Bible in duytsche (Delftse bijbel 1477)

§ Capittel .vij

1

EEn woert dat van onsen here gedaen was tot iheremiam seggende

2

Staet in die poorte van des heren huyse: ende predike daer dit woert ende seg. Al iuda die incoemt doer dese poorte om den here te aenbedene. hoert des heren woert

3

Dit seit die here vanden scaren god van israhel maect uwe wege guet ende uwe aernsticheden: ende ic sal mit v wonen in dese stat.

4

En wilt niet betrouwen in woerden der logenen: segghende. dit is des heren tempel. des heren tempel. des heren tempel ist.

5

Want ist dat ghi uwe weghe wel beleit ende uwe aernsticheden. ist dat ghi vonnisse duet tusschen den man ende sijnen naesten:

6

ende en doedi gheen ouerdaet den toecomeling ende den weese ende der weduwen: noch en stortti gheen onnosel bluet wt in dese stat. ende en wandeldi niet na vreemde gode in quade te uwes selues behoef:

7

so sal ic mit v wonen in dese stat int lant dat ic uwen vaderen gaf vanden beghinne ende tot inden eweliken.

8

Siet ghi betrouwet in woerden der loghenen die v niet vorderen en sullen:

9

te stelen. doet te slaen. ouerspel te doen. loghenachtelijc te zweren. baalim te offeren: ende te gaen na vreemde goden die ghi niet en weet.

10

Ende ghi quaemt ende stont voer mi in dit huys daer in dat minen naem aengheropen is: ende ghi seide wij sijn verlost om dat wij alle dese onwaerdiheden ghedaen hebben.

11

Hier om is dit huys worden een speluncke van moerdenaren: daer in dat mijn name aengeroepen is in uwen oghen? Ic bint: ic sacht seit die here

12

Gaet te mijnre stat in sylo daer mijn name woende vanden

[p. *424]

beghinne: ende besiet wat ic haer ghedaen hebbe om mijns volcs van israhels quaetheit.

13

Ende nv want ghi alle dese werken ghedaen hebt soe seit die here: ende ic heb v toe ghesproken vroech opstaende ende sprekende ende ghi en hoerdes niet. ende ic riep v. ende ghi en antwoerde niet:

14

soe sal ic desen huyse doen daer in dat mijn name aengheropen is. ende daer gi betrouwen in hebt ende der stat die ic v ghegheuen heb ende uwen vaders also ic sylo gedaen hebbe:

15

ende ic sal v wech werpen van mijnen aensichte. alsoe ic alle uwe bruederen wech gheworpen hebbe alle dat saet van effraym.

16

Hier omme en wille du niet bidden ouer dit volc: noch en neem genen prijs aen ouer hem ende bedinghe: ende en wederstant mi niet: want ic en sal di niet ghehoren

17

En sietstu niet wat dese doen inden steden van iuda. ende inden straten van iherusalem?

18

Die kinderen rapen dat hout ende die vaderen maken dat vyer: ende die wijue bliesen die bloem om coken te maken der coninghinnen des hemels ende om te offeren vreemde goden: ende om mij te gramscepen te verporren.

19

En verporren sij mij niet tot gramscap seyt die heer? En doen sijt niet hem seluen in die scande haers aensichten.

20

Hier omme seit dit die here god. Siet mijne gramscap ende mijne onwaertscap wort ontsteken op dese stat op die mannen ende op die paerden. ende op dat hout vanden lantscape ende op die vruchten der aerden: ende si sal worden barnende ende niet worden ghebluscht.

21

Dit seyt die here vanden scaren die god van israhel. Vwe holocausten duet tot ouwen victimen. ende etet dat vleysch:

22

want ic en heb niet ghesproken mit uwen vaderen. ende ic en beual hem niet inden dage dat icse wt den lande van egipten leyde vanden woerde van holocausten ende van victimen:

23

mer dit woert beual ic hem ende seide. Hoert mine stemme ende ic sal v luden god wesen. ende ghi sult mijn volc wesen: ende wandelt in alle den wech dien ic v beuolen heb: dat v wel si.

24

Ende sij en hoerdens niet noch en hilden haer ore nederwaert: mer sij ghinghen in haer ghenoechten ende in die quaetheit haers quaets herten: ende si sijn worden achterwaert ende niet in voerwaert

25

van dien dage dat haer vaders wt egipten ghinghen tot in desen daghe.Ende ic sende tot hem alle mijne knechten die propheten des daghes. op staende in die dagheraet. ende dij sendende:

26

ende si en hoerden mij niet noch en hielden haer oren nederwaert. mer sij verherden hare necke: ende si hebben qualiker ghedaen dan haer vaders.

27

Ende du sultste segghen tot hem alle dese woerden. ende sij en sullen dij niet horen: ende du sultstese roepen. ende sij en sullen dij niet andworden.

28

Ende du sultste tot hem segghen. Dit is dat volc dat niet ghehoert en heeft die stemme des heren sijns gods: noch en heeft ontfaen disciplinen. Die trouwe is verloren: ende is ghenomen van haren monde.

29

Scheer dijn haer ende werp wech. ende neem in rechte gheween: want die here heeft afgheworpen ende ghelaten dat geslachte sijnre gramscap:

30

want die kinder van

[p. *425]

iuda hebben quaet ghedaen in mijnen oghen seit die here. Si hebben haer verbelghinghe geset in dat huys daer mijn naem in aengheropen is dat sijt besmetten souden:

31

ende sij hebben ghemaect die hoecheden van tophet. dat is in die valeye van ennons sone. dat si haer dochteren ende haer sonen verbernen souden mitten vyere. dat ic niet beuolen en hebbe noch ghepenst in mijn herte.

32

Sich hier omme sullen comen die dagen seit die here: ende men sal niet meer segghen tophet ende ennons soens valeie. mer men sal heeten die valeye der dootslacht: ende si sullen worden begrauen in tophet om dattet ne gheen stat en is.

33

Ende die croengye des volcs sal sijn in spise den vogelen des hemels ende den beesten der aerden: ende nyemant en sal wesen diese afweren sal.

34

Ende ic sal doen rusten vanden poorten van iuda ende vanden straten van iherusalem die stemme der blijscap ende den gheluyt der vrouden: die stemme des brudegoms ende die stemme der bruyts. Want dat lant sal sijn in bedroeftheden.