Bible in duytsche (Delftse bijbel 1477)

§ Ca .viij

1

IN dien tiden seit die here. sullen si wt haren grauen werpen der coninghe ghebeenten van iuda. ende sijnre princen ghebeenten. ende der propheten ghebeenten. ende der priesteren ghebeenten. ende dat gebeente der gheenre die te iherusalem woenden:

2

ende sij sullense spreiden ter sonnen ende ter manen ende te alden ridderscap des hemels dien si minden ende die si dienden ende daer si na wandelden. ende die si sochte: ende aenbeden. Men salse niet vergaderen ende men salse niet begrauen: sij sullen in vuylheden sijn op dat aensicht der aerden.

3

Ende sij sullen meer verkiesen die doot dan leuen. alle die ouerblijuen sullen van desen alte quaden gheslachte: in allen steden die ghelaten sullen sijn daer icse toe wtgedreuen hebbe seit die here vanden scaren

4

Ende du sultste tot hem segghen dit seit die here. En sal die gene die valt niet weder opstaen: ende die ofghekeert is en sal hi niet wederkeren?

5

Waer om dan is dit volck in iherusalem afghekeert mit striden der afkeringe? Si hebben die loghene begrepen: ende si en wilden niet wederkeren.

6

Ic mercte ende ic toehoerde: nyemant en spreect dat guet is. Niemant en is die penitencie duet van sijnre sonden ende seit. Wat heb ic ghedaen? Si sijn alle ghekeert tot haren loep: als een paert dat mit bedrusche gaet ten stride waert.

7

Die wuwe bekende inden hemel haren tijt: die tortele die zwaluwe ende die odeuaer. wachten den tijt haers toecomens: mer mijn volke en kende des heren vonnisse niet>

8

Hoe segdi wij sijn wijs: ende des heren wet is mit ons? Waerlijc heeft die loghene ghewacht der scriben loghenachtighe griffie.

9

Die wise lude sijn bescaemt: si sijn veruaert ende gheuaen. Want des heren werc geduert ewelijc ende in die werelt der werelt. Want si hebben des heren woert wech gheworpen: ende in hem en is ghene wijsheit.

10

Hier om sal ic haer wijuen gheuen vreemde luden: ende haer ackers vreemde erfghenoten. Want vanden minsten tot den meesten volghen sij alle die

[p. *426]

vrecheit: vanden propheten tot die priesteren doen sij alle loghene.

11

Ende si ghenasen die bedroeftheit der dochter van mijnen volke te scande segghende. hets paeys. paeys: alst ne gheen paeys en was.

12

Sijn sij bescaemt die de veronwaerdicheit ghedaen hebben: mer bet en sijn si niet bescaemt mit scaemten:ende sij en consten hem niet scamen. Hier om sullen sij vallen onder die ghene die vallen: ende sullen vallen inden tide haerre visiteringe seit die here

13

vergaderende sal ic haer vergaderen seit die here. Ne gheen druue en is inden wijngaerden. ende ne gheen vighe en is aen den vigheboem. Dat blat is af gheuallen: ende ic gaf hem datter ouerghegaen is.

14

Waer om sitten wij vergadert? Ende gae wij in die ghemuerde steden: ende swighen wi daer: want die here onse god heeft ons doen zwighen: ende hi heuet ons te drincken ghegeuen galle water. Want wi hebben den here ghesondicht.

15

Wi ontbeiden den paeys ende ten was niet guet: ende den tijt des ghenesens ende siet ons is anxt.

16

Van dan is ghehoert dat gheneye van sijnen paerden: ende al dat lant is beruert vanden gelude des gestoefs van sijnen vechters Ende si quamen ende verslinden dat lant ende sine volheit: die poorte ende die daer in woenden.

17

Want siet ic sal v senden die serpent cokentrise. diemen niet ghehonen en mach: ende si sullen v biten seit die here.

18

Mijn wee is bouen wee: in mij is mijn herte in droefheden.

19

Siet die stemme des roeps der dochter van mijnen volc van verren lande. En is die here niet in syon. ofte en is haer coninc in haer niet? Waer om dan hebben si mi gheporret tot gramscap in haren afgoden: ende in haren ydelheyden?

20

Die ouxt is ouerleden: die somer is gheeynt: ende wi en sijn niet behouden

21

Op die bedroeftheit der dochter mijns volcs bin ic bedroeft ende besericht: een verwonderen heeft mi ghehouden.

22

En is ne ghene resine in galaad. of en is daer ne gene medicine? Waer om dan en is niet ouerheelt dat litteiken der dochter mijns volkes?