Bible in duytsche (Delftse bijbel 1477)

§ Capittel .vi.

1

KInder van benyamin wert starc in midden iherusalem: ende in thecua trompt mitter trompen: ende op bethacaren heft op v bannier: want een quaet is gesien van noerden ende grote droefheit.

2

Ic maecte die dochter van syon ghelike enen schonen ende tederen wijue:

3

te hare sullen comen haer herden ende hare cudden. Si sloghen in haer

[p. *422]

haer tenten al om ende omme: yghelijc sal die voeden die onder sijn hant sijn

4

Heilicht op haer den strijt: staet op ende gae wij op int zuyden. Wee ons want die dach is neder ghedaelt: want des auonts sijn die donckerheden langher geworden.

5

Staet op ende gae wi op in die nacht: ende destrueren wij haer huysen:

6

want dit seit die here god vanden scaren. Houwet of haer houte: ende graeft omtrent iherusalem enen dam. Dit is die stat der visitacien: alle ouerdadicheit is in midden haer.

7

Ghelike dat een putte sijn water kout maect also maecte si kout haer malicien. Quaetheit ende woestheit salmen in haer horen vore mij altoes: ziecheit ende plage.

8

Iherusalem worde gheleert dat machschien mijne ziele niet wech en gae van dij: dat ic machschien di niet en legge woeste. lant ende sonder woninghe daer in.

9

Dit seit die here vanden scaren. Sij sullen vergaderen totten druue israhel ende als dat ouerbliuet inden wijngaert Kere om dijn hant als een wijngaertman ten paenre waert.

10

Wie sal ic spreken: ende wien sal ic oerconden dat hijt hoer? Siet haer oren sijn onbesneden: ende en moghens niet horen. Siet des heren woert is in hem worden in lachtere: ende si en sullent niet ontfaen.

11

Hier om bin ic vol van des heren gramscap ic heb gearbeit dit gedoghende. Stort wt op dat cleyne kint dijn gramscap: ende oec te gader op der ionghelinghen raet. Want die man sal worden gheuaen mit sijnen wijue: die oude mitten ghenen die vol is van daghen.

12

Ende haer huysen sullen ouergaen ten anderen luden: haer acker ende haer wijne te gader: want ic sal mijne hant wtsteken op die ghene die int lant wonen seyt die here.

13

Want vanden minsten totten meesten so sijn si alle aernstich totter vrecheit: ende vanden prophete totten priestere soe doen sij alle loesheit.

14

Ende si genasen die bedroeftheit der dochter van mijnen volke mit lachter ende seiden. paeys paeys: ende ten was gheen paeys.

15

Si sijn bescaemt die veronwaerdicheit ghedaen hebben: mer bet en sijn sij niet bescaemt: ende sij en consten hem niet scamen. Om dese dinc sullen sij vallen onder die vallende: in den tide haerre visiteringhe sullen si vallen seit die here.

16

Dit seit die here. Staet op die weghe ende besiet. ende vraghet vanden ouden manpaden welc die guede wech is ende wandelt daer in: ende ghi sult vinden ende vercoelen uwen zielen. Ende si seiden. Wi en sullenre niet in wandelen.

17

Ende ic settede bouen v wachters. Ende ic seide. Hoert der trompen geluyt. Ende si seiden. Wi en sullens niet horen.

18

Hier om hoert ghi heydene ende vergaderinghe bekenne: hoe grote dinghen ic hem doen sal.

19

Aerde hoer Siet ic sal quade dinghen brenghen op dit volc die vrucht van sijnen ghepensen: want sij en hebben mijne woerden niet ghehoert: ende si hebben mine wet wech gheworpen.

20

Wat brengdi mij wieroec van saba: ende chalamum dat suete ruket van verren lande? Vwe holocauste en sijn niet ontfaen: ende uwe victime en genogheden mij niet

[p. *423]

21

Hier om seit die here god Siet ic sal in desen volke gheuen valle: ende in hem luden sullen vallen te gadere die vader ende die kinderen: die ghebuere ende die naeste sij sullen verderuen.

22

Dit seit die here. Siet volc coemt vanden lande van noerden. ende groet volc sal op staen vanden eynden der werelt:

23

het sal begripen ghescutte ende den schilt: het is fel ende en sal niet ontfermen. Sijne stemme sal luden als die zee: ende sij sullen op paerden sitten: bereet als een man te stride. ieghen die dochter van syon.

24

Wi hebben sijne nyemare ghehoert: onse hande sijn amachtich. Tribulacie heeft ons begrepen: pijnen ghelijc enen wijue die in arbeide leit.

25

En wilt niet wtgaen ten velde: ende en wandelt inden wijngaert niet: want des viants zwaert is die anxte al omme ende omme.

26

Mijns volcs dochter gorde dij mit enen clede van hare. ende wort bestroeit mit asschen: maec di dat gheween van een eengeboren sone bittere geween: want die woester sal haestelijc op di comen.

27

Ic hebbe dij ghegheuen enen vromen prouere in mijnen volke: ende du sultste weten ende prouen haren wech

28

Alle dese sijn princen van afkerers: loeslijc wandelende. Si sijn alle coper ende yser: sij sijn alle ghevuylt.

29

Die blaesbalch ghebrac int vyer: dat loot is verteert. Die smeltere smaltse te vergheefs: want hare malicien en worden niet verteert.

30

Heetse ghelachtert siluer. want die here heeftse afgheworpen