Bible in duytsche (Delftse bijbel 1477)

§ Capit .iij.

1

MEn seit ghemeenlijc. Ist dat een man sijn wijf laet. ende als si van hem gaet neemt si enen anderen man: en sal si voertmeer te hem niet weder keren: en sal dat wijf niet meer onsuuer ende besmet sijn? Mer du heefste onkuysheit ghedaen mit vele minnaren: nochtan keer weder te mij seit die here: ende ic sal di ontfaen.

2

Hef op dijn ogen int rechte: ende besich waer du niet neder gheleit en sijts. Du saetste inden weghen ende ontbeides dijn minnaren als een rouer in die wildernisse. ende du besmettes dat lant in dijnen onkuysheden ende in dijnen quaden werken.

3

Ende om dese dinghen so sijn verboden die dropele vanden reghenen: ende ne gheen

[p. *417]

spadich reghen en was. Di is gemaect dat voerhoeft eens ghemeens wijues: du en woutste dij niet scamen.

4

Hier om doch. so hete mij voert ane mijn vader bistu. du biste die beledere mijns magedons

5

En sultstu ewelijc niet vergramt wesen: of sultstu geduren tot in dat eynde? Ende sich du hebtste ghesproken. ende ghedaen quade dingen: ende du vermochstes. Ende ouer die woerden van betrouwenissen soe hebtstu gheblasfemeert mit woerden der houaerdicheit: ende du voldedes dijn quade ghepens. Ende du toghedes ieghen den man dijn starcheit: om dattu sultste moghen doen dattu mitten woerde gheseit hebste.

6

Ende in iosias des conincs daghen seide die here tot mij. En hebstu niet gesien wat dat wedersporrich wijf van israhel ghedaen heeft? Si is wech gegaen bij haer seluen op elken hoghen berch. ende onder elken ghelouerden boem: ende daer heeft si haer onkuysheit ghedaen.

7

Ende ic seide doe sij alle dese quaetheden ghedaen hadde: kere weder te mi. ende si en keerde niet weder. Ende iuda haer ouerdadighe suster sach.

8

Want om dat dat wedersporrighe wijf israhel ondadighe fornicacie ghedaen hadde dat icse gelaten hadde. ende dat ic haer ghegeuen hadde dat boexken van versteken: ende die ouerdadige iuda haer suster en ontsach haer niet. mer si ghinc oec wech ende dede fornicacie:

9

ende mitter lichtheit haerre fornicacien besmette sij dat lant: ende is vuyle van onkuysheit mitten stenen ende den houte.

10

Ende in allen desen soe en is haer ouerdadighe suster iuda tot mij niet wedergekeert. in al hare herte. mer in loghene seit die here.

11

Ende die here seide tot mi. Die wedersporreghe israhel heylichde hare ziele om te rekenen haer ieghen die ouerdadighe iuda.

12

Ganc ende roep dese woerden ieghen dat noerden. Ende du sultste segghen. Wedersporrige israhel keer weder seit die here. ende ic en sal mijn aensicht niet afkeren van v luden: want ic bin heylich seit die here: ende ic en sal niet eweliken vergramt worden.

13

nochtan sultstu weten dijne quaetheit want dn heueste ieghen den here dijnen god ouerdaet gedaen. Ende du hebste vreemde lude dijn wege gestroeyt onder elc ghelouert hout: ende du en hebste mijne stemme niet ghehoert seit die here.

14

Wert bekeert kindere ende keert weder seit die here: want ic bin v man. Ende ic sal u an nemen. enen vter stat ende hem tween van eenre maechscap: ende ic sal v leiden in syon.

15

Ende ic sal v herden gheuen na mijn herte: ende si sullen v voeden in gherechticheden ende in leringhen.

16

Ende als ghi ghemenichfoudicht sult sijn ende ghewassen inden lande in dien daghen seit die here. so en sullen si nemmermeer segghen die archa van ons heren beloften: ende si en sal niet opcomen int herte noch sij en sullenre niet ghedencken: noch men salse niet visyteren noch men sals voert meer niet doen

17

In dien tiden sullen si iherusalem heten des heren zetel: ende alle heyden sullen tot iherusalem worden vergadert in ons heren name in ihe-

[p. *418]

rusalem: ende si en sullen niet wandelen na die quaetheit van haerre alte quader herten.

18

In dien dagen sal dat huys van iuda gaen ten huyse van israhel: ende si sullen te gader comen vanden lande van noerden ten lande dat ic uwen vaders gaf.

19

Ende ic seide. Hoe sal ic di in kinderen ghesetten: ende dij gheuen dat begheerlijc lant der scaren vanden heidenen voerbarige erueachticheit? Ende ic seide. Du sultste mij heten vader: ende du en sultste niet cesseren in te gaen na mij.

20

Mer gheliken als een wijf veronwaert haren minnare: also heeft mij veronwaert dat huys van israhel seit die here.

21

Een stemme is ghehoert inden weghen dat gheween ende dat ghehuyl der kinder van israhel: want sij maecten haren wech ongerechtich: si hebben vergheten des heren haers gods.

22

Wort bekeert kinder wederkerende: ende ic sal genesen uwe afkeringe. Want siet wij comen te di. Want du biste die here onse god.

23

Waerlijc waren die houele logenachtich ende die menichte vanden berghen. Waerlijck is die salicheit van israhel inden here onsen god.

24

Scaemte heeft ghegeten onser vader arbeide van onser ioecht: haer cudden ende haer vye: haer sonen ende haer dochteren.

25

Wi sullen slapen in onser scaemten ende onse scande sal ons ouerdecken: want wij ende onse vaders hebbe ghesondicht den here: onsen god van onser ioncheit tot desen daghe: ende wij en hebben niet ghehoert des heren ons god stemme.