propheten van iherusalem sach ic die ghelikenisse der geenre die ouerspel doen ende den wech der logenen. ende si ghestarcten der alre quaetster menschen handen: dat elc niet bekeert worden en soude van sijnre quaetheit. Si sijn mij alle worden als sodoma: ende die ghene die daer wonen als gomorra.

15

Hier om seit die here vanden scaren tot den propheten Siet is salse doen eten bittere alsene. ende ic salse drincken mit galle. Want vanden propheten van iherusalem is wtcomen besmettinghe op al dat lant

16

Dit seit die here vanden scaren. En wilt niet horen der propheten woerden die v propheteren ende bedrieghen. Si spreken dat visioen haerre herten: ende niet wt des heren monde.

17

Si segghen den ghenen

[p. *446]

die mij blasfemeren die here heuet gesproken: v sal paeys wesen: ende si seiden elken die wandelt in die quaetheit sijnre herten: en gheen quaet en sal op v comen.

18

Want wie was daer bi in des heren rade: ende hoerde ende sach des heren woerde? Wie merct sijn woert ende hoerdet?

19

Siet dat gheruchte van des heren onwaerdicheit sal wt comen: ende tempeest wtbrekende sal comen op der quader hoeft.

20

Des heren toren en sal niet weder keren voer dat hi ghedaen sal hebben: ende tot dat hi veruollen sal dat ghepens sijnre herten. Inden achtersten daghe suldi sijnen raet verstaen

21

Ic en sende den propheet niet ende si liepen: ic en sprac den propheet niet: ende sij propheteerden.

22

Hadden sij in minen raet ghestaen. ende hadden si mijn volc cond ghedaen mijnen woerden: so had icse oec gekeert van haren quaden wege ende van horen alten quaden ghepensen

23

Waenstu dat ic god van bi sij seit die here: ende niet god van verren?

24

Sal een man verborghen worden in heymelijcheit: ende en sal icken niet sien seit die here? En veruol ic niet hemel ende aerde seit die here?

25

Ic heb gehoert wat die propheten seiden: propheterende in minen name logene ende seggende Ic heb gedroemt. ic heb gedroemt.

26

Hoe lange is dit inden propheten herte voersegghende loghene: ende propheterende die verledinghen haerre herten?

27

Die doen willen dat mijn volck verghete mijns name: om haer droemen die si vertellen elc tot haren naesten: also haer vaders mijns namen vergaten om baals wille.

28

Een propheet die den droem heuet hi vertelle den droem: ende die mijn woert heeft hij spreke waerlijc mijn woert. Wat is vanden stroe te rekenen iegen die tarwe seit die here?

29

En sijn mijn woerden niet als een vyer seit die here: ende als enen hamer die enen steen ontween slaet?

30

Hier om so spreke ic den propheten toe die mijne woerden stelen seit die here elc van sijnen naesten.

31

Siet ic spreke den propheten toe seit die here. die haer tonghen aen nemen ende seggen seit die here seit.

32

Siet ic spreke den prophete toe die loghene dromen seit die here: die loghene vertelt hebben. ende hebben mijn volc verleit in hare loghene ende in haren wonderen als icse niet ghesent en hadde. noch hem beuolen en hadde: want si en hebben desen volc niet ghevordert seit die here.

33

Hier om ist dat dij dit volc vraghet ofte een propheet ofte een priester segghende. wat is des heren last: soe sultstu segghen tot hem Wat soude v den last? Want ic sal wt verdriuen seit die here:

34

ende die prophete ende die priester ende dat volc dat seit des heren last: ic sal op dyen man visiteren ende op sijn huys.

35

Dit suldi segghen elc tot sijnen naesten ende te sinen brueder. Wat antwoerde die here Ende wat heeft die here ghesproken?

36

Ende des heren last en sal men voertmeer niet gedencken: want elken sal last wesen sijn woert. Ende ghi hebt verkeert des leuende gods woerde: des heren vanden scaren onses gods.

37

Dit sultstu totten propheet segghen. Wat heeft die

[p. *447]

here gheantwoert: ende wat heeft die here ghesproken.

38

Want ist dat ghi segt des heren last: om dat so seit die here dit. Om dat ghi geseit hebt dit woert is des heren last: ende ic tot v sende ende seide: en wilt niet segghen des heren last:

39

hier om siet so sal ic v wech doen v draghende. ende ic sal v laten ende dese stat die ic v ende uwen vaderen gaf van mijnen aensichte:

40

ende ic sal v geuen in eweliken lachtere ende in ewelike scande die nemmermeer ofgedaen en sal worden mit vergetelheden.