Bible in duytsche (Delftse bijbel 1477)

§ Capittel .xvij

1

IUda sonde is ghescreuen mit eenre yseren griffie in die claeuwe van enen adamant: gegroueert op die breetheit haerre herten: ende in die hornekens van haren outaren.

2

Als hare kindere ghedencken sal hare outare ende der bossche ende der ghelouerder boem die opten hogen bergen sacrificeren inden velden:

3

so sal ic dijne starcheit ende alle dijne tresoren geuen in roue: ende dijne hoecheden in allen den eynden van dijnen lande om die sonden.

4

Ende du sultste alleen ghelate worden van dijnre erueachticheit die ic di ghegheuen hebbe: ende ic sal di doen dienen dinen vianden in een lant dattu niet en weetste Want du hebste een vyer ontsteken in mijnen toerne het sal eweliken bernen

5

Dit seit die here. Vermaledijt sij die mensche die betrouwet in enen mensche: ende settet dat vleysche sijnen arme: ende wes herte vanden here wech gaet

6

Want hij sal sijn als een heyde inder wildernissen: ende hi en sals niet sien als dat guede comen sal: mer hi sal wonen in droecheden inder wildernissen in dat soute lant daermen niet in wonen en mach.

7

Ghebenedijt is die man die inden here betrouwet: ende die here sal sijn betrouwen wesen.

8

Ende hi sal wesen als een hout datmen verplant op die wateren: dat ter verscheit sijn wortelen sciet: ende en sal niet ontsien als die hetten coemen: ende sijn loef sal wesen gruen: ende inden tide der droecheit en salt niet besorcht wesen. noch ne genen tijt en salt laten vrucht te maken

9

Des menschen hert is quaet ende men macht niet onder gronden Wie sal dat bekennen?

10

Ic die here die dat hert ondersoect ende die lendenne proeft: die elken gheue na sijnen wech: ende na die vrucht van sinen vonden.

11

Perdicx bruet dat sij niet ghebaert en heeft. Si heuet rijcheden ghemaect ende niet in vonnisse. In die middewaert van haren daghen sal sijse laten: ende in haren achtersten sal sij onwijs sijn.

12

Die zetel der glorien van hoecheden vanden beghinne: die stat onser heilicheit is te ontbei-

[p. *438]

den van israhel.

13

Here alle die di laten sullen gheschent worden: die van dij wechgaen sullen inder aerden ghescreuen worden: want si hebben ghelaten die adere vanden leuenden wateren den here

14

Ghenese mij here ende ic sal ghesont worden: maect mi behouden ende ic sal behouden wesen: want du biste mijn lof.

15

Sich si seggen tot mij. Waer is des heren woert. Het come.

16

Ende ic en bin niet verstoert di den herde volghende: ende ic en begeerde des menschen dach niet. Du wetest dat wt minen lippen ghegaen is: dat was gherecht in dijnen aenscouwen

17

En wes mi du niet ter vresen: du biste mijn hope inden dage mijns vernoeys.

18

Bescaemt moeten sij worden die mi persequeren. ende ic en moet niet bescaemt worden: si ontsien hem: ende ic sal mij niet ontsien Brenct op hem den dach des vernoeys. ende mit tweuoudigher droefheit bedroeftse.

19

Dit seit die here tot mij. Ganc ende stant in die poerte der kinder van dijnen volke. ende daer die coningen van iuda doer in gaen ende wt gaen: ende in alle die poerten van iherusalem:

20

ende du sultste tot hem segghen. Ghi coninghen van iuda ende al iuda ende ghi alle die tot iherusalem woent. hoert des heren woert: die ingaet doer deser poerten.

21

Dit seit die here. Wacht uwe zielen: ende en wilt niet draghen last inden saterdaghe. noch en brenget niet in doer die poorten van iherusalem:

22

ende en wilt ne ghene last wtwerpen wt uwen huysen in den saterdaghen. ende ghi en sult ne gheen werc doen. Heilicht den saterdach alsoe ic uwen vaderen beual.

23

Ende sij en hoerden mi niet noch en hilden nederwaert haer ore: mer si verherden haren necke dat si mi niet horen en souden: noch discipline ontfaen.

24

Ende het sal wesen ist dat ghi mi hoert seit die here: soe dat ghi ne ghenen last in en brenghet doer die poorten van deser stat inden saterdach ende ist dat ghij heilicht den saterdach ende en doet geen werck in hem:

25

si sullen ingaen doer die poorten van deser stat die coninghen ende die princen die op dauids troen sitten. ende die op paerden ende op waghenen gaen sitten si ende haer princen die mannen van iuda ende die in iherusalem wonen: ende men sal ewelike in dese stat wonen

26

Ende si sullen comen vanden steden iuda ende van al om ende omme iherusalem ende van benyamins lande ende vanden campaengen ende vanden berchlanden ende van suden. ende sullen brenghen holocaust ende victimen ende sacrificie ende wieroec: ende si sullen offerhande brenghen in des heren huus.

27

Mer ist dat ghi mi niet en hoert soe dat gi den saterdach heilicht ende dat gij ne gheen last en draget ende dat ghijt niet in brenghet doer die poorten van iherusalem inden staerdaghe: soe sal ic een vyer ontsteken in uwen poorten ende het sal verbernen die husen van iherusalem: ende ten ssl niet werden gebluscht