Bible in duytsche (Delftse bijbel 1477)

§ Capittel .xix

1

DIt seit die here. Ganc ende neem eens aerden pottemakers aerdenen pot vanden ouders des volcs ende vanden ouders vanden priestereren:

2

ende ganc wter valeien van ennons sonen die is neuen den inganc vander aerdenre poorten: daer sultstu prediken die woerden die ic tot di spreken sal

3

ende segghen. Gi coninghen van iuda. ende die te iherusalem woent: hoert des heren woert. Dit seit die here vanden scaren god van israhel Siet ic sal inbrenghen vernoy op dese stat. also soe wie diese horen sal sijn oren sullen hem tuten

4

om dat si mi ghelaten hebben. ende hebben dese stat vreemde gemaect: ende hebben daer in vreemde goden gheoffert die si niet en kenden si ende haer vaders ende die coninghen van iuda: ende hebben dese stat veruolt mitter onnoselre bluede.

5

Ende si stichten baalims hoecheden om haeren kinder te verbernen meten vyere in baalims holocaust dat ic niet beuolen en hebbe noch ghesproken en hebbe noch si en quamen niet op in mijn herte

6

Hier om siet so comen die daghen seit die here: ende dese stat en sal niet meer tophet geheten worden ende ennons soens valeie mer die valeye der dootslacht.

7

Ende ic sal scheiden den raet van iuda ende iherusalem in dese stat: ende ic salse omwerpen met den zwaerde inden aenscouwen van haren vianden. ende inder gheenre hant die haer zielen soken: ende ic sal haer croengen gheuen te spise den vogelen des hemels ende den beesten der aerden:

8

ende ic sal dese stat legghen in een verwonderen ende in wispelen. Alle die gene die hier doer lijden sal. die sal verwonderen: ende hi sal wispelen op haer alre plaghen.

9

Ende ic sal hem doen eten haer sonen ende haer dochteren vleysche: ende een ygelic sal eten dat vleysch sijns vrients: in hare belegentheit. ende in sinen vernoye daerse haer vianden ende die ghene die haer ziele soeken ende besluten sullen.

10

Eude du sultste den aerden pot ontween slaen inder mannen oghen die mitti gaen sullen:

11

ende du sultste tot hem segghen. Dit seit die here vanden scaren. Aldus sal ic dit volc ende dese stat ontween breken: alsoe men eens aerden pottemakers pot breket diemen nemmermeer vermaken en mach. Ende men salse grauen in tophet om dat ne gheen ander stat sijn en sal om te begrauen.

12

Aldus sal ic deser stat toe doen seit die here ende den genen dier

[p. *441]

in wonen: soe dat ic dese stat legghen sal als tophet.

13

Ende die huysen van iherusalem ende der coninghen van iuda husen als die stat tophet onsuuer: alle die huysen in welker wtlate si offerden alle den ridderscap des hemels: ende scheincten versche offerhande vreemden goden

14

Ende iheremias quam van tophet daer hem die here ghesent had om te propheteren: ende hi stont inden vrijthoue van ons heren huus: ende hi seide tot alden volcke.

15

Dit seit die here vanden scaren god van israhel. Siet ic sal inbrengen op dese stat. ende op alle poorten al dat quaet dat ic heb ghesproken iegen haer want sij hebben haren nacke verhert dat si mine woerden niet horen en souden