Bible in duytsche (Delftse bijbel 1477)

§ Capittel .lxij.

1

OM syon en sal ic niet zwighen. ende om iherusalem en sal ic niet rusten voer dat wtcomen sal als claerheit sijn gherechtighe: ende voer dat sijn behoudere sal worden ontsteken als een lampe.

2

Ende die heyden sullen sien dijnen gerechtighen: ende alle coninghen dijnen voertbarigen. Ende men sal di heten enen nyewen naem: dien des heren mont ghenoemt heeft.

3

Ende du sultste wesen een croen der glorien in des heren hant ende dyadema des riken in dijns gods hant.

4

Du en sultste voertmeer niet worden gheheten gelaten: ende dijn lant en sal voertniet gheheten worden bedroeft. Mer du sultste gheheten worden mijnen wille in hare: ende men sal in dijn lant wonen. Want het heeft den heer behaecht in di: ende men sal in dijn lant wonen.

5

Want die ionghelinc sal wonen mitter maghet: ende in di sullen wonen dijn kinderen. Ende die brudegom sal verblijden op die bruut: ende op dij sal verblijden dijn god.

6

Op dijne mueren iherusalem heb ic geset wachters: alden dach ende alden nacht nemmermeer en sullen sij zwighen. Die des heren ghedencken en zwighet niet:

7

ende en gheeft hem gheen gheswijch. voer dat hi vaste make ende vore dat hi iherusalem sette lof inder aerden.

8

Die here heeft gesworen in sijnre rechter hant ende inden arme sijnre starcheit. Of ic voertmeer dijn tarwe gheuen sal in spisen dine vianden: ende ofte die vreemde drincken sullen dijnen wijn daer du in ghearbeit hebste.

9

Want die dat vergaderen sullen si snllent eten ende den here louen: ende die den wijn mede brenghet si sullen drincken in mijnen heylighen vrijthouen.

10

Lijt ouer lijt ouer

[p. *408]

dore die poorten: bereit den volke den wech. Maect effen den wech: kiest op die stenen: ende heft op een teyken ten volke.

11

Siet die here heeft doen horen in die eynden der werelt. Segt der dochter van syon. sich dijn behoudere coemt: sich sijn loen is mit hem: ende sijn werc voer hem.

12

Ende si sullense heten heylich volc: verlost vanden here. Want du sultste worden geheten ghesochte stat: ende niet ghelaten.