Bible in duytsche (Delftse bijbel 1477)

§ Ca xxi

1

EEn woert dat vanden here ghedaen was tot iheremiam doe die coninc sedechias tot hem sant phassur helchie soen ende sophoniam maasias sone den priester segghende.

2

Vraghe ouer ons den here: want nabugodonosor die coninc van babilonien strijt ieghens ons: oft machschien die here mit ons doen wil na alle sine wonderen. ende dat hi van ons wech trecke.

3

Ende iheremias seide tot hem. Aldus suldi segghen sedechiam.

4

Dit seit die here god van israhel Siet ic sal verkeren die vaten vanden stride die in uwen handen sijn. ende daer ghi mede vecht ieghen den coninc van babilonien ende ieghen die van chaldea die v al om ende omme uwe mueren beleit hebben: ende ic sal die vergaderen in die middewaert vander stat.

5

ende ic sal v verwinnen in starcker hant ende in wtgestekene arme ende in toerne ende in onwaertscap ende in groter gramscap:

6

ende ic sal slaen die ghene die in dese stat wonen. Die menschen ende die beesten sullen steruen mit groter sterften.

7

Ende hier na seit die here. soe sal ic gheuen sedechias den coninc van iuda. ende sijn knapen ende sijn volc ende die ghelaten sijn in deser stat vander sterften ende vanden zwaerde ende vanden hongher in nabugodonosors hant des conincs van babilonien ende in haerre vianden hande: ende inder gheenre hant die haer ziele soken: ende hi salse slaen inden mont vanden zwaerde: ende hi en sal niet beruert worden noch sparen noch ontfermen.

8

Ende du sultste te desen volcke segghen. Dit seit die here. Siet ic geue voer v den wech des leuens ende den wech der doot.

9

Die in dese poort wonen sal. hi sal steruen inden zwaerde ende in hongher ende in sterften: mer die daer wtgaet ende ten caldeeuschen ouerulijt die v beleghen hebben hi sal leuen: ende sine siele sal hem sijn als een roef.

10

Want ic heb mijn aensicht geset op dese stat

[p. *443]

in quade ende niet in guede seit die here. Si sal in des conincs hant van babilonien ghegheuen worden: ende hi salse verbernen mitten vyere

11

ende des conincs huys van iuda Hoert des heren woert

12

dauids huys. Dit seit die here. Vonnisse vroech vonnisse ende verlost den ghenen die bedruct is mit crachte van des gheens hant dien quelt: dat machschien mijne onwaerdicheit niet wt en come als een vyer ende werde bernende ende dat nyemant en si diet bluscht om die quaetheit van uwen aernsticheden.

13

Sich ic spreke te di die woenste in die vaste valeye ende der campaengien seit die here: dit segt wie sal ons slaen ende wie sal in onse huysen comen.

14

ende sal op ons visiteren na die vrucht van uwer aernsticheden seit die here: ende ic sal een vyer ontsteken in haren bussche: ende het sal verbernen al datter omtrent is