Bible in duytsche (Delftse bijbel 1477)

§ Capittel .xiij.

1

DIt seit die here tot mi Ganc ende roep te dijnre behoef enen linen broec rieme: ende du sultste dien legghen op dijnen lenden: ende du en sultsen niet netten in water.

2

Ende ic cocht enen broec rieme na ons heren woert: ende ic leiden omtrent mijne lenden.

3

Ende des heren woert wort anderwarf teghen mij ghedaen segghende.

4

Doch af den broecrieme dien

[p. *432]

du ghecocht hebtste die omtrent dine lendene is: ende stant op ende ganc tot eufraten: ende berghe dien in een gat van enen stene.

5

Ende ic ghinc wech ende barchen in eufraten: alsoe mi die here beuolen hadde.

6

Ende het gheuiel na vele daghe: so seide die here tot mi. Stant op ende ganc tot eufraten: ende neem dinen broecrieme dien ic dij aldaer beual te berghen.

7

Ende ic ghinc wech tot eufraten: ende ic groef ende ic nam van daer den broecriem van dier stat daer icken gheborghen hadde. Ende sich die broecriem was verrot: also dat hi niet tamelijc en was nerghens toe te bezighen.

8

Ende des heren woert wort tot mi gedaen segghende.

9

Dit seit die here. Aldus sal ic doen verrotten die houaerdicheit van iuda. ende die grote houerdie van iherusalem.

10

dit alte quade volc die mijne woerden niet horen en willen. ende sij wandelen in die quaetheden haerre herten: ende si sijn wech ghegaen na vreemde goden om hem te dienen. ende si aenbedense. Ende si sullen wesen als die broecriem. die niet tamelijc en is yewerts toe te bezighene.

11

Want ghelike dat die broecrieme vast is aen eens mans lendene: also vergaderde ic aen mij al dat huys van israhel ende al dat huys van iuda seit die here: dat sij mi souden wesen in volc ende in enen name ende in lof ende in glorie: ende si hoerdens niet.

12

Hier om sultstu hem segghen dit woert. Dit seit die here god van israhel. Elc flessche sal gheuolt worden mit wijne. Ende si sullen tot dij segghen> En weten wij niet dat elc flessche sal worden gheuolt mit wijne?

13

Ende du sultste tot haer seggen. Dit seit die here. Siet ic sal veruollen alle die ghene die in desen lande wonen. ende die coningen van davids geslachte die op sinen troen sitten.. ende die priesteren ende die propheten ende alle die wonen in iherusalem met dronckenscap:

14

ende ic salse scheiden ende stroeyen den man van sinen brueder: ende die vaders ende die kinderen te gader seit die here Ic en salse niet sparen ende ic en sal niet oerlouen: noch ontfermen dat icse niet verderuen en sal.

15

Hoert ende begrijpt mitten oren en wilt niet werden verheuen: want die here heuet gesproken.

16

Gheeft den here dinen god glorie eert verdonckert: ende eer hem uwe voeten stoten aen die doncker berghen Ghi sult dat licht ontbeiden: ende hi salt setten in die donckerheit des doots ende in donckerheden.

17

Ist dat gij dat niet en hoert: so sal in verborghenheit mijn siele weenen vanden aensicht der houaerdien. Mijn oge sal weenende weenen ende tranen wt storten: want des heren cudde is gheuaen.

18

Segt den coninc ende der vrouwen. Wert veroetmoedicht: sittet op die aerde: want die croen uwer glorien sal neder vallen van uwen hoefde.

19

Die steden van zuden sijn gesloten: ende niemant en is diese op duet Al iuda is ouer gheuoert in volmaecter oueruoeringhe.

20

Heft op v oghen ende besiet: die van noerden comt. Waer is die cudde dat di ghegheuen is: dijn voerbarighe vye?

21

Wat sultstu seggen als hi di visiteren sal? Want du hebt-

[p. *433]

stese gheleert ieghen di: ende hebste gheleert ieghen dijn hooft. En hebben di niet beuaen pijnen als een wijf die in arbeiden leit?

22

Ist dattu in dijn herte seitste waer om sijn dese dinghen op mi gecomen: om die menichte dijnre quaetheit sijn ondect dijne scamelheden: dine planten vanden voeten sijn besmet.

23

Ist dat een moor verwandelen mach sijn vel. ofte een lupaert sijn boutheden: so moechdi oec wel doen. als gi quaet geleert hebt

24

Ende ic salse stroeien als stoppele die vanden winde begrepen wort in die wildernisse.

25

Dit is dijn lot ende dat dele dijnre maten van mi seit die here: want du hebste mijns vergheten ende betrouweste in loghenen.

26

Hier bij heb ic ondect dine dyen ieghen dijn aensicht: ende dine scamelheit is gesien:

27

dine ouerspel ende dijn steenen ende die misdaet dijne fornicacien Ende ic sach dine vuyle wercken inden acker opten berghe. Wee di iherusalem. Du en sultste niet gesuuert worden achter mi Hoe lange salt noch wesen