Bible in duytsche (Delftse bijbel 1477)

§ Ca .xi.

1

EEn woert dat van onsen heer gedaen was tot iheremiam segghende.

2

Hoert die woerden deser beloften: ende spreec totten mannen van iuda ende totten ghenen die in iherusalen wonen:

3

ende du sultste tot hem segghen. Dit seyt die here god van israhel. Vermaledijt is die man die niet en hoert die woerden deser belofte:

4

die ic uwen vaderen beual in dien daghe dat icse wt den lande van egipten leide vter yseren fornayse segghende. Hoert mijne stemme ende duet al dat ic v beuolen heb: ende gi sult mij sijn in volck. ende ic sal v wesen in god:

5

dat ic verwecken mach dien eet dien ic uwen vaderen zwoer dat ic hem gheuen soude dat lant dat vloeyt van honich ende van meke alsoe dese dach is. Ende ic antwoerde hem. Ende seide. Amen here.

6

Ende die here seyde tot mij. Roep alle dese woerden inden steden van iuda ende buyten iherusalem ende segt. Hoert die woerden deser beloften ende duetse:

7

want oercondende oerconde ic v vaders inden daghe dat icse vten lande van egipten leide tot desen dage. Vroech opstaende oerconde ic ende ic seide. hoer mijn stemme:

8

ende si en hooerdenre niet noch en hielden haer ore nederwaert: mer si ghinghen wech elc in die quaetheit sijns quaets herten. Ende ic heb op hem gebracht alle die woerden deser beloften: dat ic beuolen heb dat sij doen souden ende si en hebbens niet gedaen.

9

Ende die here seide tot mij Een te gader zweren is vonden inden mannen van iuda ende inden ghenen die in iherusalem wonen.

10

Si sijn ghekeert ten eersten quaetheden haerre vaderen: die mijn woerden niet horen en wilden. Ende dese sijn oeck ghegaen na

[p. *430]

vreemden goden om dat si hem dienen souden. Dat huys van israhel ende dat huys van iuda hebben onwaert gemaect mine belofte: die ic mit haren vaderen beloefde.

11

Om dese dinc seit dit die here Siet ic sal in brenghen op hem quade dinghen. daer sij niet en sullen moghen wtgaen: ende si sullen mij roepen ende ic en salse niet ghehoren.

12

Ende die steden van iuda ende die ghene die in iherusalem wonen sullen gaen ende roepen te dien goden dien sij offeren: ende si en sullense niet verlossen inden tiden haers vernoeys.

13

Want na dat ghetal van dijnen steden waren dijn afgoden iuda: ende na dat ghetal van dijnen weghen iherusalem settestu outaren van scanden: outare om baalim te offeren.

14

Hier om en wil du niet bidden ouer dit volc: ende niet en neme aen prijs ende bedinghe ouer hem: want ic en sals niet gehoren inden tide haers ropens aen mi: inden tide haers vernoeys aen mij.

15

Wat ist dat mijn gheminde heeft vele sonden gedaen in mijn huys? En sal dat heylighe vleysch van di niet nemen dijne quaetheden: daer du in verblijt biste?

16

Die here noemde dinen naem enen drachtighen oliueboem schone vruchten brenghende ende specioes. Ter stemmen van groter spraken berne dat vyer in haer: ende telgheren worden verbrant

17

Ende die here vanden scaren die di plante ende quaet op di ghesproken heeft: om die quaetheden des huys van israhel ende des huys van iuda die si te haren behoef ghedaen hebben om mij te veronwaerden offerende baalim.

18

Ende du here heuest mi ghetoecht ende ic hebt bekent: du hebste mij getoecht haer aernsticheden:

19

ende ic als een sachtmoedich lam datmen draget te dodene. Ende ic en bekende niet dat sij op mi pensden raden segghende: doen wij in sijn broot een hout. ende scrappen wine af vander leuender lant: ende men gedencket voertmeer sijnen name niet.

20

Mer du here vanden scaren die gherechtelijc oerdels ende die lendenen ende die herten proeues: ic sal dijne wrake van hem sien. Want ic hebbe di mijne sake ondect.

21

Hier om seit die here tottten mannen van anathot: die mine ziele soken. ende die segghen: du en sultste niet propheteren in des heren name: ende du en sultste niet steruen in onsen handen.

22

Hier om seit die here vanden scaren. Siet ic sal hem visiteren. Die ionghelinghen sullen steruen inden zwaerde: hare sonen ende hare dochteren sullen steruen in honghere

23

ende dan en sullen en ghene ouerblijue wesen wt hem. Want ic sal quaet in brenghen op die manne van anathot: dat iaer hare visiteringhen.