Bible in duytsche (Delftse bijbel 1477)

§ Ca .lix.

1

SIet des heren hant en is niet ghecort dat hi niet en mach behouden: noch sijn ore en is niet verzwaert dat hi niet gehoren en sal:

2

mer uwe ongherechticheden hebben ghedeelt tusschen v ende uwen god: ende uwe sonden hebben sijn aensicht verborgen van v luden dat hij niet ghehoren en soude.

3

Want uwe handen sijn besmet van bluede: ende uwe vingheren van ongherechticheden. Uwe lippen hebben ghesproken loghene: ende uwe tonge spreect ongherechticheit.

4

Niemant en is die aenroept die gerechticheit. noch nyemant en is die gherechtelijc vonnist: mer si betrouwen in niet: ende si spreken ydelheden. Sij ontfinghen arbeit: ende si ghebaerden ongherechticheden.

5

Si braken der aspiden eyere ende sij weuede spinnen webbe. Die eten sal van haren eyeren hi sal steruen: ende dat ghebruet is. sal wtbreken in een cokentrijs.

6

Hare webben en sullen niet wesen in cledere: noch sij en sullen niet werden ouerdect mit hare werken. Hare werken sijn onnutte werken: ende dat werc der ongherechticheit is in haren handen.

7

Ende haer voeten loepen ten quade: ende si haesten hem om wt te stortten onnosel bluet. Haer ghepense sijn onnutte ghepense. Woestheit ende bedroeftheit is in haren weghe:

8

ende si en bekenden den wech des vreden niet: ende ne gheen vonnisse en is in haren screden. Hare paden sijn hem ghecromt: elc diere in tredet hi en weet ghenen vrede.

9

Om dat is dat vonnisse veruerdert van v: ende die gherechticheit en sal v niet anvaen. Wij hebben dat licht ontbeit ende siet die donckerheden claerheit: ende wi hebben ghewandelt in donckerheden.

10

Wi hebben ghetast als blinde die wandt: ende als lude sonder oghen hebben wi gewandelt. Wij stieten ons in middage als in donckerheden: in deemsterheden als dode.

11

Wij sullen briesschen als beren alle: ende wi sullen versuchten als duuen pensende Wi hebben ontbeit vonnisse ende en is niet: die salicheit ende si is veuerdert van ons.

12

Want onse ongherechticheden sijn ghemenichvoudicht voer dij: ende onse sonden hebben ons gheantwoert. Want onse misdaden sijn mit ons: ende wij bekennen onse ongherechticheden.

13

te sondigheu ende te lieghen iegen den here: ende wij sijn afghekeert dat wi niet gaen en souden achter ons gods rugghe dat wij spreken souden misdadicheit ende ouerdaet. Wi ontfinghen ende hebben ghesproken wt der herten woerden der loghenen:

14

ende dat vonnisse is achterwaert ghekeert ende die gherechtiheit is verre gaen staen. Want die waerheit is gheuallen inden straten: ende die gherechticheit en mochte niet incomen.

15

Want die waerheit is geworden in verghetelheden ende die vanden quaden wech ghinc was

[p. *405]

den roue geopent. Ende die here sach dat ende het scheen quaet in sijnen ogen want ten is gheen vonnisse.

16

Ende god sach dat want ten is gheen man: ende hi was bedroeft want nyemant en is die ieghen coemt. Ende hi sal behouden te sijnen behoef sijnen arm:

17

ende sine gerechticheit si selne vast maken. Hi heuet gherechticheit an ghedaen als enen halsberch: ende die helm der salicheit is op sijn hoeft. Hi heuet ghecleet dat cleet der wraken: ende hi is ouerdect als mitten mantel des torens als ter wraken:

18

als tot wedergheldinghe des onwaerdicheits sijnre vianden: ende tot onderstant sinen vianden. Den eylanden sal hi lone gheuen.

19

Ende die van westen sijn. sullen des heren name ontsien: ende vander sonnen opganghe sijn glorie. Als hi comen sal als ene crachtighe riuiere die des heren gheeft dwinghet:

20

ende als syons verlossere comen sal ende hem luden die wederkeren van ongherechticheden in iacob seit die here.

21

Dats mine belofte mit hem luden seit die here. Mijn gheest die in dij is ende mijne woerden. die ic in dijnen mont geset hebbe en sullen niet wech gaen van dijnen monde noch vanden monde dijns zaets seide die here: nv ende tot inden eweliken.