Bible in duytsche (Delftse bijbel 1477)

§ Capit .liij.

1

DIe gheloefde onse hoerne: ende des heren arme wien is hi gheopenbaert?

2

Ende hi sal opcomen als een rijtstuyne voer hem: ende als een wortel wt dorstighen lande. Hem en is ghene ghedaente noch schoenheit. Ende wi saghen hem ende en was ne ghene aenscouwen:

3

ende wi begheerden versmaet ende den lesten vanden mannen: den man der rouwen ende wetende crancheit. Ende sijn aensicht was als verborghen ende versmaet: hier bi soe en achten wi hem niet.

4

Waerlijc so droech hi onse quellinghen: ende onse rouwen droech hi. Ende wi achten hem als lazerus: ende gheslaghen van gode ende vernedert.

5

Mer hi is ghewont om onse ongherechticheden. hi is vertreden om onse sonden. Die discipline ons vreden is op hem: ende mit sijnre nydicheit sijn wij ghenesen

[p. *399]

6

Wi alle doelden als scapen: elc is of gekeert in sijnen wech: ende die here leide in hem onser alre ongherechticheit

7

Hi is gheoffert want hi woudt: ende hi en ondede sijnen mont niet. Men sallen leiden als een scaep ter dootslacht ende hi sal zwighen als een lam voerden ghenen diet scheert: ende hi en sal sijnen mont niet opdoen.

8

Hi is wech ghenomen vanden vernoey ende vanden oerdele. Wie sal sijne gheboerte vertellen Want hi is afghesneden vander leuen der lande. Om mijns volcs misdaet soe sloech ic hem.

9

Ende hi sal die ongenadighe gheuen ouer begrauen ende die rike ouer sijn doot: om dat hi gheen quaetheit en dede. noch om dat ghene boesheit in sijnen mont en was:

10

ende die here wouden vertreden inder crancheit Ist dat hi sijne ziele settet voer die sonde. soe sal hi sien dat langhe liuighe saet: ende des heren wille sal in sijn hant worden beleit.

11

Om dat sijn ziele arbeyde: soe sal hij sien ende worden ghesadet. In sijnre const sal hij mijn gherechte knecht vele lude gherechtich maken: ende haer ongherechticheden sal hi draghen.

12

Hier om sal ic hem vele luden delen ende der starcker roue sal hi delen: om dat hi sijne ziele leuerde in die doot: ende dat hi mitten misdadighen gheacht was Ende dat hi veelre lude sonden droech: eude ouer die ouerdadighe badt hij.