Bible in duytsche (Delftse bijbel 1477)

§ Capittel .xiiij.

1

DAt woert dat vanden here gedaen was tot iheremiam vanden woerden der droecheit.

2

Iudea weende: ende haer poorten sijn gheuallen ende dat lant is verdonckert: ende die roep van iherusalem is op gecomen.

3

Die meeste senden haer minste ten watere: si quamen om water te sceppen. Ende sij en vonden gheen water: ende si brachten haer vaten weder ydel. Si worden bescaemt ende ghequelt: si ouerdecten haer hoefden om die woestheid vanden lande:

4

want gheen reghen en quam in dat lant Die lantwinres worden bescaemt. Sij ouerdecten haer hoefden.

5

Want die hertinne ghebaerde op dat velt. ende liet haer calf om dat daer geen cruut en was:

6

ende die wilde ezelen stonden op die roetsen. Ende toghen den wint in als draken: haer oghen ghebraken om dat gheen cruut en was.

7

Ist dat onse quaetheden ons antwoerden: here doecht om dinen name: want onse ofkeringhen sijn vele.

8

Verbeiden van israhel wij hebben di ghesondicht: onse verlosser inden tide van vernoy. Waer om sultstu comen in tlant als een aerdwinre. ende als een weghegangher hem afkerende om te bliuen?

9

Waer om sultstu comen als een vechtich man: ofte een starc man die niet verlossen en mach? Mer du here biste in ons: ende dijn name is op ons aengeropen: en laet ons niet

10

Dit seit die here desen volc dat ghemint heeft te roeren sine voeten ende niet en rust: ende en genoghede den here niet Nv sal hi gedencken haer quaetheden: ende visiteren haer sonden.

11

Ende die here seide tot mi En wil niet bidden ouer dit volc in guet.

12

Als si vasten sullen so en sal ic haer bedinghe niet ghehoren: ende ist dat si offeren holocauste ende victimen ic en salse niet ontfaen: want ic salse vertreden inden zwaerde ende in hongher ende in sterften.

13

Ende ic seide. A. a. a. here god. Die propheten segghen hem. Ghij en sult dat zwaert niet sien. ende die honger en sal in v niet sijn: mer ghewarighen paeys sal hi v gheuen in dese stat.

14

Ende

[p. *434]

die here seide tot mi. Die propheten propheteren valschelic in minen name. Ic en hebse niet gesent: ende ic en hebt hem niet beuolen: noch en heb hem toeghesproken. Si propheteren v luden loghenaehtich visioen ende waersagherie ende loesheit ende dat verleiden haerre herten.

15

Hier om seit dit die here vanden propheten die in minen name propheteren die ic niet gesent en hebbe: ende die seggen. dat zwaert ende die hongher en sal voertmeer niet wesen in desen lande. Die propheten sullen verteert worden inden zwaerde ende inden hongher:

16

ende die luden dien si propheteren sullen wtgheworpen wesen inden weghen van iherusalem ouermits hongher ende vanden zwaerde: ende nyemant en sal wesen diese begrauen sal si ende haer wiue ende haer sonen ende haer dochteren: ende ic sal op hem wtstorten haer quaet.

17

Ende du sultste tot hem segghen dit woert. Mijn oghen brenghen wt tranen dach ende nacht ende en swighen niet: want mit groter droefheit is vertreden die dochter die maghet mijns volcs: met anxteliker groter plaghen.

18

Gae ic wt te velde siet so sijn si daer verslaghen mitten zwaerde: ende gae ic in die stede siet so sijn si daer vermaghert van hongher. Want die propheet ende die priester sijn wech ghegaen inden wech dien si niet en wisten.

19

En hebstu niet wechwerpende iudam ofgheworpen: oft heeft dijn ziele veronwaert syon Waer omme dan hebstu ons geslaghen aldus soe dat ne ghene ghesonde sijn en sal? Wi hebben den paeys ontbeit ende en is niet guet: ende den tijt van ghenesene ende sich verstoertheit.

20

Here wi bekennen onse ongenadicheden: onser vaderen quaetheden want wi hebben di ghesondicht.

21

En ghif ons niet in lachteren om dinen name: noch en doch ons ne ghene scande. Gedencke des troens dijnre glorien: ende en make niet te niete dine belofte met ons.

22

En sijn inder heiden afgoden niet die reghen gheuen: ofte die gheuen moghen die regen des hemels oftu niet en woudste? En bistuut niet die here onse god dien wi ontbeit hebben? Want du hebste alle dese dinghen ghemaect