Bible in duytsche (Delftse bijbel 1477)

Ca. .I.

1

Iheremias woerden helchias sone vanden pristeren die waren in anathot in beniamins lant.

2

Dat woert ons heren dat tot hem ghedaen was in yosias amons soen des conincs van iuda dagen inden derthiensten iaer van sijnen rike:

3

ende het was tot hem ghedaen in ioachims iosias soen des conincs van iudea daghen totten eynden vanden elfsten iaer sedechias iosias soen des conincs van iuda. totter oueruoeringhe van iherusalem in die vijfste maent.

4

Ende des heren woert wort tot mi ghedaen seggende.

5

Eer ic di formeerde inden buyc so kende ic di: ende eer du wtquaemste doer die vroulijcheit so heilichde ic di: ende ic gaf di een propheet inden heydenen.

6

Ende ic seide a a a here god. Sich ic en kan niet spreken: want ic bin een kint.

7

Ende die here seide tot mij. En wilt niet segghen want ic bin een kint

[p. *414]

want allen dien daer ic di toe senden sal sultstu toegaen: ende alle die dinghen die ic dij beuelen sal. sultstu spreken.

8

En ontsich niet van haren aensichte: want ic bin mitti dat ic dij beschermen sal seit die here.

9

Ende die here stac wt sijn hant: ende hi tastede mijnen mont: ende die here seide tot mij. Sich ic hebbe mijne woerden ghegheuen in dijnen mont:

10

sich ic hebdi huden gheset bonen die heydenen ende bouen die rike dattu wtroden sultste ende destrueren ende bederuen ende scheiden: ende stichten ende planten sultste.

11

Ende des heren woert wort tot mi ghedaen segghende. Wat sietstu iheremias? Ende ic seide. Ic sie een wakende ruede.

12

Ende die here seide tot mij. Du hebtste wel ghesien: want ic sal waken op mijn woert dat ic dat doen sal.

13

Ende des heren woert wort anderwarf tot mij ghedaen seggende. Wat sietstu iheremias? Ende ic seide. Ic sie enen gloeyende pot: ende sijn aensicht is vanden aensien van noerden.

14

Ende die here seide tot mij. Van noerden sal vertoghet worden dat quaet op alle die ghene die int lant wonen.

15

Want ic sal vergaderen alle die maechscappen vanden rijc van noerden seit die here: ende si sullen comen ende elc sal sijnen zetel setten inden inganc vanden poorten van iherusalem. ende op alle haer mueren al om ende omme: ende op alle die poorten van iuda.

16

Ende ic sal mijne vonnisse mit hem spreken van al hare quaetheit. Want sij hebben mij ghelaten ende si hebben mij vreemde goden gheoffert: ende hebben aenghebeden die wercken haerre hande.

17

Hier om gorde toe du dijne lendenen ende stant op: ende spreec hem toe al dat ic dij beuele. En ontsich di niet van horen aensichte: want ic en sal di niet doen ontsien haer aensichte.

18

Sich want ic heb di huden ghegheuen in ene verwaerde stat ende in enen yseren calumpne. ende in enen metalen muer op alle dat lant den coninghen van iuda sijnen princen ende den priesteren. ende alle den volke vanden lande:

19

ende si sullen teghen di striden ende sij en sullen di niet verwinnen: want ic bin mit di seit die here dat ic dij verlossen soude.