Bible in duytsche (Delftse bijbel 1477)

§ Capit .liiij.

1

LOue ondrachtighe die niet en ghebaers: singe lof ende neye die niet en ghebaers: want vele kinder sijn der ghelatenre meer dan der gheenre die enen man heuet seit die here.

2

Spreyde wt die stat dijnre tenten: ende die vellen van dijnen tabernaculen strec vte ende en spaertse niet. Maer lanc dijn coerden: ende dijne naghele maec geheel

3

Want ter rechter ziden ende ter luchterziden sultstu doergaen: ende dijn saet sal die heydene in erfachticheden hebben: ende het sal wonen inden woesten steden.

4

En wille niet ontsien: want du en sultste niet bescaemt worden noch di scamen. Want di en sal niet bescamen want du sultste vergheten des lachters dijnre ioncheit: ende der scaemten dijnre weduwelicheit en sultstu voert meer niet ghedencken.

5

Want bouen di sal heerlicheit hebben die di ghemaect heeft: die here vanden scaren is sijnen name: ende dijn verlosser die heilighe van israhel: hi sal worden gheheten god van alle der werelt.

6

Want die here heeft di gheropen als een gelaten wijf: ende drouende inden gheest. ende als een wijf die afgheworpen was van haerre ioncheit. Seit die here v god.

7

Te enen punt in corten tiden liet ic di: ende in groten ontfermicheden sal ic di vergaderen.

8

In een wijlkijn der onwaerdicheit so heb ic een luttelkijn mijn aensicht van di verborgen: ende in eweliker ontfermherticheden soe bin ic dijns ontfermt seit die here dijn verlossere.

9

Ghelike in noes daghen is mi dit: dien ic zwoer dat ic die wateren der dyluuien niet brenghen en soude voertmeer op aertrike: alsoe heb ic ghezworen dat ic di niet vergramt worden en sal. ende di niet berispen en sal.

[p. *400]

10

Want die berghen sullen worden beruert ende die houelen sullen beuen: mer mijne ontfermherticheit en sal niet van di gaen ende die belofte mijns vreden en sal niet beruert werden. Seit dijne ontfermere die here.

11

Armartiere mit tempeest bestoten sonder enige vertroestinghe: siet ic stroeye bi ordinancien dijn stenen: ende ic sal di fonderen in saphiren.

12

Ende ic sal te dijnen cardelen leggen iaspiden: ende dijn poorten in gegraueerden stenen: ende alle dijn termijn in begheerliken stenen.

13

alle dine kinderen gheleert vanden here: ende een menithte van paeyse dinen kinderen

14

ende du sultst werden ghefondeert in gherechticheden. Ganc wech verre van ouerdade. want du en sultste niet ontsien: ende van anxte: want hi en sal di niet ghenaken.

15

Sich die lantwinre sal comen die mit mi niet en was: ende die wilen dijn toecomelinc was sal mit di werden gheuoghet.

16

Siet ic hebbe gescepen den smit die de colen blaset inden vyere: ende die voertbrenghet dat vat in sijn werc: ende ic hebbe ghescepen den dootslaenre om te verderuen.

17

Alle vat dat ieghen di geuest is en sal niet beleet worden: ende alle tonghe die di wederstaet inden vonnesse sultstu oerdelen. Dit is der knechte des heren erueachticheit: ende haer gherechticheit voer mi seit die here.