Bible in duytsche (Delftse bijbel 1477)

§ Capit .ix.

1

WIe sal gheuen minen hoefde water. Ende in mine ogen een fonteyne van tranen? Ende ic sal dach ende nacht bewenen die verslagene der dochter mijns volcs.

2

Wie sal mi geuen in der wildernissen een toekeren der wegeganghers? Ende ic sal mijn volc laten. ende gaen wech van hem: want si sijn alle ouerspeelres ende een hoep van ouerdadighen menschen:

3

ende si rechten haer tonghe wt als enen boge der loghenen ende niet der waerheit. Sij sijn ghestarct inden lande: want si sijn wtghegaen van quade te quade: ende sij en bekenden mi niet seit die here.

4

Yghelike wachte hem van sinen naesten ende in elken sinen brueder en hebbe en gheen betrouwen: want elc brueder sal vertredende vertreden: ende elc vrient sal loeslic voertgaen:

5

ende een man sal sijn brueder bespotten. ende si en sullen die waerheit niet spreken. Si hebben haer tonghe gheleert loghenen te spreken: ende si pijnden dat si ongerechtelic doen souden.

6

Dine woninghe is

[p. *427]

in midden die loesheit: in loesheden sij veronwaerden mi te wetene seit die here.

7

Hier om seit die here vanden scaren Siet ic salse smelten ende prouense Want wat sal ic anders doen vanden aensicht der dochter mijns volcs?

8

Haer tonge is een gescutte wondende: si heeft loesheit ghesproken in haren mont. Sij spreect paeys mit haren vrient: ende heimelic leit si hem verradenisse.

9

En sal ic op dese dingen niet visiteren seit die here: ofte en sal haer mijn ziel niet wreken in dustanigen volc?

10

Op die berghe sal ic aennemen gheween ende ghescrei. ende gheween op die schoon dinghen der wildernissen: want si sijn verbrant om dat ne gheen man en is die daer ouerlijdt: ende si en hoerden niet die stemme des gheens diese besat. Van voghelen des hemels totten vye sijn si ouergheuaren ende wech ghegaen.

11

Ende ic sal iherusalem gheuen in hoepen van sande. ende in draken neste: ende ic sal die steden van iuda gheuen in bedroeftheden om dat niemant sijn en sal dier in woent.

12

Wie is een wijs man die dit verstaen sal. ende te wien dat woert van des heren monde ghedaen worde dat hi dit boetscappen mach: waer om is dat lant vederft ende verbrant als een wildernisse. om dat nyemant en is dier doer lijdt?

13

Ende die here seide. Want si hebben mine wet ghelaten die ic hem gaf. ende si en hebben mine stemme niet ghehoert. ende en wanderden daer niet inne:

14

ende si sijn wech ghegaen na die quaetheit haerre herten. ende na baalim die si geleert hadden van haren vaders

15

hier om seit die here vanden scaren god van israhel. Siet ic sal dit volc spisen mit bitteren alsenen. ende ic sal hem drincken gheuen water van galle:

16

ende ic salse stroeyen inden heidenen die si niet en kenden si ende haer vaders: ende ic sal achter hem senden dat swaert tot dat si te niet gheworden sijn.

17

Dit seit die here vanden scaren. Merct ende roept weenerssen ende si comen: ende sent te dien wijuen die wijs sijn ende si comen te v.

18

si haesten hem ende nemen aen geween op v Onse oghen brenghen voert tranen: ende onse wijnbraeuwen vloeyen neder van water:

19

want die stemme van geween is ghehoert wt syon. Hoe sij wi ghewoest: ende anxtelic bescaemt? Want wi hebben dat lant ghelaten: want onse woningen sijn woest.

20

Gi wiuen hoert hier om des heren woert. ende uwe oren die nemen aen die redene sijns monts: ende leert v dochter geween. ende elc wijf leer haer naeste wijf ghescrey:

21

want die doot is opcomen doer onse vensteren. si is comen in onse husen: om te verderuen die cleyne kinder van buyten: ende die iongelinghen vanden straten.

22

Spreec Dit seit die here. Ende des menschen crongie sal vallen als menschen drec op dat aensichte van dat lantscap: ende als hoey achter des gheens rugghe die maeyt: ende nyemant en is diet vergaderen sal.

23

Dit seit die here. Die wijse en verblide niet in sijn wijsheit: ende die starcke en verblide niet in sijn starcheit. ende die rike en verblide niet in sijn rijcheden:

24

mer die verblijt hi verblide hier in. dat hi mi weet ende kent:

[p. *428]

want ic die here bin die onfermherticheit doe ende vonnisse. ende gerechteit int lant. Want dese dinghen genogen mi seit die here

25

Siet die daghen comen seit die here: ende ic sal visiteren op elken die dat ouersloef besneden heeft.

26

op egipten. ende op iuda ende op edom. ende op ammons kinderen ende op moab: ende op alle die ghene die ront om gescoren sijn aen haer hare die inder wildernissen wonen: want alle heyden hebben dat ouersloef: ende alle dat huus van israhel sijn onbesneden van herten