Bible in duytsche (Delftse bijbel 1477)

§ Ca .lxi

1

DEs heren gheest is op mi: om dat mij die here gheconsacreert heeft. Om te boetscappen den sachtmoedighen heeft hi mij ghesonden. dat ic ghenesen soude die bedroefde van herten. ende dat ic den gheuanghenen prediken soude verlatenisse. ende den besloten openen:

2

ende dat ic prediken soude een bequaem iaer den here ende den dach der wraken onsen gode: dat ic vertroesten soude alle den wenenden:

3

dat ic setten soude vertroestinghe den wenenden van syon: ende dat ic hem geuen soude den crone ouer den asschen: olye des blijscaps ouer geween den mantel des loues ouer den geest der droefheit. Ende si suslen in haer worden gheheten die starcke der gherechticheit: des heren plantinge om te glorificeren.

4

Ende si sullen stichten die wildernissen vander werelt: ende sij sullen die oude vallen op rechten: ende si sullen vermaken die ghewoeste steden ende die ghescheidene in gheslachte ende

[p. *407]

gheslachte.

5

Ende die vreemde sullen staen ende sij sullen v vye voeden: ende der vreemder kinder sullen wesen uwe ackerlude ende uwe wijngaerts lude

6

Mer ghi sult des heren papen worden gheheten: dieninghe uwes gods salmen v segghen. Ghi sult die stercheit der heydenen eten: ende in hare glorien sullen v verheffen.

7

Om uwe dubble scaemte ende rootheit: sullen si haer deel louen Om dat sullen sij in haer lant dubbel dinghen besitten. ewelike vroude sal hem wesen.

8

Want ic die here bin minnende dat vonnisse: ende in hatyen hebbende den roef in holocauste. Ende ic sal haer werc gheuen in die waerheit: ende ewelike belofte sal ic hem setten.

9

Ende men sal weten inden heydenen haer saet ende haer groeyen inden middewaert vanden volken. Alle diese sien sullen. sij sullense kennen: want dese sijn dat saet dien die here ghebenedijt heeft.

10

Verblijen sal ic verblijden inden here: ende mine ziele sal vervrouden inden here mijnen god. Want hi heeft mij gecleet mitten clederen der salicheit: ende mitten clede der vrouden heeft hi mi omhanghen: als enen brudegom die verciert is mit eenre cronen. ende als een bruut verciert is mit haren hexselen.

11

Want ghelike dat die aerde voertbrenget haer groeysele. ende als een vrijthof sijn saet groeyt: alsoe sal die here god groeyen gerechticheit ende lof voer allen luden.