Bible in duytsche (Delftse bijbel 1477)

§ Ca .lvij

1

DIe gherechtighe verderft. ende nyemant en is diet ghedenct in sijn herte: ende die manne der ontfermicheit worden vergadert: want nyemant en is diet verstaet. Want vanden aensicht der quaetheden is die gherechtighe vergadert.

2

Die vrede coeme. ende hi ruste in sinen bedde. die wandelde in sijnen beleidene.

3

Mer ghi lnde coemt op harwaert der toueraersters

[p. *402]

kinder: saet der ouerspeelinne ende der vernoyeerder moeder.

4

Op wien hebdi ghespeelt: op wien verbreetstu dijnen mont. ende staect v tonge wt? En sidi niet misdadighe kinder ende logenachtich saet:

5

die vertroest wort inden afgoden ouer elc ghelouert hout. offerende uwe cleyne kinder inden riuieren onder die hoge stene.

6

Inden delen vanden riuieren is dijn dele: dit is dijn dele. Ende den afgoden scenckestu verssche offerhande: ende offerste hem sacrificie. En sal ic op dese dingen niet veronwaerdicht worden?

7

Op enen hogen berch ende verheuen leydestu dijn bedde ende daer ghinghestu op om offerhande te offeren:

8

ende achter die dore achter den stile settestu dijn ghedencken: want neuen mi ondecketstu ende ontfinghes dat ouerspel: ende bredes dijn bedde: ende du makes mit hem belofte Du minnes haer bedde mit openre hant:

9

ende du verchieres dij mit conincliker saluen: ende du menichfoudighes dijne specien. Du sendeste verre dijn messelgiers: ende du biste vernedert totter hellen.

10

Du arbeides in die menichte dijns weges: du en seitste niet ic sal ophouden. Du vontste dat leuen dijnre hant: hier om en baetstu niet

11

Waer du sorchachtelijc of ontsaghes want du hebste gheloghen ende du en biste mijns niet ghedacht: noch en gedachste in dijn herte. want ic bin zwighende ende als niet siende. ende du hebste mijns vergheten.

12

Mer ic sal dijne gherechticheit boetscappen: ende dijne wercken en sullen di niet vorderen.

13

Altstu ropen sultste soe verlossen di. die du vergadert hebste. Ende alle die sal die wint wech voeren: ende die lucht wech doen. Mer die mijns betrouwen heeft. hi sal dat lant te erueachticheden hebben: ende besitten minen heylighen berch.

14

ende ic sal seggen Maect den wech. gheeft den wech: keert of vanden weghe. draget wech van mijns volcs weghe daer si hem aenstoten moghen.

15

Want dit seit die hoghe verheuen here die in die ewicheit woent. ende sijn name is heylich: inden hoghen ende inden heylighen wonende. ende mitten bedroefden ende oetmoedigen van gheeste om dat hi leuende maken sal der oetmoedigher gheest. ende leuende maken der bedroefder herten.

16

Want ic en sal niet eweliken striden. noch ic en sal totten eynde niet gram wesen: want die gheest sal van mijnen aensicht wtgaen: ende die adem sal ic maken.

17

Om die ongherechtiheit sijnre ghiericheit so bin ic vergramt: ende hebben gheslagen. Ic verberch van di mijn aensicht ende ic bin veronwaerdicht ieghen dij. Ende het ghinc wech vluchtich inden weghe sijnre herten.

18

Ic hebbe sijn weghe ghesien ende hebben ghenesen. ende hebben wederbracht: ende ic hebbe hem vertroestinghe weder ghegheuen ende sinen wenenden..

19

Ic heb ghescepen die vrucht der lippen vrede: vrede den genen die verre is. ende die bi is seit die here: ende ic hebben ghenesen.

20

Mer die onghenadighe sullen wesen als die stormende zee die niet rusten en mach: ende sijnen waghen vloeyen ouer in ver-

[p. *403]

treden ende in moddere.

21

Den onghenadighen en is ghenen vrede seit die here god.