Bible in duytsche (Delftse bijbel 1477)

§ Ca .lxiiij

1

OFte du die hemel scores ende neder quaemste. Van dijnen aensichte souden die berghen neder vloten:

2

ende si souden smelten als dat verbrande van vyere. ende sij souden barnen mitten vyere: om dat dijn name bekent werden soude dijnen vianden: van dijnen aensichte souden die heyden gestoert worden.

3

Altstu wonder doen sultste so en sullen wijs niet ghedoghen. Du quaemste neder: ende van dijnen aensichte vloyden die berghe nederwaert.

4

Vanden beghinne en hoerden sijs niet: noch en begrepen mit oren. Ne gheen oghe en heuet ghesien god sonder dij: dattu bereet hebste den ghenen die di ontbeyden

5

Du quaemste te gemoete dien die di verblijden ende die gherechticheit dede: in dinen weghen sullen si dijns gedencken. Sich du biste gram ende wij hebben ghesondicht: ende inden sonden hebben wi altoes gheweest: ende wi sullen werden behouden.

6

Ende wi alle sijn worden als ene onsuuere: ende als een wijfs doec die de maent suueringhe doghet sijn alle onse gherechticheden. Ende wij sijn alle gheuallen als een blat: ende onse ongherechticheden hebben ons wech gheuoert als die wint.

7

Niemant en is die dinen naeme aenropen mach: die opstaen mach ende di behouden. Du hebste dijn aensicht van ons verborghen: ende du hebtste ons ghestoten in die hant onser ongherechticheit.

8

Ende nv here onse vader bistu. Ende wi sijn slijc: ende onse visierre biste: ende wij sijn alle die werken dijnre hande.

9

En werde niet gram here ghenoech: ende en ghedencke voertmeer niet onse ongherechticheit Siet here aensich ghenoech: wij sijn alle dijn volc.

10

Dijns heylichs stat is woest gemaect: syon is woest gemaect Iherusalem is bedroeft:

11

dat huys onser geheylichtheit ende onser glorien daer dij onse vaderen loefden is ghemaect in verbernen des vyers: ende alle onse begheerlijcheden sijn verwandelt in vallen.

12

Here en sultstu di op dese dinghen niet onthouden: sultstu zwighen ende sultstu ons anxtelike quellen? Si hebben mij ghesocht die te voren niet en vragheden: si hebben mij gheuonden die mi niet en sochten.