Bible in duytsche (Delftse bijbel 1477)

§ Capittel .xvi.

1

ENde des heren woert wort te mi gedaen segghende.

2

Du en sultste di ne gheen wijf nemen. ende in dese stat en sullen di niet wesen sonen ende dochteren.

3

Want dit seit die here op die sonen ende die dochteren diemen wint in dese stat: ende op haer moederen diese gewonnen hebben: ende op haer vaderen van welker gheslachte dat sij gheboren sijn in desen lande.

4

Si sullen steruen mitter doot der gheenre die quellen. Men salse niet bewenen ende men salse niet begrauen: si sullen sijn in stinckende misschen op dat aensicht vanden lande. Ende si sullen verteert worden mitten zwaerde ende mitten hongher:. Ende haer croengien sullen wesen in spisen den vogelen des hemels ende den beesten vanden lande.

5

Want dit seit die here. En ganc in ne gheen huys van werscappen noch en ganc niet om te wenen: noch en vertroestse niet want ic hebbe van desen volke mijnen paeys ghenomen seit die here: ontfermicheit ende onfermenissen.

6

Ende die grote ende die cleyne sullen steruen in desen lande: men salse niet begrauen ende men salse niet bewenen: ende si en sullen hem niet sniden noch men en sal en gheen caluheit om hem maken:

7

ende si en sullen onder hem ne gheen broet breken den ghenen die weent om te vertroesten opten doden: ende si en sullen hem niet gheuen den dranck vanden nappe om te vertroestene van haren vader ende haerre moeder.

8

Ende du en sultste niet gaen in dat huys der werscap om mit hem te sitten ende te etene ende te drincken:

9

want dit seit die here vanden scaren god van israhel. Siet ic sal in uwen oghen vander stat ende in uwen daghen wech doen die stemme der blijscap ende die stemme der vroechden: ende des brudegoms stemme ende der bruut stemme.

10

Ende als du desen volc geseit hebtste alle dese woerden ende si di segghen. waer om heeft die here op ons ghesproken al dit grote quaet: welc is onse quaetheit of welc is sonde die wij ghesondicht hebben den here onsen god:

11

so sultstu tot hem seggen Want uwe vaders hebben mi ghelaten seit die here: ende si sijn wech ghegaen na vreemde goden ende hebbense ghedient. ende hebbense aenbeedt: ende en hebben mi ghelaten ende en hebben mijn wet niet ghehouden.

12

Mer ende oeck hebdi qualiker gedaen dan uwe vaders Want siet elc wandelt na sijnre quader quaetheit sijnre herten: om dat hi mi niet horen en sal.

13

Ende ic sal v vte verdriuen wt desen lande in een lant dat ghi. noch uwe vaders niet en weet Ende ghi sult daer dach ende nach dienen vreemde goden die v ne ghene rust geuen en sullen.

14

Hier om siet so sullen comen die daghen seit die here. ende men sal niet meer segghen leeft die here die die kinder van israhel wt egipten leide.

15

mer leeft die here die de kinder van israhel gheleit heeft vten lande van noerden: ende wt allen landen daer icse toe verdreuen hadde: ende ic salse weder brenghen in haer lant dat ic haren vaders gaf.

16

Siet ic sal vele visschers senden seit die here: ende sij

[p. *437]

sullense visschen. Ende hier na sal ic hem senden vele iaghers. ende si sullense iaghen van elken berghe ende van elken houele ende vten holen vanden stenen:

17

want mijn oghen sijn op alle haer weghen. Si en sijn niet verborghen van mijnen aensichte: ende hare quaetheit en was niet berborgen van mijnen oghen.

18

Ende ic sal hem eerst ghelden hare twevoudighe quaetheden ende sonden: want sij hebben mijn lant besmet inden croengien van haren afgoden: ende mit haren vuylheden hebben si mijne erueachticheit veruolt.

19

Here mijne starcheit ende mijne vromicheit: ende mijne toeulucht inden daghe mijns vernoeys Totti sullen die lude comen vanden eynden vander werelt ende segghen Waerlijc besaten onse vaders loghene: ydelheit die hem niet en vorderde

20

Sal een man te sijnen behoef gode maken Ende si en sijn niet goden.

21

Hier om sich sal ic hem toghen bi desen veranderne: ic sal hem toghen mijne hant ende mijn cracht ende si sullen weten dat die here is mijn name