Bible in duytsche (Delftse bijbel 1477)

§ Capit .lv.

1

GHi alle die dorst hebt coemt ten wateren: ende die gheen siluer en hebt coemt voert. Coept ende eet: coemt coopt sonder siluer: ende sonder enich verwisselen wijn ende melc

2

Waerom weghedi v siluer niet in broden: ende uwen arbeit niet in satheden? Hoert mij horende ende etet dat guede. ende uwe ziele sal ghenoechte hebben in vetheden.

3

Helt neder v ore ende coemt tot mi: hoert ende uwe ziele sal leuen: ende ic sal mit v setten ewelike belofte: des ghetrouwen dauids ontfermherticheden.

4

Siet ic hebben tot enen oerconde den volke ghegheuen: beleidere ende gebiedere den heydene.

5

Sich du sultste roepen die lude die du niet en wistes ende die heyden die di niet en kenden. sullen tot di lopen om den here dijnen god. ende den heylighen van israhel: die di glorificeerden.

6

Soect den here als men vinden mach: aenroepten als hij bi is.

7

Die onghenadighe laet sijnen wech. ende die ongherechtige man sijne ghepensen: ende hi bekere ten here ende hi sal sijns ontfermen: ende te onsen god want hi is vele om te vergeuene.

8

Want mijne ghepensen en sijn uwe ghepensen niet: noch uwe weghen en sijn mine weghen niet seit die here.

9

Want gelike dat die hemele werden verheuen vander aerden. also sijn mijne weghe verheuen van uwen weghen: ende mine ghepense van uwen ghepensen

10

Ende ghelike dat die reghen ende die snee neder comt vanden hemel. ende derwert voertmeer niet weder en keert mer hi veruolt die aerde ende bestortse ende doetse groeyen. ende gheeft den saeyenden saet ende broot den etenden:

11

alsoe sal mijn woert wesen dat wt mijnen monde gaen sal. En sal te mij niet wederkeren ydel: mer het sal doen so wat dat ic

[p. *401]

wilde. ende het sal voerspoet hebben in dien daer toe dat ict ghesendet hebbe.

12

Want in blijscappen suldi wtcoemen: ende in vreden worden beleit. Die berghe ende die houele sullen voer v lof singhen: ende alle die houte vanden lantscape sullen mitter hant te gader slaen.

13

Ouer saliunca sal wesen den vueren boem: ende ouer die netele sal wassen die mirtus. Ende die here sal wesen ghenaemt in een ewelijc teyken: dat niet ofghenomen worden en sal