Bible in duytsche (Delftse bijbel 1477)

§ Ca .lvi

1

DIt seit die here. Wachtet dat vonnisse ende duet gherechticheit: want mine salicheit is bi dat si comen sal: ende mine gherechticheit datse sal worden gheopenbaert.

2

Salich is die man die dat duet: ende des menschen sone die dit aengrijpt: wachtende den saterdach dat hi dien niet en besmet: behuedende sijn hande dat hi geen quaet en doe.

3

Ende eens toecomelincs kint en sal niet segghen die anden here hanghet segghende: mit afscheidinge sal mi die here afscheiden van sijnen volke. Ende die ghelubde man en segghe niet: sich ic bin een droghe hout.

4

Want dit seit die here den ghelubden die hueden mijme vierten: ende die verkiesen dat ic wille: ende die houden mijne ghelofte.

5

Ende ic sal hem gheuen in mijnen huyse ende in mijnen mueren stat: ende beteren name van sonen ende van dochteren. Enen eweliken name sal ic hem gheuen: die niet vergaen en sal

6

Ende des toecomelincs kindere die anden here hem houden dat sine oeffenen ende sinen name minnen datse sijn sine knechten: elken die behuedet den saterdach dat hi dien niet en besmette ende die mijne belofte houdet:

7

ic salse brenghen in mijnen heylighen berghe. ende ic salse verbliden inden huse mijnre bedinghen. Hare holocauste ende hare offerhande sullen mij ghenoghen op mijnen heylighen outaer: want mijn huys sal worden geheten een huys der bedinghen allen volken.

8

Seit die here god: die vergadert die ghestroeyde van israhel. Noch sal ic tot hem vergaderen alle sijn vergaderde.

9

Alle ghi beesten des veldes coemt om te verslindene: alle beesten des woudes

10

Haer wachters sijn alle blint: alle en wisten si niet sijn stemme: honde die niet en vermogen te bassene: siende ydel dingen slapende ende minnende drome:

11

alte vuyle honde si en wisten ghene satheit Die herden en wisten selue die verstandenisse niet: oec so keerden sij alle of in haren weghe: elc te sijnre ghiericheit vanden hoochsten totten achtersten.

12

Coemt nemen wij wijn ende worden wi veruolt van dronckenscap: ende het sal wesen ghelike huden alsoe morghen. ende vele meer