Bible in duytsche (Delftse bijbel 1477)

§ Ca xviij

1

EEn woert dat vanden here ghedaen was tot iheremiam segghende.

2

Stant op ende ganc neder in eens mans pottemakers huus: ende daer sultstu mine woerde horen.

3

Ende

[p. *439]

ic ghinc neder in eens aerden pottemakes huis: ende siet hi dede sijn werck op dat wiel.

4

Ende die pot dien hi maencte van der aarden brac in sinen handen. Ende hi keerde hem ende maecte daer of enen anderen pot: alsoet ghenoechde in sinen oghen dat hine maken woude.

5

Ende des heren woert wort tot mi ghedaen segghende.

6

En sal ic v niet mogen doen alsoe dese pottemaker duet dat huus van israhel seit die here? Siet ghelike dat die morwe aerde in eens aerden pottemakers hant: alsoe si di in mijn hant huus van israhel.

7

Haestelic sal ic spreken ieghen tvolc ende ieghen trike dat ic dat ontwortelen ende destrueren ende verderuen sal.

8

Ist dat dat volc penitencie duet van sinen quaden dat ic ieghen hem ghesproken hebbe: soe sal mi oec leet wesen vanden quade dat ic ghepenst hebbe dat ic hem doen soude:

9

ende ic sal haestelic spreken van dien volcke ende van dien rike: dat ict stichten ende planten sal.

10

Ist dattet quaet duet in minen oghen so dattet mine stemme niet en hoert: so sal ic mi berouwen vanden guede dat ic gesproken hebbe hem te doene.

11

Nv hier om segt den man van iuda ende dien die woent in iherusalem seggende. Dit seit die here. Siet ic visiere teghen v quaet: ende ic ghepense ieghens di een ghepens. Ygheliken keer weder van sinen quaden weghe: ende beleet uwe weghen ende uwe arensticheden.

12

Si seiden. Wij wanhopen. Want wi sullen gaen na onsen ghepensen: ende elc onser sal doen die quaetheit van sijnre quader herten.

13

Hier om seit dit die here. Vraghet den heidenen. wie hoerden aldustane eyschelike dingen: die te seer ghedaen heuet die maghet van israhel

14

En sal niet te niete gaen vanden stenen des ackers die snee van libano: oft mach men wtgheroden dat oude water dat wtspringhet ende nederwaert loept?

15

Want mijn volc heeft mijns vergeten te vergheues offerende ende hem stotende in horen weghen. inden manpaden der werelt: dat si daer doer wanderen souden in onghetreden wege:

16

dat haer lant werden soude in bedroefheden ende in ewelike wispelinghe. Elc dier voerliden sal. hi sal verwonderen: ende roeren sijn hoeft.

17

Als een bernende wint sal icse verderuen voer die vianden: ic sal hem toghen den rugghe ende niet dat aensicht inden daghe haers verlies.

18

Ende si seiden. Coemt ende ghepensen wi teghen iheremiam gepense. Want die wet en sal niet verloren worden van den priestere: noch die raet vanden wijsen man: noch dat woert vanden propheet. Coemt ende slae wi hem mitter tonghen: ende en laet ons niet verstaen te alle sinen woerden.

19

Verstae here te mi waert: ende hoer mijnre wedersaken stemme.

20

En gelde niet ouer dat guede quaet: want sij hebben ghegrauen een gracht mijnre sielen? Gedencke dat ic in dinen aenscouwen ghestaen hebbe dat ic ouer hem guet spreken soude: ende dat ic dine onwaerdicheit van hem keren soude.

21

Hier om gif haer kinder in hongere: ende leitse in des zwaerts hande. Haer wiuen moe-

[p. *440]

ten worden sonder kinderen ende weduwen: ende haer mannen moeten werden verslaghen mitter doot. Haer ionghelinghen moeten worden doerbodelt mitten zwaerde inden stride:

22

ende men moet horen dat gheroep wt haren husen. Want du sultse haestelic op hem brenghen den moerdenaer: want si hebben een gracht gegrauen om mi te vaen ende si hebben gheborghen stricken tot minen voeten.

23

Mer here du weetste al horen raet dien si ieghen mi doen in die doot. En werde niet guedertieren in hare quaetheit: ende haer sonde en werde niet afghedaen van dinen aensichte. Si moeten worden vallende in dinen aenscouwen: inden tide dijns toerns so misbruketse