Bible in duytsche (Delftse bijbel 1477)

§ Capit .v.

1

GAet omme die weghe van iherusalem ende besiet: ende merct ende soect in haren straten. of ghi yet vint enighen man die vonnisse duet. ende trouwe soect: ende ic sal sijns guedertieren sijn.

2

Ist oec dat si segghen leeft die here: ende dat sullen sij in valschden zweren.

3

Here dijn oghen aensien die trouwe. Du sloechstese ende si en hadden genen rouwe: du vertraetstese ende si veronwaerden discipline te ontfanghen. Si verharden haer aensichten bouen den steen: ende sij en wilden niet wederkeren

4

Ende ic seide. Machschien sijn sij arm ende sotte: ende en weten des heren wech niet ende haers gods vonnisse.

5

Hier om sal ic gaen totten edelen luden ende ic sal hem spreken. Want si hebben des heren wech bekent ende haers gods vonnisse. Ende siet si braken meer te gader dat ioc ontween: ende braken die bande.

6

Hier om sloechse die liebaert vanden bossche: des auonts woestese die wolf: die lupaert waechte op hare steden. Elc die wt den steden gaen sal van hem luden hi sal ghevaen worden: want haer ouerdadicheden sijn menichfoudich: haer afkeringhe sijn ghestarct.

7

Waer op sal ic di mogen guedertieren wesen? Vwe kinderen hebben mij ghelaten: ende zweren in dien die ne gheen goden en sijn Ic sadese ende si hebben ondiere fornicacie ghedaen: ende in eens gemeen wijfs huys deden sij haer luxurien.

8

Paerden waren minnaren inden wijuen: ende het worden boden ghemaect: elc man neygede hem tot sijns naesten wijfs waert

9

En sal ic op dese dinghen niet visiteren seit die here: ende en sal in dustanighen luden mijn ziele niet ghewroken worden?

10

Climt op haer muere ende destrueertse: mer en wilt niet doen volle verderfnisse. Duet wech haer gheslachten: want si en sijn des heren niet.

11

Want dat huys van israhel ende dat huys van inda heeft mit ouerdadicheden ieghen mij ouerdaet gedaen seit die heer.

12

Si lochenden den here: ende si seiden. Hi en ist niet: noch op ons en sal gheen quaet comen: wi en sullen niet sien dat zwaert noch den hongher.

13

Die propheten spraken inden wint: ende in hem en was ne gheen antwoerde. Hier om sullen hem dese dinghen comen.

14

Dit seit die here god vanden scaren. Om dat ghi dit woert ghesproken hebt: sich so gheue ic mijne woerden in dijnen mont in vyer ende in hout dit volck: ende het salse ver-

[p. *421]

bernen.

15

Siet ic sal brenghen op v huys van ysrahel seit die here luden van verren: starck volck dat oude volck dies tonghe ghij niet oeck weten en sult: noch du en sultste niet verstaen wat het spreken sal.

16

Sijn koker is als een open graf: alle sijn si starc.

17

Ende het sal eten dijn coren ende dijn broot salt verslinden: dijn sonen ende dijn dochteren salt eten. dijn cudde ende dijn vye: ende het sal verteren dijnen wijngaert ende dinen vigheboem: ende het sal destrueren dijne ghemuerde poorten daer du betrouwen in hadste mitten zwaerde

18

Mer nochtan in dien daghen seit die here en sal ic v altemalen niet laten verderuen.

19

Ist dat ghi segt waer om heeft die here onse god ons alle dese dinghen ghedaen: so sultstu tot hem segghen. Alsoestu mi ghelaten hebst. ende hebst gedient enen vreemden god in nwen lande so snldi dienen ander goden int lant dat v niet en is.

20

Boetscapt dit iacobs huyse: ende doet horen in iuda ende segt

21

Hore sot volc dat ne ghene hert en hebste: ende dat oghen hebst ende siet niet: ende oren ende en hoerst niet.

22

En suldi mi dan niet ontsien seit die here: ende en suldi van minen aensichte niet bedroeft sijn. Die dat sant hebbe gheset den termijn der zee. ewelijc gebot dat niet te nyete gaen en sal: ende sij sullen worden beruert ende niet vermoghen: ende haer vluede sullen oprisen: ende si en sullen dyen termijn niet ouerliden.

23

Mer desen volc is ghemaect een hert herte ende veronwaerdende. Si sijn afghegaen ende wech gegaen

24

ende si en seiden in haer herte niet Ontsien wi den here onsen god. die ons geeft tidighen ende spadighen reghen in sijnen tide: die ons behuet die volheit vanden iaerliken ouxte.

25

Onse quaetheiden hebben dese dinghen afghekeert: ende onse sonden hebben dat guede van ons verboden:

26

want in mijnen volke sijn geuonden onghenadighe lude verradenisse makende als voghelaren: leggende stricken ende voetstroppen om die mannen te vaen.

27

Ghelike een slachnette dat vol vogel is: also sijn haer huysen vol loesheden. Hier om sijn si groot gheworden ende gherijct:

28

sij sijn dicke geworden ende geuettet: ende si sijn alte qualijc ouer mijne woerde gegaen. Si en vonnesten niet der weduwen sake: ende sij en beleden niet des weeskens sake: ende si en vonnisten niet der armer vonnisse.

29

En sal ic op dese niet visiteren seit die here: ofte en sal op dustanighe lude mijne ziele niet ghewroken worden?

30

Verwonderende ende wonderlike dinghen sijn ghedaen inden lande

31

Die propheten propheteerden loghene: ende die priesters weygherden mit haren handen: ende mijn volc: minde dustanighe dinghen. Wat sal hier om gheschien in sijnen vtersten?