Bible in duytsche (Delftse bijbel 1477)

§ Ca .ij.

1

ENde des heren woert wort tot mi ghedaen segghende.

2

Ganc ende roep inden oren van iherusalem ende segghe. Dit seit die here. Ic bin dijns ghedacht ontfermende dijne ioncheit ende die minne dijns ondertrouwens als du mij volges inder wildernissen: int lant datmen niet en saeyt.

3

Heylich israhel: den here behoren toe die primicien sijnre vruchten. Alle dien verslinden sij misdoen: ende quade dinghen sullen op hem comen seit die here.

4

Iacobs huys ende alle die maechscaps huys van israhel hoert des heren woert.

5

Dit seit die here. Wat quaetheden vonden uwe vaders in mi: dat sij hem van mij vervorderden ende wandelden na die ydelheit. ende si sijn ydel geworden?

6

Ende si en seiden niet waer is die here die ons dede opcomen vten lande van egipten: die ons leide ouer doer die wildernisse doer dat lant daermen niet in wonen en mach ende dat sonder wech is. doer dat lant van dorste ende die beelde des doots:

[p. *415]

dore dat lant daer ne ghene man in en wandelde noch mensche in en woende

7

Ende ic hebbe v in gheleet in dat vette drachtige lant: om dat ghi eten soudt sine vrucht ende die beste vruchte daer af. Ende als gi daer in gecomen waert so besmettedes du mijn lant: ende mijne erueachticheit hebdi geset in veronwaerden.

8

Die priesteren en seiden niet waer die here is: ende die mijne wet hilden en wisten mij niet: ende die herden hebben ieghen mi ouerdaet ghedaen. Ende die propheten propheteerden in baal: ende volgheden den afgoden.

9

Hier om sal ic noch mit v striden in oerdele seit die here: ende ic sal schelden mit uwen kinderen.

10

Trect ouer ten eylande van cethim ende siet: ende sendt in ceder merct naerstelike: ende besiet ofte dustanighe dinc ghedaen is:

11

ofte die heydene haer gode verwandelt hebben ende seker si en sijn ne gene gode. Mer mijn volc heeft sijn glorie verwandelt in ene afgod.

12

Hemelen verwondert hier op: ende sijn poorten wort anxtelijc bedroeft seit die here.

13

Want mijn volc heeft twe quade dinghen gedaen. Sij hebben mij die fonteyn des leuens waters ghelaten: ende sij hebben tot haerre behoef ghegrauen ghestroeyde cysternen die gheen water en moghen onthouden.

14

En is israhel niet een dienstknecht ofte een opgheuoet knecht? Waer om is hi dan ge worden in roue?

15

Op hem briesscheden die libaerden: ende gauen haer geluyt: ende hebben sijn lant geleit in verderfnissen. Sijne steden sijn verbernt: ende niemant en is die daer in woent.

16

Die kinder van mempheos ende van taphneos hebben di doerruct totten cop van dijnen houede.

17

En is di dit niet gheschiet: om dattu den here dijnen god lietes te dier tijt dat hi di leyde doer den wech?

18

Ende nv wat wiltstu di inden wech van egipten: dattu drincken sultste vermoddert water? Ende wat wiltstu di inden wech dier van assyrien: dattu drincken sultste dat water vander riuieren.

19

Dine malicie sal dij verspreken: ende dijne afkeringhe saldi berispen. Du sulste weten ende besien datti quaet ende bitter is dattu ghelaten hebste den here dijnen god: ende dat sijne grote vrese mit di niet en is seit die here god vanden scaren.

20

Vanden beghinne hebstu te broken mijne ioc: ende hebstu mijne bande ontween te broken ende du seides. Ic en sal di niet dienen. Want op elken hoghen berch ende onder elken gelouerden boem so laechstu neder ghemeen wijf.

21

Mer ic plante dij mijnen vercoren wijngaert: alle ghewarich saet. Hoe bistu mij dan verkeert in quade vreemde wijngaert

22

Al dwaestu di mit nitro ende al menichfoudichste di dat cruut borith: du biste besmet in dijn quaet voer mij seit die here god

23

Hoe segstu ic en bin niet besmet ic en heb na baalim niet gewandelt? Besich dijn weghe in die valeye du sultste weten wattu ghedaen hebste. Een lichtlopere voldoende dijne weghe:

24

die wilt ezel die eenpaerlike is inder wildernissen: in die begheerte haerre zielen toech si aen den wint haerre minnen. Niemant en salse ofkeren

[p. *416]

Alle diese soken en sullen niet ghebreken: si sullense vinden in die veelheit haerre maentsmetten.

25

Verbiede dijnen voet van naectheden: ende dijn kele van dorste. Ende du seides ic wanhopede: ic en sals niet doen. Wat ic hebbe vrememde mannen ghemint: ende ic sal na hem gaen.

26

Also als een dief bescaemt wort alsmen vint. also sijn bescaemt die huyse van israhel: si ende haer coningen haer princen priesteren ende propheten:

27

ende segghen een houte du biste mijnen vader: ende enen steen du wonnes mij. Si keerden te mij waert den rugghe ende niet dat aensicht: ende si sullen inden tiden haers verdriets segghen: stant op ende verlosse ons.

28

Waer sijn dijn gode die du te dijnen behoef makedes? Sij staen op ende verlossen di: inden dage dijns verdriets. Want na dat ghetal van dijnen steden waren dijn afgoden iuda

29

Wat wildi mit mi striden in vonnisse? Ghi hebt mij alle gelaten seit die here.

30

Te vergheefs heb ic uwe kinder gheslaghen: si en ontfinghen ne gene discipline. Vwe zwaert heeft uwe propheten verslint: als een lyebaert woest uwe gheslachte.

31

Besiet ons heren woert. En bin ic niet israhel gheworden een wildernisse: ofte spadich lant? Waer om dan heeft mijn volc gheseit: wij sijn wech ghegaen. voertmeer en sullen wi te di niet comen?

32

En sal een maget niet vergheten haer verchieringhe: ende een bruut des gordels van haerre borst? Mer mijn volc heuet mijns vergheten in onuertalliken daghen.

33

Wat bepijnste du dijnen wech guet te toghene: om minne te sokene Die hier en bouen dijnen wech hebtste gheleert dijn quaetheden:

34

ende inden quaden is gevonden dat bluet der armer ende onnoselre menschen zielen. Ic en hebse niet vonden in grachten: mer in allen dien ic bouen geseit heb.

35

Ende du hebste gheseit. Ic bin onnosel ende sonder sonde ende hier om werde dijn gramscap van mij ghekeert. Sich ic sal mit vonnisse mit di striden: om dattu gheseit hebste ic en heb niet ghesondicht.

36

Hoe sere snode bistu geworden: dine wege weder doende. Ende du sultste bescaemt worden van egipten: alsoestu bescaemt biste van assur.

37

Want ende van desen egipten sultstu wtgaen. ende dijn hande sullen op dijn hoeft wesen: want die here heeft dijne berowenisse te broken: ende du en sultste niet voerspoedichs hebben.