Bible in duytsche (Delftse bijbel 1477)

§ Ca .lij.

1

SAnt op stant op: doch aen dijn starcheit syon. Doch aen die clederen dijnre glorien iherusalem stat des ghelichs: want hij en

[p. *398]

salre voertmeer niet toedoen dat ouer di doerliden sal dese onbesnedene ende die onsuuere.

2

Verscudde dij vanden gemulle: stant op: sitte iherusalem. Ontbinde die banden dijns hals die gheuanghen dochter van syon:

3

want dit seyt die here. Vwes dancs sidi vercocht. ende ghi sult sonder siluer sijn verlost.

4

want dit seit die here god. In egipten ghinc mijn volc neder inden beginne om dattet daer lantwinre wesen soude: ende assur dede hem tonder sonder enighe sake.

5

Ende nv wat is mij dit seit die here? Want mijn volc is wech gheleit te vergheues. Sijne heerscappen doen ongherechtelijc seit die here: ende eenpaerlijc wort mijne name alden dach gheblasphemeert.

6

Om dat sal mijn volc mijnen name weten in dien dage want ic selue sprac siet ic bin hier.

7

Hoe schoen sijn op die berghe die voeten des gheens die boetscapt ende diere predict den vrede: dier dat guede boetscapt dier de salicheit predict: dier seit tot syon. Dijn god sal regneren.

8

Die stemme dijnre wachters. Si hieuen die stemme op. si sullen te gader louen: want sij sullen mit oghen ter oghen sien. als die here syon bekeert hebben sal.

9

Verblijt ende loeft te gader die ghelaten van iherusalem: want die here heeft sijn volc vertroest: hi heeft iherusalem verlost

10

Die here bereide sijnen heylighen arm in alder heydenen oghen: ende alle die eyden der werelt sullen sien ons gods behoudere.

11

Gaet wech gaet wech: gater vte: en wilt gheen besmet dinc genaken. Gaet vte van midden haer: wert ghesuuert die des heren vate draghet

12

Want ghi en sult niet wtgaen in geruchte: noch wech tiden in vluchte. Want die here sal voer v gaen: ende die god van israhel sal v vergaderen.

13

Siet mijn knecht sal verstaen: ende hij sal werden verheuen ende op gheheuen. ende hi sal herde hoghe wesen.

14

Alsoe op di verwonderden vele luden: alsoe sal wesen sijn aenschijn sonder schoenheit onder den mannen. ende sine ghedaente onder den menschen kinderen.

15

Dese sal vele heydene besprenkelen: op hem sullen die coninghen haren mont behouden. Want dien niet vertelt en is van hem sullent sien: ende dies niet en hoerden sullent aenscouwen.