Bible in duytsche (Delftse bijbel 1477)

§ Ca .xij.

1

HEre du biste gherechtich ist dat ic mit di disputere: mer nochtan sal ic gherechte dingen spreken tot di Waer om wort der quader wech voerspoedich: ende waer bi is wel allen den ghenen die ouerdaet doen. ende ongherechtelijc doen?

2

Du hebtstese geplant ende sij hebben haer wortel ghescoten: si hebben voertganc ende maken vrucht Du biste bi haren monde: ende verre van haren lendenen.

3

Ende du here kendeste mij: du hebste mij ghesien ende hebste

[p. *431]

mijn hert mit di gheproeft. Vergaderse als een cudde ter offerhanden: ende heylighese inden dage der dootslacht.

4

Hoe lange sal dat lant wenen: ende sal dat cruyt van alden lantscap verdroghet worden om die quaetheit der gheenre dier in wonen? Die beeste is te nyet gheworden ende dat gheuoghelte: want si seiden hi en sal onse achterste niet sien.

5

Ist dattu mitten voeten lopende ghearbeit hebtste: hoe sultstu moghen striden mitten paerden? Ende altstu inden lande van paeyse seker wesen sultste: wat sultstu doen in die houaerdicheit der ioerdanen?

6

Want dijne brueders ende dijne vader huys. vochten oeck ieghen di: ende riepen na di mit volre stemmen Als si di guede dinghen spreken sullen. en geloef hem niet.

7

Ic hebbe mijn huys ghelaten: ende mijne erue ghelaten. Ic gaf mijne geminde ziele in mijnre viande handen:

8

mijne erueachticheit is mi ghemaect als een lyebaert inden bussche. Hi gaf sijne stemme ieghen mi: hier om hatede icse.

9

En ys mijne erueachticheit niet een voghel van ongheliker verwen? En is si niet een vogel altemael gewerwet? Coemt ende wort vergadert alle die beesten vanden lande: haest v toe om te verslindene.

10

Vele herden hebben mijnen wijngaert ghedestrueert: sij hebben vertreden mijn dele.. Si hebben mijn begheerlijc deel ghegheuen in woestheit der wildernissen.

11

Si hebbense geleit in een scheiden: ende sij weenden op mij. Mit droefheden is al dat lant bedroeft: want nyemant en is diet verpenst mitter herten

12

Alle die destruerers sijn gecomen op alle die wegen der wildernissen: want des heren zwaert heeft werslindet vanden eynde vanden lande tot haren eyenden. Ne gheen paeys en is allen vleysche.

13

Sij saeyden tarwe ende si ouxten doerne: sij ontfinghen die erueachticheit: ende en sal hem niet vorderen. Ghi sult worden bescaemt van uwen vruchten: om die gramscap van ons heren toerne.

14

Dit seit die here ieghen mijne alte quade gebueren: die de hant slaen aen die erueachticheit die ic ghedeylt hebbe mijnen volke van israhel Siet ic salse wtsteken wt haren lande ende ic sal dat huys van iuda wtsteken van midden hem.

15

Ende als icse sal hebben wtghesteken. so sal ic bekeert worden ende ontfermen haers: ende ic salse wederbrenghen den man te sijnre erueachticheit: ende den man in sijn lant.

16

Ende het sal wesen: ist dat die gheleerde leren mijns volcs wegen so dat sij zweren in mijnen name leeft die here: alsoe sij leerden mijn volck te zweren in baal: soe sullen sij worden gesticht in midden mijns volcs.

17

Ist dat sijs niet en horen: soe sal ic dat volc wtsteken mit wtstekene ende verliesen seit die here.