Bible in duytsche (Delftse bijbel 1477)

§ Capittel .lxvi.

1

DIt seit die here. Die hemel is mijn zetetel: ende die aerde. den banc mijnre voeten Wat huys is dit dat ghi mi stichten sult: ende welc is die stat mijnre rnsten?

2

Alle dese dinghen heeft mine hant ghemaect: ende alle dese sijn gemaect seit die here. Mer te wien sal ic aenscouwen: sonder enen armen die bedroeft is van gheeste. ende die mijne woerde ontsiet?

3

Die enen osse offert: is als een die enen man dootslaet. Die een coe dootslaet: is als een die enen hont die hersen wtduet. Die offerhande offert: is als een die varkens bluet offert Die des wieroecs ghedenct: is als een die den afgoden benedijt. Alle dese dingen vercoren si in haren wegen: ende in horen veronwaerdichtheden heeft haer ziele ghenoechte behaghet.

4

Hier bi sal ic oec wtkiesen hare bespottinghen. ende dat sij ontsien hebben sal ic hem toebrenghen: om dat ic riep ende nyemant en was die antwoerde. ic sprac ende si en hoerdens niet. Ende si daden quaet in mijnen oghen: ende si vercoren dat ic niet en wilde.

5

Hoert des heren woert. die v vreset te sijnen woerde. Vwe broederen seiden die v haten: ende verdreuen om mijnen name. Moet die here gheeert worden: ende wi sullen sien in v blijscap: mer sij sulle werde geschent

6

Des volcs stemme vander stat: gheluyt vanden tempel: des heren stemme die ghelt den loen sijnen vianden

7

Eer sij ghebaren souden so ghebaerde si: eer hare dracht quam soe ghebaerde sij een sone.

8

Wie hoerde noeyt dustanighen dinc: ende wie sach des ghelike. En sal die aerde niet ghebarende wesen in enen daghe. ofte sal dat volc te gader werden gebaert. want syon was drachtich ende gebaerde hare kinderen?

9

Ic die dander ghebaren doe: en sal ic selue niet ghebaren seit die here? Ofte ic die den anderen gheue kinderen te winnen sal ic ondrachtich wesen: seit die here dijn god?

10

Wort verblijt mit iherusalem: ende vervroecht in haer alle diese mint. Ghi alle die op iherusalem

[p. *412]

weent verblijt mit haer in vrouden:

11

dat ghi sughen moghet ende veruolt worden vanden borsten haers vertroestens: ende dat ghi oueruloeyen moghet in weeldicheden van alte male haerre glorien

12

Want dit seit die here. Siet ic sal nedercomen op haer als een riuiere des vreden: ende als ene ouerlopende schietende riuiere der heydenen glore die gi sughen sult. Ghi sult ten borsten worden ghedraghen: ende op die knyen sullen si v smeeken.

13

Ghelike een moeder yemant smeect also sal ic v vertroesten: ende in iherusalem suldi worden vertroest

14

Ghi sultet sien ende v herte sal verblijden: ende uwe beenre sullen groeyen als cruyt. Ende des heren hant sal worden bekent sijnen knechten: ende hi sal veronwaerdighen sijnen vianden.

15

Want siet die here sal comen in enen vyere: ende als een bedruysche sine waghen. hi sal in onwaerdicheden ghelden sijnen toerne: ende sijn berispen in een vlamme vyers.

16

Want die here sal inden vyere oerdelen: ende in sijn zwaerde tot allen vleysche: ende die vanden here verslagen werden sullen: si sullen worden ghemenichuoudicht.

17

Die geheylicht werden: ende waenden dat sij suuer waren inden vrijthouen ende binnen achter die duere: die aten zwinen vleysche ende veronwaerdicheit ende die muys: dese sullen te gader werden verderft seit die here

18

Want ic come om hare werke ende hare ghepense te vergaderen mit allen heydene ende tonghen: ende sij sullen comen ende sien mijne glorie.

19

Ende ic sal in hem setten een teyken: ende ic sal van hem luden senden die behouden sullen wesen ten heydenen in die zee in affrica. ende in lydiam. houdende dat ghescutte in ytalien ende in grieken ten eylanden verre: tot dien die van mi niet ghehoert en hebben ende die mine glorie niet ghesien en hebben Ende sij sullen den heydenen mijne glorie boetschappen:

20

ende sij sullen brenghen alle uwe bruederen van allen heydenen te ghiften den here op paerden. ende op waghenen. ende op ghebedde waghenen ende op muylen. ende op karren te mijnen heylighen berghe te iherusalem seit die here: ghelike also die kinder van israhel brenghen ghifte in een suuer vat in des heren huys.

21

Ende ic sal van hem luden aen nemen in papen ende in leuyten seit die here:

22

want ghelike dat die nyewe hemelen ende dyer nyewer aerden die ic doe staen voer mij seit die here: god: also sal staen uwe saet ende uwen name.

23

Ende die maent sal wesen wt der maent: ende die saterdach vten saterdach Alle vleysch sal comen: om te aenbedene voer mijn aensicht seit die here

24

Ende sij sullen wtgaen: ende sien der mannen croendien die ouerdaet ieghen mij gedaen hebben. Haer worm en sal niet steruen: ende haer vyer en sal niet werden gheblusschet: ende sij sullen wesen totter ghesaetheit des siens allen vleische.

§ Hier gaet wt ysayas des propheten boeck