Bible in duytsche (Delftse bijbel 1477)

Iheremias

§ Ende hier beghint sinte iheronimus prologhe op iheremiam den propheet.

[p. *413]

IHeremias die propheet diemen dit prologhe scrijft. onder die hebreeusche schijnt hi in sijnen redenen ruder wesen dan ysayas ende ozee ende enighe ander propheten mer inden sinnen is hi hem ghelike. want hi mitten seluen gheest propheteerde dat sij daden. Want die simpelheit sijnre spraken gheuiel hem vander stat daer hi in geboren was. Want hi was van anathot dat tot huden is een dorp drie milen van iherosolima staende. ende hi was priester vanden priesteren ende hi was in sijnre moeder lihaem gheheylicht. ofte heylighen vergaderende die man der ewangelien mit sijnre suuerheit cristus kerken. Dese iheremias begonste te propheteren doe hi noch een kint was. ende die gheuangenisse der stat van iherosolima ende van iudea aensach hi. niet allene inden geest mer oec mit sijnen vleyscheliken oghen. Die van assyrien hadden te hant die thien gheslachten ouergheuoert in meden. ende dier thien gheslachten lant besaten nv landmannen vanden heydenen. Hier bi soe propheteerde hi allene in iudea ende in benyamin. ende hi beweende mit vier . a b c. die destructie van sijnre stat. dat wi in maten ende vaersen hebben ouer ghegheuen: voert die ordinancie van sijnen visioenen ende onder die griecke ende onder die latijnsche alte mael gheconfondeert is hebben wi gecorrigeert ter eerster vryheit. Ende baruch sijns notarijs boec diemen onder die hebreeusche niet en heeft noch en leest hebben wij achter ghelaten. Ouer alle dese dinghen ontbeidende. volke ende quade spraken van onsen beniders ende mij is noot tot alle mijnen werken dien te antwoerden. Ende dit gedoghe ic want ghi o paula ende eustochium dwinghet mi daer toe. mer om te cortene dit quaet soe hadt recht geweest dat ic mit mijnen zwighene afleide die maniere haers torens dan dat ic dagelijcs v yet niewes scriuende. verporre die sotheit vanden kinders.

§ Hier gaet wt die prologe

Ende hier beghint ihereremias des propheten boec