Bible in duytsche (Delftse bijbel 1477)

§ Capittel .xv

1

ENde die here seide tot mi. Ist dat moyses samuel voer mij staen: so en is mijn siele tot desen volke niet. Steecse wt van minen aensichte: ende si gaen wt.

2

Ende ist dat si tot di segghen. werwaert sullen wi wtgaen so sultstu tot hem segghen. Dit seit die here. Die wtgaet ter doot. hi gae ter doot: ende die ten swaerde. hij gae ten swaerde: ende die ten hongher. hij gae ten hongher: ende die ten gheuanghenisse. hi gae ten gheuanghenissen.

3

Ende ic sal op hem visiteren seit die here vierderhande manyeren. Dat swaert om doot te slaen. ende honden om te scoren: ende die vogel des hemels ende die beesten der aerden om te verslinden ende te verscheiden:

4

ende ic salse gheuen in hitten allen riken lantscappen der werelt om manasses wille ezechias sone des conincs sone van iuda. om alle die quaetheden die hi ge-

[p. *435]

daen heuet in iherusalem.

5

Want wie sal dijnre ontfermen iherusalem. Ofte wie sal bedrouet worden om dine wille Du hebste mi ghelaten seit die here: Ofte wie sal gaen te bidden dinen paeys

6

Du biste achterwaert ghegaen. Ende ic sal mijn hant wtsteken op di: endi ic sal di dootslaen. Ic hebbe ghearbeit bidddende.

7

Ende ic salse stroeyen mit eenre wanne in die poorten vanden lande Ic hebbe ghedoot ende verloren mijn volc: ende nochtan en sijn sij niet wederghekeert van haren weghen.

8

Hare weduwen sijn mij ghemenichuoudicht. bouen die sande vander zee. Ic hebbe hem in ghebracht op eens ionghelincs moeder te middage enen woester. ic hebbe haestelijc op die stede gesendt anxt.

9

Die seuen sonen ghebaerde si is cranc gheworden: ende haer ziele ghebrac. Die sonne ginc haer onder doent noch dach was si is confuus ende scaemde haer Ende haer sonen die ouerbliuen. die sal ic geuen inden zwaerde in haerre vianden aenscouwen seit die here god.

10

Wee mij mijn moeder. Waer om wonnestu mi enen man van gheschelde: enen man van onvrede in al dat lant? Ic en hebbe niet ghewokert: noch nyemant en heeft mi gewokert. Alle v vloken sij mi die here seit.

11

Ofte ic dinen ouerblijue niet en helpe in guede: ofte ic di niet te gemoete en come inden tide van vernoeye: inden tide van tribulacien ende van quellinghe ieghen dijnen viant?

12

Ende sal dat yser niet vergaderen mitten iser uan noerden ende coper?

13

Ic sal dijne rijcheden ende dijne tresoren gheuen te dancke in roef in allen dijnen sonden: ende in alle dijnen terminen.

14

Ende ic sal dijne viande toebrenghen van enen lande dattu niet en weetste: want een vyer is ontsteken in mijnen toerne: ende op v salt barnen.

15

Du wetes here: ghedencke mijns ende visitere mi: ende verlosse mi van dien die mij persequeren. En wil mi niet ontfaen in dijnre gedoechsaemheit. Du sultste weten dat ic om dijnen wille lachter gedoecht hebbe

16

Dijn woerden sijn gevonden ende ic atse. Ende dijn woert is mij geworden in blijscap ende in vrouden mijnre herten: want dijn naem is op mi aengheropen here god vanden scaren.

17

Ic en heb niet gheseten inder spelender raet: ende bin verblijt van dat aensicht dijns hants. Ic sat allene: want du veruoldeste mi mit dreyghinghe.

18

Waer om is mijn rouwe ewich worden: ende mijne wonde te wanhoep? Si veronwaerde ghenesen te worden. Sij is mij geworden als die loghene van ongetrouwen wateren.

19

Hier om seit die here dit. Ist dattu bekeert wordes so sal ic di bekeren. ende du sultste voer mijn aensicht staen: ende ist dattu scheides dat preciose vanden ondieren: soe sultstu wesen als mijn mont. Sij sullen te di bekeert worden: ende du en sultste niet bekeert worden te hem.

20

Ende ic sal di dit volc gheuen in enen metalen muer ende starc: ende si sullen ieghen di striden ende di niet verwinnen: want ic bin mit di dat ic di behouden ende verlossen sal seit die here.

21

Ende ic sal di verlossen vander quaetster menschen handen: ende ic sal di beschermen vander hant der

[p. *436]

starcker